KAZU PNTL-F-FDTL AINARO, TRAISAUN BA ESTADU

Vise Xefi Estadu Maior F-FDTL, Brigadeiru Jeneral, Filomeno Paixão, hatete katak, kazu membru Polisia Nasionál Timor Leste (PNTL), tiru kanek membru FALINTL Forsa Defeza Timor Leste (F-FDTL) iha Munisípiu Ainaro ne’e, hanesan traisaun total ida ba Estadu Timor Leste (TL).

“Ita labele haree kazu ida ne’e, depois ita sobu buat hotu, maioria responsabilidade total, i bele ita dehan traisaun total mak ida ne’e, maibé kestaun ida ne’e Komandu F-FDTL konsidera kestaun ne’ebé ita bele rezolve ho ulun malirin, no Estadu ne’e tenki hamriik, tanba Estadu Timor Leste koñesidu iha mundu tomak,” dehan Filomeno Paixão ba jornalista sira iha Palácio Prezidénsia Aitarak Laran Dili, Kuarta (31/08).

Nia hatutan tan katak, presiza iha komprensaun hanesan, instituisaun F-FDTL agora iha komprensaun bo’ot, tanba sentidu Estadu.

Filomeno Paixão dehan, nia esperansa ne’e, Komandu PNTL bele kontrola membru sira, para evita labele halo tan ona.

Filomeno Paixão afirma, prosesu ida ne’e ejiji transparente, rezultadu mós tenki transparente no medidas mós tenki transparente.

Nia haktuir, kazu sira hanesan ne’e, Komandu F-FDTL ho PNTL halo investigasaun konjunta, atu fó medidas disiplinar ba membru F-FDTL no PNTL.

“Maibé kona-ba krime, tenki lori ba Ministériu Públiku (MP), para depois bele aplika kódigu penal. Uluk ha’u duni mak hateten katak, dala ida, rua no tolu, ne’e individual, dala 10 to’o dala 30 ne’e, individual ka la’e, ida ne’e ha’u mós husu ba iha sosiedade sivil, komunidade tomak, ita hotu fó tok resposta ba ida ne’e halo nusa,” katak Filomeno Paixão.

Atu evita para labele duun malu ba kazu sira hanesan ne’e, Filomeno Paixão  dehan, Komandu F-FDTL iha ona proposta ida hodi halo analiza raíses idaba forsa rua ne’e.

“Ha’u ko’alia tiha ona ho Ministru Defeza ho Prezidenti Repúblika, ha’u husu ba Governu ho Estadu atu nomeia ekipa peritus ida, kompostu husi fatin hot-hotu, bele hatama tan ema internasionál, tuun ba institisaun rua ne’e hodi haree, nia pontus frakus mak ida ne’ebé, pontus fortes mak ida ne’ebé, no nia pontensialidades mak ne’ebé, dezafius mak ne’ebé, riskus mak ne’ebé, no ameasas mak ne’ebé,” Filomeno Paixão fundamenta.

Filomeno Paixão esplika tan katak, husi buat sira ne’e hotu mak depois hasai konkluzaun ida katak, sala ne’e, iha ne’e no ida ne’eba, hodi evita para labele hatudu liman ba malu.

Vise Xefi Estadu Maior F-FDTL ne’e hatutan tan katak, hafoin halo tiha analiza ne’e, ekipa ne’e halo rekomendasaun ba Estadu katak, PNTL nia moras mak ida ne’e, ninia forte mak ida ne’e, i F-FDTL mós hanesan, nia moras mak ne’e, forte mak ne’e, no fó rekomendasaun oinsa mak atu hadia moras ne’e.

“Ita nune’e hela de’it, hanesan virus ida ka kankru ida, nia bo’ot ba beibeik, nia lori ita nia isin bele mate,” nia afirma.

Alénde ne’e, Filomeno Paixão informa katak, sorumutu entre nia ho Prezidenti Repúblika (PR), Taur Matan Ruak ne’e, ko’alia kona-ba asuntu jeral militar nian.

“Ha’u mai hato’o relatóriu ba Prezidenti Repúblika hanesan, dezenvolvimentu forsas, komponentes, kuartel jeneral no unidades,” katak nia.cos

Jornal Nacional