Taur Kontra Alterasaun Lei Órgaun Administrasaun Eleitorál iha Ámbitu Besik Eleisaun

Prezidente Repúblika, Taur Matan Ruak kontra alterasaun ba Lei Órgaun Administrasaun Eleitorál nian ne’ebé rezulta membrus Komisaun Nasionál Eleisaun nian lakon sira nia mandatu maske seidauk hotu, liu-liu tanba kestaun hirak ne’e mosu iha tempu besik eleisaun.

Alterasaun Lei Órgaun Administrasaun Eleitorál ne’e hala’o hosi Parlamentu Nasionál iha fulan hirak ba kotuk tanba razaun membru Komisaun Nasionál Eleisaun barak demais maibé produtividade menus.

 “Ha’u kaer metin nafatin katak opsaun hirak ne’e halo prosesu hametin estrutura Estadu sira nian hakat ba kotuk, haktuir regras Estadu Direitu Demokrátiku nian,” Xefe Estadu ko’alia asuntu ne’e iha abertura Terseiru Lejizlasaun Sesaun Lejizlativu ba dala 5 iha Parlamentu Nasionál, Tersa (20/9).

Tanba ne’e, nia dehan, tenke reforsa ekipa independente sira ne’ebé sei hala’o observasaun ba eleisaun tinan oin nian, atu nune’e eleisaun sira ne’e bele la’o ho transparénsia.

“Dezafiu importante liu ne’ebé ita hotu sei enfrenta, maka atu garante eleisaun ne’ebé livre no justu, iha ne’ebé povu sei hato’o nia hakarak ka vontade soberanu. Luta libertasaun nasionál saugati de’it karik povu la ukun liuhusi ninia reprezentante sira. Ita hotu servidór ba Povu nia hakarak no laiha podér seluk duké podér ne’ebé mak fó hosi Povu,” Taur informa. (Jon)

Matadalan