Prokuradoria Jerál Konsidera Kazu Riska Bandeira Krime

DILI, (ANTIL) – Prokuradór Jerál Repúblika, José Ximenes konsidera, kazu riska bandeira iha Maubara, Munisípiu Liquiça, foin lalais ne’e krime tanba dez-respeitu ba Símbulu Nasionál.

Nia esplika, hahalok ne’e kontra artigu 206 Kódigu Penál, tan ne’e suspeitu bele hetan kastigu tinan 3 no tuir Lei nú. 2/2009 ne´e la’ós hetan responsabilidade kriminál de’it, maibé bele simu multa $100-500.

Artigu 206 ko’alia kona-ba ultraje ba símbolu nasionál ho ninia esplikasaun, ema ne’ebé publikamente, ho palavra, jestu ka divulgasaun eskrita ka ho meiu atu komunika ho públiku seluk, ofende bandeira ka inu nasionál, soberania Timór nia arma ka emblema ka lakon respeitu devidu ba símbolu sira-ne’e sei hetan pena prizaun to’o tinan 3 ka multa.

“Krime ne’e públiku ne’ebé afeta ba ita hotu-hotu, ne’e hanesan edukasaun para ita komesa hatene, ita labele halimar ho sasán sira ne’ebé sagradu”, José hatete e ba jornalista sira hafoin levanta asuntu ne’e ba Prezidente Repúblika, Taur Matan Ruak, iha Palásiu Prezidénsia Repúblika, Bairu-Pité, Kinta, (1/9).

Tuir nia, husu deskulpa ne’e lá sufisiente maibé, tenki asume responsabilidade tanba, prosesu investigasaun la’o dadaun, fulan rua no tolu iha ona rezultadu investigasaun.

Kroser na’in haat ne’ebé foin lalais riska bandeira Repúblika Demokrátika Timor-Leste (RDTL) husu ona deskulpa ba públiku depois, mosu reazen hodi entidade sira li-liu deputadu nomós ulun boot balun iha FALINTIL-FDTL.

Sekretáriu Jerál Federasaun Motór Ciclismo de Timor-Leste (FMCTL), Vitaliano José da Silva Leong rekoñese ba ANTIL foin lalais ne’e katak, kazu ne’e espontaniu no laiha rekuñesementu hosi federasaun.

Tuir Vitaliano, asaun ne’e hanesan dedikasaun lembransa ba treinadór motór cross internasionál hosi Moss Institution Austrália ho naran Greg Moss. “Kroser sira orgullu ho prezensa treinadór internasionál ne’e entaun sira asina iha bandeira RDTL para sai lembransa ba nia (treinadór)”, nia haktuir.

Estrutura FMCTL mós dezloka ba Polísia Munisípiu Liquiça hodi klarifika problema ne’e ba polísia.

Akontesementu ne’e akontese iha Lagua Masin Maubara, Munisípiu Liquiça, 24 Jullu 2016 tuku haat lokraik. (jornalista: Xisto Freitas; editora: Rita Almeida)

Foto: Prokuradór Jerál Repúblika, José Ximenes