Traballadór Halo Manifestasaun Hasoru Kompañia Gardamor

DILI, (ANTIL) - Traballadór sira hosi Kompañia Gardamor hamutuk ema na’in 84 halo manifestasaun pasífika hasoru Kompañia Gardamor iha Fatuhada, Komoro, Segunda (19/9).

Portavóz Traballadór sira ne’ebé lakon serbisu, Agostinho de Araújo esplika katak razaun halo manifestasaun ne’e tanba, kompañia la-selu kompensasaun hafoin hapara sira.

Traballadór hirak ne’e antes ne’e halo seguransa iha edifísiu Ministériu Finansas tanba iha kontratu entre Ministériu Finansas ho Kompañia Gardamor. Iha fulan Jullu nia laran, Ministériu Finansas deside hapara traballadór seguransa ema na’in 84 ne’e tanba kustu maka’as. Tanba ne’e, traballadór sira ne’ebé vítima hosi redusaun (hapara) ne’e reklama ba Kompañia Gardamor atu selu kompensasaun ba sira tuir lei traballadór nian.

Traballadór hirak ne’e hahú serbisu iha Kompañia Gardamor nu’udar seguransa iha tinan 2014 no hetan redusaun iha 31 Jullu 2016. Sira sei halo manifestasaun to’o loron sanulu nia laran. To’o loron ne’ebé determinadu maka laiha resposta hosi Kompañia, Agostinho dehan, sira sei hato’o petisaun ba Prezidente Repúblika.

Iha fatin hanesan, Sekretáriu Jerál Konfederasaun Sindikatu Traballadór Timor-Leste (KSTL), José Conceição da Costa informa KSTL mós hola parte iha manifestasaun ne’e tanba laiha solusaun ba problema refere.

Nia dehan Kompañia Gardamor hapara traballadór hirak ne’e laiha razaun ne’ebé klaru. “Iha karta notifikasaun ne’ebé Kompañia dirije ba traballadór sira iha Jullu nia rohan, obriga traballadór sira tenki intrega ona farda maibé la aprezenta motivu saida maka hapara traballadór sira,” José haklaken.

Tanba laiha razaun ne´ebé klaru, nia haktuir, KSTL no Sekretaria Estadu Polítika Formasaun Profisionál no Empregu (SEPFOPE) halo komunikasaun no mós mediasaun ho Kompañia atu rezolve problema ne’e maibé laiha solusaun nafatin. “Hanesan liman ain lei ninian, ami mai hamutuk ho traballadór sira para ezije traballadór sira nia direitu,” nia esklarese.

Tuir nia katak manifestasaun ne’e hanesan sinál ida hatudu ba públiku katak iha Timor iha Kompañia balun viola lei. “Kazu iha Kompañia Gardamor ne’e akontese fila-fila ona maibé Kompañia sempre hatudu vontade hodi rezolve ho di’ak. Maibé, kazu ida ne’e maka Kompañia la hatudu vontade di’ak atu rezolve,” José haktuir.

Nia deklara katak KSTL kontinua hamutuk ho traballadór sira to’o hetan solusaun. Traballadór sira ezije selu kompensasaun maka hanesan saláriu restu fulan Agustu $5.22×2=$10.44, kompensasaun tuir Lei Traballadór art. 55: $120×2=$240.00, direitu anuál bónus tuir artigu 44.2: $10×8=$80.00, direitu férias anuál tuir artigu 32: $5.22×24 dias=$128.00, direitu lisensa moras tuir artigu tuir artigu 33: $5.22×6=$31.32, direitu remunerasaun 25% tuir artigu 28: $200.00, reimbolsa osan ba sapatu botas no farda: $55.00, direitu ba sertifikadu serbisu tuir artigu 57, direitu ba overtime tuir artigu 27 (48 oras semana): $3.90×96 (semanál), direitu ba loron feriadu Nasionál tuir artigu 27.2: $5.22×15 dias (feriadu nasionál). Totál : $1,194.74.(jornalista: Xisto Freitas; editora: Rita Almeida)

Foto: Traballadór sira halo asaun hodi ezije sira nia direitu kompensasaun iha edifídiu Kompañia Gardamor, Fatuhada, Comoro, Dili, Segunda (19/9). Foto ANTIL/Xisto Freitas