Ema sira ne’ebé sa’e tuir aviaun indonézia no ne’ebé monu iha findesemana ne’e laiha ida maka moris

Hetan ona mate-isin hosi ema 54 ne’ebé sa’e tuir aviaun indonézia Trigana Air, ne’ebé monu iha provínsia Papua, findesemana ne’e. 

“Laiha ema ida maka moris. Hetan hotu ona mate-isin hosi ema 54 ne’e”, dehan portavós hosi Ministériu Transporte, J.A Barrata, ba AFP.

Aviaun ne’e lakon kontaktu ho torre kontrolu iha domingu, minutu 34 hafoin sai hosi Jayapura, kapitál Papua no minutu sanulu molok to’o iha Oksibili, sentru illa refere.

Aviaun ne’e tula ema 44, labarik lima no membru tripulasaun lima, iha voo ne’ebé tuir lolos ho de’it minutu 45 no atu nune’e bele tuun iha tuku 15:00 oras lokál.

Trigana Air hanesan kompañia kiik ne’ebé kria iha tinan 1991, hodi hala’o voo doméstiku ba iha fatin 40 ne’ebé besik iha Indonézia-laran.

Sempre uza aviaun kiik hodi tula ema ba iha zona foho Papua nian no iha tinan ikus ne’e akontese beibeik asidente tamba tempu ladi’ak.

SAPO TL ho Lusa