Fretilin, partidu boot iha
parlamentu timoroan, desidi iha findesemana ne'e hodi kontinua hanesan forsa
ida opozisaun nian, afirma fali nia empeñu iha defeza ba Fundu Petrolíferu,
fonte prinsipal hosi reseita orsamentu nasional nian.
Partidu analiza ona situasaun
atual iha Timor-Leste iha reuniaun naruk ida, iha findesemana ne'e, hosi nia
Komité Sentral, hodi refere iha komunikadu "difikuldade institusional no
konfrontasaun ne'ebé labele aseita" ne'ebé maka nasaun hasoru daudaun.
Tensaun entre koligasaun Governu
nian ho Prezidénsia Repúblika marka debate polítiku, domina debate parlamentar
iha semana hirak ikus ne'e.
Iha komunikadu, no bainhira
debate kona-ba futuru hosi Governu Konstitusional daualuk, Frente
Revolucionária do Timor-Leste Independente (Fretilin) afirma fali "nia
pozisaun hanesan Partidu opozisaun nian durante mandatu ne'ebé hala'o
daudaun".
Afirma fali katak "sei
kontinua halo esforsu tomak hodi garanti soberanja no Estadu direitu
demokrátiku nian", partidu esplika katak sei "kontinua defende fundu
soberanu no impede destruisaun hosi fundu ne'e ba moris di'ak hosi povu no
nasaun nian".
Pozisaun ida ne'ebé hatudu ona
bainhira la konkorda ho desizaun hosi ezekutivu hodi uza Fundu Petrolíferu hodi
sosa pozisaun maioria ida iha konsórsiu Greater Sunrise, hakat dahuluk iha
estratéjia ida dezenvolvimentu hosi kosta-súl nasaun nian - ne'ebé inklui
gazodutu ida ba Timor-Leste no sei kusta to'o dolar biliaun 12.
Afirma katak sei "buka hetan
medida estruturante sira estadu nian no polítika global sira ba dezenvolvimentu
nasional", Fretili refere katak sei "eziji debate kona-ba
investimentu sira iha kosta-súl, hodi bele hamenus diferensa sira", haruka
sekretáriu-jeral, Mari Alkatiri, hodi "dialoga ho forsa polítika sira
seluk iha nasaun, liuliu ho líder nasional sira".
Reuniaun hosi Komité Sentral
Fretilin nian hala'o iha momentu ne'ebé Timor-Leste debate hela posibilidade ba
remodelasaun iha Governu, hodi kompleta faktu katak pelumenus membru na'in sia,
ne'ebé maka hatudu hosi primeiru-ministru Taur Matan Ruak, seidauk hetan
nomeasaun hosi Prezidente Repúblika.
Situasaun ne'ebé halo fraku
Governu iha pozisaun hosi Congresso Nacional da Reconstrução Timorense (CNRT),
partidu boot hosi partidu tolu iha koligasaun ezekutivu, Aliansa Mudansa ba
Progresu (AMP), ne'ebé hanesan partidu hosi membru na'in sia ne'e.
Iha fulan hirak ikus ne'e mosu
notísia sira iha imprensa kona-ba posível mudansa iha ezekutivu, inklui
eventual asaun hodi hatama membru sira hosi partidu rua hosi Governu dahitu,
ezekutivu anterior, Partidu Demokrátiku (PD) ho Fretilin.
Fonte hosi Komité Sentral
Fretilin nian admiti ona ba Lusa katak membru balun hosi partidu - hosi grupu
ida ne'ebé hanaran ona hanesan "reformista sira" - konsidera ona
posibilidade hodi halo parte iha Governu ida ne'ebé "tuir polítika hanesan
laiha limitasaun", bainhira iha konviti ba hanoin ne'e.
SAPO TL | Lusa
