TINAN MISERICÓRDIA REMATA…!!!

Jornal Nacional, editorial

Igreja Katolika iha mundo tomak iha semana liu ba insera ona tinan laran luak “ano misericórdia”  nebe amo Papa Francisco haraik ba igreja katolika hotu hotu iha mundo tomak hodi fo perdaun sarani sira nebe komete sala pekadu.

Tinan misericórdia hahú 8 de Dezembro 2015 to Festa Cristo Rei tinan 2016, sei celebra tinan Misericórdia nebe fo sai iha bula MISERICORDIAE VULTUS, nebe tau matan makaas liu tan iha Nai nia misericórdia (laran luak) atu sarani katolika sira bele sai sinal nebe hatudu klaru liu, konkretu Aman Maromak nia hahalok.

Maske tinan Misericórdia taka ona sarani sira balu karik sei duvida saida maka Misericórdia? “Misericórdia liafuan nebe hatudu mistério santíssima Trindade nian mai ita; hahalok ikus no aas liu nebe Nai Maromak lori mai hasoru malu ho ita; lei inan nebe horik iha ema ida-idak nia fuan..,” Bispo Basilio, 5 de Dezembro 2015.

Misericórdia, maka Evangelho nia fuan, Igreja tama iha ema ida-idak nia fuan liu husi dalan domin no misericórdia. Iha tempo nebe ita ema moris liu ba individualismo, la iha tempo atu hasoru malu, rona malu, koalia ba malu, simu malu, mundo nebe moris liu ho egoísmo, Igreja tenki fo sasin kona ba domin nebe horik iha ema ida-idak nia fuan atu bele ba hasoru malu ho ema seluk.

Tinan misericórdia nudar uportunidade ba sarani sira nebe komete sala pekadu sira, li-liu sala oho ema no abortu hodi hetan perdaun nunee sai fila fali hanesan sarani bai-bain nebe bele simu fila fali Kristu ninia futar isin ‘komunga’.

“…., dalabarak ita haree labarik moris soe iha luron, lixu fatin, ne’e ha’u fó mensajem ida ne’e atu imi jovem sir abele hatene, se akontese karik, imi lalori ba iha Congregasaun ALMA maibé imi bele lori mai iha maternidade Diocese ninian mós bele simu, iha fatin rua I depois ha’u sei buka nafatin iha fatin ne’ebé iha atu imi mós bele hatene,” Amo Bispo Diocese Dili.

Amo Papa deside durante tinan 2016, tinan laran luak ‘misericórdia’ nunee sarani sira uza uportunidade nee hodi konfesa sira nia salan nebe durante nee sira komete, sala kontra mandamentu 10 Nai Maromak nian.

Hakarak ka lakohi tempo nebe amo Papa fo remata ona, nee la signifika laiha ona perdaun ba sala pekadu sira, lae. Igreja iha kbiit tomak no iha pratika kazu abortu, amo lulik sira refere ba amo Bispo hodi fo perdaun.

Agora duvida mak durante tinan  ‘misericórdia’ 2016 nee sarani sira, li-liu joven sira halao misericórdia nee iha sira nia moris loron –loron? Sarani nain hira mak hetan ona perdaun? Klaru barak maibe nee segredu sarani ida idak no segredu amo lulik sira nian atu divulga ba publiku.

Importante mak desizaun amo Papa nian hodi hili tinan 2016 nudar  tinan  ‘misericórdia’ iha aproveitamentu barak, sarani sira barak teb-tebes mak hetan  perdaun ba sala nebe sira komete, sala kontra Nai Maromak nian no sala kontra Nai Maromak nia ukun fuan 10.

Los duni tinan Misericórdia remata ona tuir determinasaun nebe Amo Papa fo sai maibe igreja Katolika kontinua misaun nee, igreja kontinua loke odamatan ba sala nain pekadu sira atu fila fali hakbesik an ba Nai Maromak.

Perdaun ba sala pekadu sira nudar maneira ida amo Papa nian atu oinsa dada fila fali sarani sira fila ba uma kreda, sai sarani lolos, laos sarani ida nebe iha deit Billete Identidade ( KTP), nuka mosu iha misa kada Domingo. *