Timor-Leste hahú sente impaktu hosi alterasaun klimátika

Timor-Leste, hanesan mos nasaun Pasífika seluk, hahú sente impaktu hosi alterasaun klimátika, tanba mudansa hosi époka udan ne’ebé akontese ladun kleur, maibé ho ninia intensidade maka’as, tuir alerta hosi Governu no Uniaun Europeia nian ohin.

Alerta ne’e fó sai durante konferénsia imprensa entre Governu ho Uniaun Europeia (UE) hodi komemora semana ba Alterasaun Klimátika nomós nu’udar antesipasaun hosi konferénsia klima Paris (Cop21), hodi asina akordu ambientál globál foun ida.

“Tempu udan hamenus bee, maibé intensidade udan ladun bot. Impaktu mai Timor-Leste maka: ladun iha bee no rai monu no problema ne’e hanesan de’it bainhira foho ida inklina”, dehan Sylvie Tabezze, embaixadór UE nina iha Dili.

“Foti medida hodi halakon ka minimiza impaktu hosi alterasaun klimátika maka urjente, liu-liu ba nasaun hirak ne’ebé vulnerável. Foti medida agora, salva osan no ema-nia moris”, hatutan tan.

Constâncio Pinto, ministru hosi Komérsiu, Indústria no Ambiente Timor-Leste dehan katak kombate alterasaun klimátika “hanesan preokupasaun ida” iha rai laran no sorumutu iha Paris sei nu’udar oportunidade ida hodi konsolida ajenda internasionál ne’e.  

"Timor-Leste, hanesan mos iha nasaun seluk, hahú sente ona impaktu ida ne’e. Haree impaktu ne’ebé mosu bainhira udan monu rai nomós kustu ne’ebé iha", dehan.

Husu kona-ba medida ne’ebé Governu sei foti hodi proteje ambiente, inklui hamoos lixu, hili fo’er iha mota-laran no kampaña informasaun, Cosntâncio Pinto haktuir hikas kona-ba “dezafiu bot hirak ne’ebé” nasaun ne’ebé enfrenta.

“Hanesan problema transversál ne’ebé presija parte hothotu ninia envolvimentu. Ami halo esforsu, inklui halo konferénsia hodi sensibiliza informasaun kona-ba kestaun ambientál no hahú ho halo sentru insinerasaun ba lixu, liu hosi investimentu dolár milloens 150”, tenik Pinto.

“Dezafiu ida ba governu Timór no ami sei esforsa-aan hodi rezolve no fó resposta ba dezafiu refere. Maibé ami ladun iha rekursu umanu nomós finansiamentu, tanba ne’e maka difikulta ami-ninia intervensaun iha área refere. Ami labele fó resposta ba buat hotu iha tempu ida de’it”, hatutan tan.

Sylvie Tabezze dehan tan katak molok fulan ida hala’o konferénsia Paris, ida ne’e hanesan “momentu importante ida”.

"Konferénsia Paris hanesan oportunidade istórika ida hodi aselera mudansa ba ekonomia globál ho emisaun karbonu ladun nomós proteje ambiente", dehan.

Kona-ba Timor-Leste, nia dehan katak tenke aproveita momentu, “atu labele baruk, maibé fó kontribuisaun hamutuk ho komunidade internasionál sira”, liu hosi esperiénsia ne’ebé sira iha kona-ba klimátika.

"Ha’u hein katak Timor-Leste bele submete ba ninia pozisaun COP21. Importante maka nasaun hothotu halo parte hodi kombate alterasaun klimátika. Akordu ida iha Paris hanesan oportunidade hodi hatudu katak ita hotu serbisu hamutuk hodi hatan ba dezafiu globál ida", dehan.

Timor-Leste ratifika ona iha 2006, Konvensaun Nasoens Unidas kona-ba Alterasaun Klimátika (UNFCCC) hodi adere ba faze daruak hosi Protokolu Quioto.

Iha tinan hirak ikus ne’e, Timor-Leste implementa inisiativa oioin iha kuadru ne’e, inklui projetu kiik hosi infraestrutura agríkola, reabilitasaun ba floresta, projetu hamoos bee nomós kampaña informasaun oioin no edukasaun kona-ba tema ambientál.

SAPO TL ho Lusa

Timor-Leste iha eleitór hamutuk 714.676, liu fali 3,9% hosi tinan 2014

Timor-Leste ne’ebé sei tenke tuir tan votasaun iha tinan rua oin mai, ba eleisaun lokál, lejislativa no prezidensiál, hamutuk eleitór 714.676 ne’ebé rejista ona to’o meadu agostu, no ida liu fali 3,9% iha tinan 2014, tuir dadus ofisiál ne’ebé iha. 

Komisaun Nasionál ba Eleisaun (CNE) ohin fó sai dadus kona-ba prosesu resensamentu ne’ebé halo desde 11-maiu to’o 11-agostu tinan ne’e, nomós konfirma kona-ba entrada eleitorál ne’ebé hamutuk eleitór liu 26.977.

Tuir dadus, iha Timor-Leste eleitór 3.185 maka ho idade 16, 356.572 ho tinan entre 17 to’o 35, 232.967 hosi 36 to’o 59 no 121.952 maka liu ona tinan 60.

Iha fulan agostu mane hamutuk 368.726 no feto 349.950 maka rejista iha kadernu eleitorál, hamutuk ho totál besik abitante milloens 1,17, tuir dadus preliminár hosi sensu ne’ebé fó sai iha semana ne’e.

Díli hanesan distritu ho eleitór barak (besik rihun 150), tuir maka Baucau (besik 81.600) no Ermera (71.654), maibé Manatuto ladun barak ho votante (29.137).

Nível hosi postu administrativa 61 iha rai-laran, ida ne’ebé ho númeru eleitór bot maka Dom Aleixo, iha Díli (60.172). Ida ne’ebé menus maka Soibada (Manatuto), ho 2.097.

SAPO TL ho Lusa 

ONU observa diskriminasaun ba feto sira iha Portugal ho Timor-Leste

Komité hosi Nasaun Unidu kona-bá Eliminasaun Diskriminasaun hasoru Feto sira (CEDAW) hasoru malu iha Jenebra hahú loron 26 fulan-Outubru hodi avalia Portugal no Timor-Leste, no mós nasaun sira seluk.

Tuir komunikadu ida hosi ONU, análize kona-bá Portugal sei hala'o iha loron 28 fulan-Outubru no Timor-Leste sei halo iha loron 11 fulan-Novembru. Konkluzaun no rekomendasaun sira sei foti no divulga iha finál sesaun nian.

Avaliasaun ikus ba Portugal no Timor-Leste nian hala'o ona iha tinan 2008 no 2009.

Komité sei hala'o reuniaun informál no públiku sira hodi halo audisaun ba reprezentante sira hosi organizasaun la'ós governu sira nian no hosi instituisaun nasionál sira ba direitu ema nian hosi nasaun nebe observadu. Reuniaun privadu sira karik sei hala'o hodi analiza prosesu sira reklamasaun sira no informasaun sira relasionadu ho violasaun todan hodi konvensaun.

Iha sesaun ba dala 62 hosi CEDAW, entre loron 26 fulan-Outubru no 11 fulan-Novembru, sei observa mós Emiradu Árabe Unidus, Eslovénia, Eslovákia, Líbanu, Libéria, Madagáskar, Malaui, Rúsia ho Uzbeskistaun.

Estadu sira nebe avaliadu aprezenta iha semana sira tuirmai nia relatóriu kona-bá implementasaun hosi Konvensaun kona-bá Eliminasaun hosi dalan sira ba Diskriminasaun hasoru Feto sira.

Komité ne'e iha membru na'in 23 nebe prezidi hosi advogada japuneza Yoko Hayashi.

Konvensaun kona-bá Eliminasaun hosi dalan sira ba Diskriminasaun hasoru Feto sira adopta ona iha tinan 1979, hahú hala'o iha 1981 no ohin loron iha Estadu hamutuk 189 maka asina konvensaun ne'e.

Bainhira ratifika Konvensaun, Estadu sira kompromete inklui iha nia Konstituisaun ka lejislasaun prinsípiu ba igualdade entre mane no feto sira no adopta medida lejislativu sira no medida seluk, inklui kastigu sira, hanesan objetivu hodi bandu diskriminasaun ruma hasoru feto sira.

SAPO TL ho Lusa - Foto: Fó hosi Meta Ikun & Norman Deus ba SAPO Timor-Leste (arkivu)

Komité Protesaun Jornalistas hatama profisionál rua ba komerka iha Indonézia

Komité Protesaun Jornalista, ho ninia sede iha Nova Iorke, ohin hatama ona ba komarka nomós halo julgamentu ba jornalista inglés na’in rua ne’ebé marina indonézia nian ka’er iha estreitu Malaka, fulan maiu liu ba, bainhira halo dokumentáriu kona-ba pirataria.

Jornalista, Rebecca Prosser ho Neil Bonner, "hela iha komarka no kontinua sai hanesan dadur iha prizaun provinsiál Batam", tuir organizasaun ne’e fó sai iha komunikadu.

Prosser ho Bonner, ne’ebé hetan ka’er tanba filma, laiha vistu jornalista nian, no sai nu’udar dadur desde maiu, kazu aprezenta ba tribunál indonézia iha finál setembru tanba akuza sira viola lei imigrasaun, no ho kazu refere bele halo sira tama komarka durante tinan lima.

Sei halo mos julgamentu ba indonézia-oan na’in sia krimi refere, ho kastigu komarka tinan rua no bele hetan mos multa euros rihun 600, tanba apoia halo dokumentáriu.

Horisehik, sira bá hikas tribunál no prokuradoria indonézia nia hatuun pena prizaun tinan lima no kada ema ida, sei selu multa ho rupiah milloens 50 (euros besik 3.400).

"Indonézia iha istória halo restrisaun vistu atu evita serbisu jornalista ne’ebé hakarak halo kobertura kona-ba notísia internasionál ne’ebé importante iha sira-ninia fronteira", dehan Bob Dietz, kordenadór hosi progama aziátika CPJ nian.

"Neil Bonner no Rebecca Prosser lahanesan kriminozu seluk no labele halo tratamentu ba sira ho maneira nune’e", hatutan.

Prosser ho Bonner serbisu ho produtora ingleza Wall to Wall no iha fulan maiu bá Indonézia hodi halo dokumentáriu ida ne’ebé hetan selu hosi National Geographic kona-ba pirataria iha estreitu Malaka, bseik Singapura.

Mariña indonézia ka’er jornalista hirak ne’e iha illa Balakang Padang, wainhira sira filma hela rekonstrusaun ida hosi atake pirata ba petroleiru ida.

Durante ka’er ema hirak ne’e, almirante indonézia Taufiqurrahman dehan katak saida maka grupu ne’e filam ba, “bele hafo’er imajen hosi estreitu Malaka nian, nu’udar zona krimi ida”.

Iha 2004, jornalista franseze Valentine Bourrat ho Thomas Dandois hetan ka’er tanba halo dokumentáriu ida ba kanál franko-aleman Arte kona-ba illa Papua.

Fen-laen ne’e, tama bá Indonézia ho vistu turista, hatama sira ba dadur fatin durante fulan rua ho balun no kondena sira ho prizaun hanesan ho sira ne’ebé agora hein hela prosesu julgamentu.

Kazu hanesan kria presedente ba pozisaun hosi autoridade indonézia nian, liu-liu ba jornalista estranjeiru iha nasaun laran.

SAPO TL ho Lusa 

Povu Konsidera Pensaun Vitalisia Hamete Dezemvolvimentu

USICAI - Povu iha area rural Konsidera pesaun Vitalisia neebe mak estadu Oferese ba Eis titulares no Eis Membru orgaun Soberanu, hamete dezemvolvimentu iha rai laran tamba povu barak mak sei moris iha terus no kiak nia mukit.

Tuir povu Usicai, Natalino Fereira Rekomenda ba prezidente Republika atu husu ba Parlamentu Nasional hodi altera lei pensaun vitalisia, kuandu sira hetan osan 50% se bele rai netik 25% ba povu neebe mak oras nee sei moris terus.

Ami povu neebe mak iha Area Rural hareik ba dezemvolvimentu, ami husu se bele fahe pensaun vitalisia balun hodi halo Dezemvolvimentu tamba Pensaun vitalasia hamete ita nia dezemvolvimentu,” dehan Natalino liu husi Sesaun Husu No hatan durante dialogu ho Prezidente Republika, Kinta (22/10/2015) iha suku Usicai, Postu Administrativu Zumalai.

Nia hatete Timor Leste atu halo dezemvolvimentu presiza osan, kuandu osan laiha susar atu halo dezemvolvimentu maibe osan neebe mak fo ba Eis Membru Orgaun Soberanu hanesan Eis Membru governu no Eis membru PN neebe la halo servisu maibe simu osan kompletu.

Iha suku  Debos Reprezentante Veteranus Julio Alves hatete membru orgaun Soberanu sira neebe asumi kargu tinan 5 hetan ona pensaun vitalisia, Pasaporte Diplomatiku, Importa Sasan konstruksaun Gratuita kompara ho veteranu sira neebe luta ba ukun Aan, oras nee moris susar la halimar.

Hatan nee Prezidente Republika Taur Matan Ruak hatete, orgaun Estadu hotu-hotu iha hanoin atu redus pensaun vitalisia tamba sidadaun hotu-hotu koalia komesa husi Povu too iha Prezidente Republika. Informasaun kompletu iha STL jornal no STL Web, edisaun Sesta (23/10/2015). Timotio Gusmao

Suara Timor Lorosae

Prevene Korupsaun Iha Funsaun Publiku, KAK-IGE Asina MOU

DILI - Atu prevene korupsaun iha funsaun publiku nia laran, Komisaun Anti Korupsaun (KAK), Provedor dos Diretus Humanus no Justisa (PDHJ), Inpesaun Geral do Estadu (IGE) ho Komisaun Funsaun Publika (KFP) asina Memorandum of Understanding (MoU).

Tuir Komisariu KAK Aderito Tilman hatete, asina MoU nee atu oinsa institiusaun hat nee fokus liu ba iha prevensaun tanba dala barak kazu sira neebe akontese iha ezersiziu fungsaun publiku nian. Dala ruma funsionariu publiku la hatene sira nia tarefa lolos nee halo saida, neemak hodi hamosu inisiativa halo Mou nee.

Buat sira nee maka ita hamosu inisiativa atu halo MoU entre instituisaun 4 nee para atu formasaun, kapasitasaun ba funsionariu publiku iha parte korupsaun ninian,” dehan nia ba jornalista iha iha salaun inkontru Ministeriu Solidaridade Sosial (MSS), Kinta (22/10/2015) Caicoli, Dili.

Komisariu KAK nee hatutan, ho kooperasaun entre instituisaun hat ba future sei divulga mos informasaun sira nee ba Munisipiu too postu Administrativu sira, liu-liu prioridade ba funsionariu publiku sira.

Liafuan hanesan hatoo mos husi Provedor Silveiro Pinto Baptista katak, asina MoU nee para bele iha formasaun no kapasitasaun ba funsionariu publiku sira, hodi prevene korrupsaun iha fungsaun publiku nian. Informasaun kompletu iha STL jornal no STL Web, edisaun Sesta (23/10/2015). Domingas Gomes

Suara Timor Lorosae

CCF Entrega Restus Mortais ba Familia, Lu-Olo: Saudozu Sira Halo Istoria Ho Faktus

DILI - Comite Central Fretilin (CCF), entrega restus mortais nain 3, hanesan Saudozu Afonso Albuquerque alias Ili-Lai, Antonio dos Santos alias Teixeira no Bernardino Inacio alias Bicis-Mau, ba Familia. Saudozu hirak nee mate, rai hela istoria ho faktus ba jerasaun.

Antes entrega restus mortais nain 3 nee ba familia, Prezidenti Partidu Fretilin Fransisco Guterres Lu-Olo, entrega bandera ba familia saudozu nain 3, hafoin Prezidente Partidu Fretilin ho nia membru sira hakruk hodi fo omenazen ikus ba saudozu nain 3 nee.

Iha biban nee Prezidenti Partidu Fretilin Fransisco Guterres Lu-Olo katak istoria sira nee ho faktus neebe ema moris halo, istoria mos hatutan ho faktus, hodi hatutan ba nafatin too rohan laek.

Neduni lia fuan ida maka hau hakarak soe hela ba ita boot sira nia leet, katak mai ita hamutuk hodi fo omenazen ikus ba ita nia saudozu nain tolu, neebe oras nee dadaun sira nia restus mortais iha dadaun uma fukun ida nee, sei Timor oan hahu ho liafuan ida deit, entaun hau bele dehan mate hotu-hotu mate hanesan, maibe mate balun mos la hanesan, katak husi faktus neebe maka hanesan ema moris halo, husik hela ninia istoria ida, hodi hatutan nia istoria nee ba oin nafatin,” hateten Lu-Olo, liu husi seremonia entrega restus mortais, neebe halao iha CCF, Dili, Kinta (22/10/2015).

Iha fatin hanesan Kaben husi Saudozu Bicis-Mau, Maria Olga Araujo hateten nia kaben ran fakar no mate duni ba rai ida nee, maibe ninia ruin hetan ona, husi CCF entrega ona ba sira familia.

Nune mos Veteranos Luis da Costa Feritas hateten restus mortais barak ona maka familia vitima sira rekoila, maibe barak mos seidauk, tamba nee sira kontinua servisu hamutuk ho governu hodi buka tuir restus mortais sira neebe seidauk hetan. Informasaun kompletu iha STL jornal no STL Web, edisaun Sesta (23/10/2015). Joao Anibal

Suara Timor Lorosae

Lu-Olo: Dezlutu Nasional Politika Governu Nia

DILI - Dezlutu Nasional nee politika governu, hodi fo omenazen no memoria ba saudozu no asuwain sira neebe mate, laos atu hapara hodi buka tuir restus mortais sira seluk.

Tuir Prezidenti Partidu Fretilin Lu-Olo katak governu foin dadauk realiza Deslutu Nasional ba Asuwain no saudozu sira hotu neebe maka mate. Maibe ema balun lamenta katak tamba saida maka ruin sira seidauk foti hotu, agora governu halo dezlutu nasional uluk, tamba nee husi Fretilin husu tenki presiza hatene saida maka dezlutu nasional nee.

Kuandu Mari Alkatiri, Xanana Gusmao inklui Governu dekreta deslutu nasional, laos dehan ruin sira nebee seidauk hetan la bele halot ona, nee lae, Dezlutu nasional nee hanesan politika Governu nia, maibe restus mortais nee kontinua rekolla nafatin no presta omenazen nafatin,” dehan Lu-Olo.

Antes nee Prezidente Republika Taur Matan Ruka deklara ba publika katak governu realiza dezlutu nasional, hanesan finsidu deit, tamba ruin barak maka seidauk halot sira realize uluk dezlutu nasional nee la tuir dalan.

Iha parte seluk Akademiku Alarico Gomes, hateten programa deslutu nasional nee intrese ukun nain sira nian, laos povu nian tanba halo deslutu nasional la konsulta ho povu nomos sosiadade sivil sira. Informasaun kompletu iha STL jornal no STL Web, edisaun Sesta (23/10/2015). Joao Anibal

Suara Timor Lorosae

Posibilidade Governu Sei Sosa Tan Kilat Hosi Indonésia

DILI – Governu Timor Leste iha posibilidade sei sosa tan arma military nian hanesan Kilat, kartus no seluk tan husi Indonesia liu husi PT Pindap.

Informasaun nee fo sai hosi Ministru Interior, Longuinhos Monteiro, ba jornalista sira iha Palacio Governu depois remata hasoru malu ho Primeiru Ministru, Rui Maria de Araujo, Kinta (22/10).

Iha posibilidade tanba depois ita sei diskute klean konaba asuntu ida nee tanba ita hare mos ba merkadu komun iha ita nia rejiaun no difrense entre presu no buat sira nee hotu sai hanesan indikador ida karik aban bairua iha akordu ruma depois mak ita hare,” hatete Longuinhos.

Nia hatutan iha enkontru hamutuk ho Primeiru Ministru nee mos marka prejensa hosi reprejentante PT Pindap hosi Indonesia, hodi halo diskusaun klean homos Ministru defeza no Interior hodi halo parseira iha futuru.

Iha fatin hanesan reprejentante PT Pindap hosi Indonesia, Wijayanto, hatete hosi PT Pindap mai atu aprejenta material siguransa nian (Kiltar? Neebe mak foun ba governu TL tanba siguransa TL nian mos uza ona kilat sira neebe mak produs hosi PT Pindap Indonesia. Informasaun kompletu iha STL jornal no STL Web, edisaun Sesta (23/10/2015). Thomas Sanches

Suara Timor Lorosae

Governu Kontinua Halo Poupansa ba OJE

DILI – Sestu Governu Konstitusional neebe mak lidera husi Primeiru Ministru Rui Maria de Araujo kontinua esforsu hosi halo poupansa ba Orsamentu Jeral do Estadu iha tinan 2016.

Poupansa governu halao nafatin liu-liu iha prosesu planeamentu izemplu orsamentu 2015 1.57 Billiaun no 2016 ita redus ba 1.45 Biliaun nee signifika ita redus mais ou menus 100 Miliaun dolar Amerika nee poupansa ida mak nee tanba ital abele gasta demais,” dehan Primeiru Ministru Rui Maria de Araujo ba jornbalista sira iha Palacio Governu liu husi pres konfres neebe mak halao iha kuarta (21/10).

Nia hatutan hanesan Xefe Governu nia simu kritika neebe mak mai hosi publiku konaba membru governu neebe halo viajen bebeik iha estranjeiru, maibe tuir nia viajen neebe mak membru governu halo durante nee kuandu laiha vantazen ba dezenvolvimentu TL nia aseita ho kritika sira nee, maibe kuandu lori benefisiu mai TL husu ba hotu-hotu atu kumprende.

Iha fatin ketak tuir Akademiku, Armando da Costa, hatete hakarak ka lakohi tenke halo poupansa, tanba reseitas Timor Leste nian neebe mai hosi Mina oras ee daduan tun makas tanba impaktu husi folin mina mos tun. Informasaun kompletu iha STL jornal no STL Web, edisaun Sesta (23/10/2015). Thomas Sanches

Suara Timor Lorosae

Lee mos SUARA TIMOR LOROSAE