quinta-feira, 1 de setembro de 2016

Austrália konsidera viziñu Timor-Leste ladi’ak tamba inisia prosedimentu kona-ba fronteira


Reprezentante hosi  Governu australianu iha horibainrua konsidera sinál viziñu ladi’ak tamba  desizaun  Timor-Leste hahú prosedimentu konsiliasaun obrigatóriu hodi obriga Austrália negosia fronteira marítima permanente. 

"Ami iha ne’e tamba Timor-Leste hakarak agora iha akordu ida diferente. Komisaun labele ignora tratadu deit tamba ida hosi hosi sira hakarak buat seluk. Hanesan rezultadu negosiadu no akordadu iha tinan barak nia-laran", haktuir  sekretáriu Departamentu Negósius Estranjeirus no eis-embaixadór hosi Nasoin Unidas, Gary Quinlan, iha Haia iha sesaun  abertura ba Komisaun Konsiliasaun ne’ebé sujere hosi Governu timoroan hodi  tenta obriga Camberra halo negosia delimitasaun fronteira marítima entre nasaun rua.

"Sai hosi kompromissu tratadu ne’e bele  ignora ninia objetivu katak atu  kria estabilidade. Saida maka  Timor-Leste propoin estraga reputasaun hosi parte rua ba kriasaun estabilidade  iha Tasi Timor", nia haktuir.

 Austrália, hatete  Quinlan, reklama  kompeténsia komisaun konsiliasaun, ne’ebé inisia hosi Timor-Leste hetan  kontrolu hosi Nasoins Unidas, nia konsidera katak "laiha  baze adekuadu ida atu  Timor-Leste iha direitu halo reivindikasaun ne’e".

Prosedimentu ne’e, hatete, "viola tratadu CMATS (Tratadu kona-ba  Determinados Ajustes Marítimos iha Tasi Timor) 2006 nian tuir  baze ne’ebé nasaun rua kompromete laaprezenta prosessu ruma relasiona ba fronteira" no Austrália mantéin kestaun ne’e " ninia prinsípiu katak  kualkér parte rua labele uza konsiliasaun obrigatória hodi  defende ninia pozisaun".

CMATS assina iha 2006 no Governu timoroan iha horibainrua anunsia katak iha tempu badak sei  halo suspende, tamba konsidera ninia objetivu lakumpre ona.

Jurista australianu ne’e afirma katak Austrália laaseita atu CMATS lavalida no rejeita argumentu katak Camberra rezeita negosia fronteira ho Timor-Leste.

"Kontráriu fila fali tuir buat ne’ebé hatete tiha ona, katak Austrália pressiona Timor-Leste atu assina, Timor-Leste maka propoin adia delimitasaun fronteira tuir buat ne’ebé hakerek hanesan solusaun kriativu ", nia hatete.

" Austrália iha inísiu hakarak atu  solusaun kriativa inkluí delimitasaun fronteira. Akordu 2006 nian inklui moratória ida kona-ba  fronteira no obrigasaun parte rua nian atu labele  inisia prosessu kona-ba assuntu ne’e", nia haktuir.

Quinlan defende CMATS hanesan  akordu di’ak liu, "forma ida ne’ebé di’ak liu atu ultrapassa hosi  situasaun ne’e" no bele  lori benefísiu ba iha parte rua, hanesan "dalan ne’ebé di’ak liu atu nasaun rua servisu hamutuk  respeita tratadu hirak ne’e".

SAPO TL ho lusa

Sem comentários: