Julgamentu Ba Kazu Krime Grave Paradu

Provedor dos Direitus Humanus e Justisa (PDHJ), Silverio Pinto, hateten desde juises internasional haruka fila, julgamentu ba kazu krimi grave paradu to’o agora, maibe governu laiha esforsu seriu atu tau matan ba asuntu ne’e.

Estadu bele koalia kona ba rekonsiliasaun, maibe nia dehan, tenke iha justisa ne’ebe justu liu-liu ba vitima sira, tanba iha tinan 1999 ema barak mak lakon sira nia familia, riku soin no seluk-seluk tan.

“Vitima iha direitu atu hatene kona ba nia andamentu no prosesu keixa ne’ebe mak to’o ona iha tribunal, liu-liu ba kazu sira ne’ebe mak akontese iha 1999,” Provedor Pinto hateten, iha Dili.

Tuir lolos, kazu krimi grave sira ne’ebe akontese iha 1999 bele liu husi prosesu julgamentu iha tribunal internasional, maibe nia dehan, durante ne’e estadu nunka halo ida ne’e tanba iha interese politika entre rai rua (Indonezia no Timor-Leste).

“Agora ita haree visa on arrival laiha, free visa wainhira liu husi fronteira, border pass, merkadu fronteira, estudante ho vistu estudante, e ne’e hanesan politika atu haluha hotu kestaun pasadu,” nia hateten.

Maibe, nia dehan, hakarak ga lakoi governu tenke esforsu bolu hikas juis internasional sira mai atu prosesu julgamentu ba kazu krimi grave bele funsiona fali.

Iha parte seluk Diretor Ezekutivu Judicial System Monitoring Program (JSMP), Luis Oliveria Sampaio, hateten julgamentu ba kazu krimi grave tuir lei tenke kompostu husi juis internasional nain rua no juis timor oan nain ida, e durante ne’e paradu tanba juis internasional laiha.

Maibe, nia dehan, sei juis internasional kontinua laiha, Parlamentu Nasional bele halo revisaun ba lei refere atu fo kompentensia ba juis timor oan hodi dirije julgamentu ba kazu krimi grave sira ne’ebe akontese iha 1999.

“Dalan ba tribunal internasional laiha ona, tanba konselho membru sira ne’e mos iha interese ho nasaun Indonezia, tanba ne’e parlamentu nasional bele foti dalan alternative seluk hodi muda lei ne’e,” Diretor JSMP Sampaio sujere.

Nia deskonfia,  katak Parlamentu no governu mos laiha ona interese atu haree ba kazu ne’e, tanba govenu iha komitmentu inisiu katak haluha pasadu no haree ba future, tanba ne’e sira uza dalan rekonsiliasaun deit.

“Lolos, sira tenke haree katak familia ne’ebe sira nia kazu tama ona iha ministeiru publiku hein hela rezultadu,” nia dehan.

Iha parte seluk Membru Parlamentu Nasional, Deputadu Jorge Teme, hateten parlamentu iha duni komitmentu ba asuntu ne’e, maibe iha asuntu seluk mak importante liu atu resolve.

“Ita iha lei barak mak importante tebes atu haree, hanesan lei rai nian, lei anti korupsaun, lei pensaun vitalisia no seluk-seluk tan,” nia dehan. 

Kona ba kazu krimi grave, nia dehan,  ba oin “ita sei haree oinsa mak bele buka dalan diak ida,” Teme hateten.

The Dili Weekly

Koruptor Sei La Hetan Indultu

Membru Parlamentu Nasional konsege aprova ona lei numeru 30/III/III kona ba prosedementu indultu hodi limita kompetensia Prezidente Republika Demokratika de Timor-Leste (RDTL), atu labele fo indultu ba koruptor sira.

Tuir Vise Presidente Komisaun A (constitucionais, justisa, administracao publika, poder local, a anti korupsaun) Arao Noe, dehan durante ne’e prezidente uza duni kompetensia fo indultu, maibe laiha lei ida mak define see loos mak merese atu hetan indultu.

“Iha artigu terseiru alinea A iha lei ne’e, hatuur katak ema sira ne’ebe mak komete krimi korupsaun, trafiku humanu, droga, no krimi kontra estadu, ne’e labele hetan indultu,” Deputadu Noe esplika, iha Parlamentu Nasional.

Mesmu kriminozu sira ne’e hatudu komportamentu diak durante iha prizaun, maibe nia dehan,  labele  hetan indultu e ida ne’e la viola direitus humanu.

Nia dehan, lei ne’e hanesan baze legal ba xefe estadu bainhira atu fo indultu ba prizioneiru sira tenke bazea ba proposta governu, proposta governu mos labele mensiona naran husi prizioneiru ne’ebe komete krimi hirak ne’e.

“Sira tenke kumpri prizaun ne’e kompleto, ne’e ita la viola direitus humanu,” nia hateten.

Iha parte seluk Membru Parlamentu Nasional, Deputadu Osorio Florindo, konkorda tanba atu minimize korupsaun tenke implementa duni asaun hirak hanesan ne’e.

“Korupsaun ne’e attitude ne’ebe ladiak, ita tenke halo hanesan ne’e hodi fo hanoin ba sira ne’ebe kaer kargu xefia sira ne’e tenke kuidadu aan no tauk atu labele involve iha aktu korupsaun ne’e,” nia hateten.

Nia dehan, lei ne’e halo hanesan parte ida hosi prevensaun ba aktu korupsaun labele buras iha tempu future mai.

“Diak liu ita prevene agora, la’os grave ona mak ita foin buka dalan atu prevene, ne’e ladun diak,” nia dehan.

Iha fatin seluk komunidade Caetano Carvalho, apresia ho kriasaun lei ida ne’e, koruptor labele hetan indultu tanba hahalok ne’ebe sira halo ne’e hamoe estadu no halo povu terus.

“Povu ne’ebe kiak, kiak ba bebeik,” nia dehan.

The Dili Weekly

TIMOR LESTE HO AUSTRALIA HEIN KONSILIADOR ONU

DILI - Primeiru Ministru (PM) Rui Maria de Araújo hatete, Timor Leste ho Austrália prepara hotu ona ida-idak nia konsiliador, agora hein de’it Organizasaun Nasoes Unidas (ONU) hili tan konsiliador independente ida atu tu’ur hamutuk hodi deskute ona fronteira marítima tuir direitu internasional UNCLOS ninian.

“Karta konsiliasaun kompulsoria ne’ebé mak Timor Leste aprezenta ba Organizasaun Nasaoes Unidas (ONU) agora Austrália responde ona, ne’ebé konsiliador hosi Austrália no Timor Leste iha ona, hein hela ONU hili tan nia konsiliador na’in  ida hamutuk sira na’in  lima tu’ur hamutuk hodi haré  ba prosesu ne’e,” haktuir PM Rui ba jornalista iha Palásiu Governu, Kuarta, (11/05).

Tuir PM Rui, parte rua agora sei tuir hela prosesu, ne’ebé iha prosesu ne’e iha prazu balu mak Timor Leste tenke kumpri.

Austrália responde ona karta ne’ebé mak Timor Leste hato’o ba ONU, ne’ebé parte rua entre Timor Leste ho Austrália hili ona konsiliador na’in  rua.

Konsiliador na’in  rua hosi parte Austrália ninian no konsiliador na’in  rua hosi parte Timor Leste ninian.

Ne’ebé sei hein hela Organizasaun Nasoes Unidas (ONU) sei hili tan konsiliador na’in  ida atu nune’e sira na’in  5  tu’ur hamutuk hodi haré  prosesu ba oin la’o  oinsá.

Ne’ebé parte ida-idak entre Timor Leste no Austrália agora prepara hela sira nia argumentu juridiku legal ho baze ba direitu internasional ne’ebé mak iha.

Ne’ebé prosesu sira agora dau-daun la’o  hela hodi prepara argumentu sira, ne’ebé konsiliador maske hili ona, maibé tuir prosedimentu tuir direitu internasional, ne’e segredu justisa, tanba ne’e labele ko’alia  sai konsiliador sira nia naran.

“Ha’u labele fo sai konsiliador na’in  rua ne’ebé mak governu Timor Leste hili tantu ema Timor oan no ema hosi rai liur,” haktuir PM Rui.(gus)

Timor Post

Estadu tenke halo "buat hotu" hodi hetan kapitál maioria iha Timor Telecom

Estadu Timór tenke “halo buat hotu” atu nune’e bele hetan maioria kapitál ba Timor Telecom, no garante seguransa komunikasaun Estadu nian, tuir saida maka visi-ministru Obras Públikas, Transporte no Komunikasaun Inácio Morreira dehan ba Lusa. 

"Estadu Timór tenke halo buat hotu hodi sosa kapitál Oi nian iha Timor Telecom (TT)", tenik Inácio Moreira.

"Hanesan timor-oan nomós membru Governu ne’e nian, ha’u sei lahusik atu TT monu ba empreza kualkér ne’ebé halo operasaun iha ne’e, ninia liman, maibé Estadu maka tenke sosa duni, atu nune’e bele kontrola nomós jere empreza refere", dehan.

Governu halo hela negosiasaun ho Oi kona-ba folin, hodi sosa pozisaun hosi empreza bot ba operadora telekomunikasaun iha Timor-Leste.

"Ami ko’alia ona kona-ba negósiu no bainhira ko’alia kona-ba negósiu maka tenke ko’alia mos kona-ba kestaun ekonómika. Maibé ba Estadu, importante liu hosi kestaun, no fundamentál liu maka seguransa komunikasaun Estadu nian. Ha’u hein katak kolega sira seluk mos komprende ho kestaun ne’e”, dehan.

Inácio Morreira defende atu Estadu tenke sosa parte Oi nian, atu nune’e Estadu maka ho maioria kapitál iha TT, 50% no husik restu ba asionista ka ba investidór sira seluk.

"Ami hein katak iha fulan juñu, bele iha ona desizaun ikus", nia hatutan. Fatia bot hosi kapitál TT (54,01%), kontrola hosi sosiedade Telekomunikasaun Públika Timór (TPT), no Oi mos kontrola 76% hosi kapitál ne’ebé iha, soma ba partisipasaun direta PT Participações SGPS 3,05%.

Prosesu kona-ba desizaun Governu hodi sosa ka la’e partisipasaun Oi nian, hala'o tinan ida ona, liu hosi debate ne’ebé hala’o iha duni Konsellu Ministru nia-laran nomós iha reuniaun sira seluk.

"Ha’u-nia kolega balun nomós asesór internasionál balun hato’o argumentu katak análize ekonómika sei lafó benefísiu", esplika Moreira.

"Sira fó argumentu ba Estadu Timór katak sei lafó benefísiu, maibé depois sira rekomenda atu faan fali ba empreza estranjeiru, tanba merkadu timor-oan nian viável. Ninia lójika maka ne’ebé? Ha’u bele konsidera katak análize ne’e halo ho interese seluk no ami sei latolera ida ne’e", nia insisti.

Alénde ne’e, iha mos “prova” ne’ebé hatudu katak hosi operadór tolu ne’ebé hala’o operasaun iha Timor-Leste, “Timor Telecom maka ninia liña internet nomos liña servisu seluk, di’ak liu”.

Inácio Moreira hatene katak problema ida mos hosi análize debate ne’e maka frajilidade hosi reguladór rasik, Autoridade Nasionál Telekomunikasaun (ANT), ne’ebé ladun efikas ba kontrolu iregularidade operadór nian, liu-liu ba vietnamita Telemor.

"Ami rekoñese katak ezisti lakuna iha reguladór no ami tenke koriji. Ami tenke hametin ami-ninia rekursu umanu, hodi kontrola di’ak liu tan kestaun refere. Hanesan ezemplu, labele faan kartaun SIM livremente no lahalo rejistu", nia dehan.

Dalabarak halo ona diskusaun iha Konsellu Ministru kona-ba asuntu refere, hodi Governu mos kria ekipa dahuluk hodi analiza viabilidade ekonómika no téknika, inklui hahú halo negosiasaun ho Oi.

Iha kazu rua, komisaun serbisu ne’ebé envolve reprezentante hosi Ministériu Obras Públikas, Transporte no Komunikasaun (MOPTC) ho Finansas, simu sujestaun atu ba mos gabinete seluk, inklui hosi ministru Estadu Kordenadór ba Asuntu Ekonómika (MECAE).

Iha diferensa oioin, maibé Inácio Moreira hein katak solusaun hodi sosa ne’e, bele debate hikas iha Konsellu Ministru, “durante fulan juñu”.

"Ami halo debate maka’as hanesan baibain, sempre iha argumentu pró no kontra, maibé razaun fundamentál sira maka Governu desidi ona atu kria ekipa ida hodi hahú halo negosiasaun kona-ba folin Timor Telecom nian ne’ebé Oi hakarak faan", nia dehan.

"Ami halo hela negósiu hodi sosa partisipasaun Oi nian. No hein katak, iha tempu badak ami konsege hetan ninia disezaun ikus", nia esplika.

Inácio Moreira kestiona kona-ba argumentu balun ne’ebé hato’o iha pareser hirak ne’ebé kontesta ho operasaun ne’e, inklui asesór internasionál hirak ne’ebé defende katak “laviável ba Estadu”, maibé bele “viável ba operadór estranjeiru ida”.

Tuir análize ne’ebé mos Lusa hetan asesu ba, prepara ona iha fulan abril-2016 hosi Sam Porter, asesór MECAE nian ne’ebé konsidera katak “laiha razaun finanseira ka ekonómika konvinsete ida ba Governu hodi sosa asaun adisionál”.

Tanba ne’e maka tuir testu ne’ebé iha haktuir katak reseita hosi utilizadór serbisu telekomunikasaun nian iha Timor-Leste “lakiik liu hosi Ásia" tanba Timór “hanesan merkadu ida ne’ebé atrai investidór sira ba setór telekomunikasaun nian”.

Análize ne’e defende katak Estadu tenke investe ba iha ligasaun fibra ótika submarina no ba infraestrutura seluk, estaestrutura tanba Estadu ladauk iha téknika naton hodi jere empreza refere no konsidera katak partisipasaun públika sei kria konfuzaun entre papel “reguladór ho operadór”.

SAPO TL ho Lusa – Foto: Portugal Telekom

Makau hahú iha ohin selebra sentenáriu aparisaun

Sentenáriu aparisaun Fátima nian hahú ohin komemora iha Makau, ho imajen peregrina Nossa Senhora ba vizita igreja 12 iha sidade durante  tinan ida nia-laran.

Ohin  realiza serimónia hbituál loron 13 maiu nian, inklui  peregrinasaun iha Igreja São Domingos to’o ba Igreja Penha, ho rozáriu ne’ebé reza iha lian tolu, xinés, portugés no inglés.

Tamba ne’e, iha selebrasaun sentenáriu ne’e, komemorasaun hala’o, ho imajen Nossa Senhora Fátima nian ne’ebé  hale’u, durante tinan ida, ba parókia sira iha Makau, inklui igreja 12, sei hela fulan ida kada Igreja , haktuir  ba Lusa Maria Guilhermina, hosi kongregasaun mariana.

Igreja São Domingos sei simu imajen iha fulan dahuluk, ho resitasaun no meditasaun ho tersu iha portugés no xinés loro-loron no igreja ne’e, lokaliza iha  Largo Senadu, prasa prinsipál Makau nian, ne’ebé sei fila iha loron 13 maiu 2017.

SAPO TL ho Lusa – Foto: F. C. Rocha

Papa hakarak kria komisaun kona-ba abertura diakonadu ba feto

Papa Francisco anunsia iha horisehik ninia intensaun atu kriar komissaun ida hodi estuda possibilidade ba feto sira asesu ba diakonadu, bele substitui padre sira iha sakramentu balun, hanesan batizmu.

Iha  relijiozu atus resin nia oin, papa responde ba ida ne’ebé husu pergunta  karik laós iha altura ne’ebá kria ona komisaun ida atu estuda kestaun ne’e, tuir ajénsia noticiosas italiana.

"Ha’u hanoin loos, Igreja halo di’ak atu esklarese pontu ida ne’e. ha’u konkorda. Ko’alia atu  halo buat ruma iha  jéneru ne’e", deklara Jorge Bergoglio, kestiona hosi  relijiozu ida kona-ba possibilidade atu kria komisaun ida hodi estuda possibilidade atu  loke diakonadu ba feto sira, tuir ajénsia noticiosas italiana.

Francisco koa’lia ba  superiora jerál sira besik 900  hosi  institutu no kongregasaun relijioza oioin, durante enkontru ne’ebé realiza iha Vaticano.

Kestiona hosi ajénsia noticiosas France Presse, porta-vós Vaticano nian, padre Federico Lombardi, rekuza atu konfirma informasaun ne’e no hatete katak hein deit esklaresimentu hosi deklarasaun papa nian.

Iha Igreja Katólika, diákonu sira bele  selebra batizmu, kazamentu no funerál. Padre sira deit maka bele selebra missa ka fó konfesa ba sarani sira.

Diakonadu sai hanesan etapa dahuluk ba saserdote, maibé Concílio Vaticano II estabelese fali ona diakonadu permanente, asessível ba mane kaben-na’in sira, ne’ebé asume funsaun balun  bainhira laiha padre ka nia  asistente sira.

Papa Francisco hato’o ona, iha okaziaun oioin, ninia vontade atu rezolve  desigualdade ne’ebé agora ezistente entre mane no  feto sira iha  Igreja, maibé to’o agora foti ona medidas balun ne’ebé  konkreta.

Foin lalais, papa afirma possíbilidade kiik liu atu feto sira asesu ba saserdote, no haktuir katak  ninia antesessór, liliu João Paulo II, ezamina aprofunda liu proposta ne’e molok fó  respota negativa.

SAPO TL ho Lusa – Foto: EPA@ Patrick Semansky

Setor Privadu Labele Buka Riku

DILI - Setor Privadu iha rai laran labele buka riku, maibe buka atu hakas aan hodi dezenvolve ekonomia rai laran ho diak, maske kapasidade seidauk masimu, atu halo kompetisaun ho Kompania Internasional sira.

Tuir Prezidente CCI-TL Oscar Lima katak, kapasidade setor privadu rai laran seidauk too atu halo kompetisaun ho ema husi rai liur, tamba setor privadu balun foin kaer prozetu ida rua hakarak hola kareta barak hodi buka riku, no susar atu kompete ho ema rai liur, tan nee husu ba setor privadu labele buka riku, maibe buka atu esforsu aan.

Hau hanoin ami labele halo kompetisaun tamba ema estranjeiru sira nee hamrik kleur ona, no sira iha osan barak no kapasidade masimu atu jere osan, laos hanesan Timor oan foin manan prozetu deit hola ona kareta didiak sira nee,” informa Oscar ba STL, Kinta (12/05/2016) iha nia knar fatin.

Nia informa liu tan katak, seitor privadu rai laran atu halo kompetisaun ho Estranjeiru sira maka Governu tenke kria kondisaun, prepara Maun de obra Kualifikadu, fo treinamentu barak ba seitor privadu rai laran, atu oinsa bele halo jestaun diak.

Iha parte seluk Reprezentante povu iha uma fukun Parlamentu Nasional (PN) Deputadu Paulino Monteiro hatutan, hare ba kapasidade no kuinesementu setor privadu sira, seidauk bele atu kompete ho ema liur, tamba rekursu umanus neebe maka limitadu no kapasidade setor privadu sira mos minimu tebes.

Nunee mos Prezidente Komisaun E, neebe trata asuntu Infrastrutura Pedro da Costa hateten, hare ba rekursu Umanus iha rai laran limitadu tebes, tamba nee Governu tenke kapasita setor privadu sira, oinsa atu jere osan ho diak, no kaer obra neebe maka ho kualidade. Informasaun kompletu iha STL Jornal no STL Web, edisaun Sesta (13/5/2016). Madalena Horta

Suara Timor Lorosae

Governu Seidauk Transfere Osan Ba Bankaria BNCTL

DILI - Governu seidauk transfere osan 5 Milloens ba Bankaria BNCTL, osan nee Governu aloka ba Banku atu fo kreditu ba Setor privadu sira hodi asesu ba kreditu.

Prezidente Banku Nasional Comersiu Timor Leste (BNCTL), Brigido de Sousa hateten, Osan 5 Milloens neebe maka Governu aloka ba iha Banku BNCTL, atu fo kreditu ba Seitor privadu iha rai laran, maibe too agora seidauk tama iha Konta capital BNCTL.

Hau hanoin ami sei hasoru hela dezafius konaba fo kreditu, maibe ida nee laos obstaklu ba ita atu labele fo kreditu, tan nee BNCTL nafatin fo kreditu ba Seitor privadu sira nomos Negosiu kiik sira nee, atu nnee bele atrai diak liu tan seitor privadu sira, nomos grupu koperativa kiik sira nee, oinsa atu buka osan,” dehan Brigido, ba STL Segunda (09/05/2016) iha Hotel Timor.

Nia informa liu tan katak, BNCTL nafatin apoiu seitor privadu atu nunee sira bele investe iha prozetu sira nee, ho nunee prozetu sira iha rai laran labele fo ba ema Rai liur maka kaer, no Timor oan sai fali penonton, tan nee BNCTL nafatin apoiu seitor privadu sira.

Iha parte seluk Prezidente Camra Comersiu Industria Timor Leste (CCI-TL), Oscar Lima mos informa katak, Governu tau ona osan 5 Milloens iha Banku BNCTL, atu fo kreditu ba setor privadu sira, maibe jurus neebe maka Banku fo nee boot tebes 8%. Informasaun kompletu iha STL Jornal no STL Web, edisaun Sesta (13/5/2016). Madalena Horta

Suara Timor Lorosae

Redus Dependensia Populasaun Ba Ai Maran, UNDP, GEF No Governu Hamosu Maneira Alternativa

Dili, Radio Liberdade Online_Atu redus toman komunidade ba utilija ai maran ba tein, UNDP, GEF parseiru ho Governu organija Work Shop Nasional ho thema “Prespektivas no Dejasfiu Ba Promove Fugaun Tein Iha Timor Leste”, iha Hotel Timor iha loron 12/5/2016.

Gil da Costa Naldo Rei, Assitente Direitur UNDP, isplika objective work shop katak “UNDP bolu ema ne’ebe halo Cook Stoves-fugaun para hatene ahi suar ne’e barak to’o iha ne’ebe, oinsa hamenus ahi suar ne’e, uja ai ituan, tein ho diak e depois kona ba saude mos.”

Iha Fatin Hanesan, Joao Carlos Soares, Direitur Jeral Meiu Ambiente, isplika prespektiva husi work shop ne’e katak “oinsa atu minimija ka troka abitua populasaun dependensia ba ai maran makas no enerjia renovavel, ba utilija ai ituan liu ka uja enerjia ramah lingkungan.”

Direitur Fundasaun Haburas, Virgilio Guterres ne’ebe partisipa mos iha work shop ne’e haktuir Fundasaun Haburas hanesan organijasaun ne’ebe foka ba meiu ambiente nia esforsu hamosu inisiativa ruma ba redusaun ujus ba reflorestasaun hanesan tesi ai tamba kontribui ba degredasaun ambiente, informa.

Rádio Liberdade Dili

Timor-Leste disponível hodi hanaruk prezidénsia CPLP bainhira Brazil la marka simeira

Timor-Leste disponível hodi kontinua prezidi CPLP bainhira Brazil tenki adia simeira hosi xefe sira Estadu no Governu nian ne'ebé previstu ba fulan-Jullu no ne'ebé Díli sei pasa sasin ba Brazília.

Fonte hosi prezidénsia timoroan hosi CPLP hatete ba Lusa katak, to'o agora, Díli la simu komunikasaun ruma hosi Brazil kona-bá realizasaun hosi simeira Komunidade Nasaun sira Lian Portugés (CPLP) nian.

"Timor-Leste disponível hodi kontinua asumi prezidénsia rotativu [CPLP nian]", hatete hosi fonte hanesan iha Díli.

Bainhira Brazil la halo simeira iha fulan-Jullu, hanesan ida ne'ebé maka previstu no tanba iha enkontru ne'e maka sei transfere prezidénsia, Timor-Leste sei mantén nafatin prezidénsia rotativu to'o realiza enkontru ne'e.

Simeira hosi Brazília marka tinan 20 hosi organizasaun no koinside ho mudansa ba sekretáriu-ezekutivu CPLP nian.

Iha inísiu fulan ne'e, sekretáriu-ezekutivu hosi Komunidade Nasaun sira Lian Portugés nian (CPLP) senti "preokupadu" ho Brazil tanba seidauk marka loron ba simeira.

"Ami fahe ona ami nia preokupasaun sira tanba preparativu sira ba simeira seidauk hahú ida tanba ami seidauk iha indikativu ba loron simeira nian, no hanesan importante atu marka loron hodi ami hahú prosesu preparasaun nian", Murade Murargy, iha deklarasaun sira ba Lusa.

"Situasaun iha Brazil halo ami preokupa tanba seidauk iha klima ida hakmatek nian hodi nune'e bele tuur hamutuk no hanoin iha simeira; Governu ho Prezidénsia sei preokupadu ho situasaun internu, maibé iha ami nia fatin ami hein atu Brazil hato'o informasaun kona-bá loron sira ne'ebé bele hala'o simeira", hatutan hosi sekretáriu-ezekutivu CPLP nian.

Krizi polítiku no ekonómiku iha Brazil hanesan problema ida ne'ebé afeta nasaun oioin hosi organizasaun ne'e, ho destake ba diminuisaun ekonómiku iha Guiné Ekuatorial, pedidu ajuda esternu hosi Angola ba Fundu Monetáriu Internasional no krizi hosi tusan iha Mosambike.

Bainhira hatán kona-bá problema internu hosi nasaun ida-idak bele kontribui ba afastamentu hosi envolvimentu CPLP nian, Murargy rejeita posibilidade ne'e hodi esplika katak tenki akontese oin-seluk.

"Situasaun susar ne'ebé ita nia nasaun sira hasoru la hamenus importánsia ruma ne'ebé CPLP reprezenta ba ita nia nasaun sira, sira afirma nafatin interese ba organizasaun, ne'ebé hanesan organizasaun ida ho folin no afetu sira no ema hotu iha empeñu", hatete hosi responsável.

"CPLP bele tulun kombina no ko'alia kona-bá situasaun sira, kona-bá oinsá ita bele sai hosi melakonlia ne'ebé ita hasoru, ho amizade no fraternidade ne'ebé hanesan ita nia karakterístiku", nia hakotu.

Iha semana hirak tuirmai Díli sei simu maratona ida reuniaun setór sira ne'ebé hodi hakotu final hosi prezidénsia timoroan nian iha CPLP.

SAPO TL ho Lusa

Demokrasia bele hamosu atrazu iha adezaun Timor-Leste nian ba ASEAN - akadémiku

Defeza ba demokrasia no direitu ema sira nian hosi Timor-Leste bele sai hanesan problema prinsipal ida ba adezaun hosi nasaun ne'e iha ASEAN, haktuir hosi akadémiku ida ne'ebé iha ligasaun ba universidade ida hosi Hong Kong.

Cristian Talesco sujere, iha artigu ida ne'ebé fó sai iha edisaun foun hosi Foreign Policy, katak nasaun oioin hosi Asosiasaun hosi Nasaun sira Sudeste Aziátiku (ASEAN) nian ladún konkorda ho pozisaun hosi Timor-Leste, nasaun ida ho rejimi demokrátiku ne'ebé koñesidu iha nível internasional.

Ba autor, ne'ebé sei kompleta nia doutoramentu iha Dezenvolvimentu Sosial iha Universidade Politékniku Hong Kong nian, katak Estadu membru sira balun hosi ASEAN, liuliu Laos ho Singapura, la apoia adezaun Timor-Leste nian tanba nasaun ne'e hanesan "defensór maka'as ba demokrasia no direitu ema sira nian".

Iha artigu, ho títulu "Oinsá demokrasia hosi Timor-Leste halo nasaun sai hanesan intokável", Talesco konsidera katak, iha Sudeste Aziátiku "sai hanesan demokrátiku bele halo lakon belun sira".

Liutiha tinan lima hafoin pedidu adezaun hosi Timor-Leste ba ASEAN, autór rejeita ona argumentu sira ne'ebé hatete katak dezenvolvimentu ekonómiku ne'ebé ki'ik hosi nasaun maka halo atrazu ba "sim" hosi parte asosiasaun nian.

Nia argumenta katak tanba deklarasaun hosi fundasaun ASEAN nian halo hanesan kondisaun úniku hosi adezaun ba nasaun ida ne'ebé tenki lokalizadu tuir jeografia iha sudeste aziátiku, halo prosesu sai susar tanba de'it adenda tinan 2007 ne'ebé husu konsensu entre membru atuál sira ba adezaun hosi nasaun foun sira.

Díli iha ona apoiu hosi nasaun sira hanesan Indonézia maibé mosu opozisaun sira hosi nasaun balun hanesan Singapura no Laos ne'ebé, tuir dalan formal, halimar ba dezenvolvimentu ekonómiku ki'ik Timor-Leste nian tanba hanesan obrigasaun sira hosi membru sira ASEAN nian.

"Deskulpa ida ho simplisidade oituan", Talesco hatete, ne'ebé refere katak bainhira Kamboja, Laos, Birmánia no Vietname tama iha ASEAN iha tinan 90 hosi sékulu liubá "nia dezenvolvimentu ekonómiku ki'ik la uza hodi atraza adezaun".

"Aleinde ne'e Timor-Leste nia "ranking" iha Índise hosi Dezenvolvimentu Ema nian aas liu duké Kamboja, Laos ka Birmánia no, iha parte rendimentu "tuir kapita", Timor-Leste halakon membru haat atual ASEAN nian: Kamboja, Laos, Birmánia ho Vietnam", nia hatutan.

Ba Talesco, kestaun ne'e konsentra ba Timor-Leste hanesan demokrasia multipartidáriu ida, ho istória ida hosi eleisaun livre sira, mekanizmu oioin hosi protesaun ba direitu ema nian, sosiedade sivil ida ativu ne'ebé "promove direitu ema sira nian iha uma no iha liur", no fatór sira seluk.

Iha Índise hosi Demokrasia nian hosi The Economist Intelligence Unit, Timor-Leste iha nível aas liu duké membru sira seluk hosi ASEAN - eseptu Brunei ne'ebé la mosu iha "rangking" - no nasaun tolu (Tailándia, Kamboja ho Birmánia) konsidera hanesan rejimi "híbridu" (ho "aspetu demokrátiku no autoritáriu sira) no autoritáriu rua (Vietnam ho Laos).

"Komportamentu demokrátiku hosi Timor-Leste tenki sai hanesan vantajen ida ba nia kandidatura", maibé tanba ASEAN hanesan organizasaun ida ne'ebé "bazeia iha konsensu sira no respeitu ba soberania hosi Estadu membru sira nian" implika atu "liafuan furak sira kona-bá demokrasia no direitu sira ema nian kontinua apertadu hosi prinsípiu aziátiku no la interferénsia nian", Talesco hatete.

Autór sustenta katak ne'e la'ós rekoñesidu beibeik hosi Timor-Leste, katak iha ASEAN fa'an nia kredensiál demokrátiku sira, buat ne'ebé hanesan "problemátiku" ba adezaun ne'e.

"Promosaun ruma hosi demokrasia no direitu ema sira nian iha ASEAN bele halo fraku "status quo" konfortável hosi sira nia membru ne'ebé ladún demokrátiku", nia hatete.

Timor-Leste labele husik nia prinsípiu sira no nasaun "hanesan possível membru ida ne'ebé ASEAN labele lakon", nia hatutan mós.

SAPO TL ho Lusa

Parlamentu portugés konvida embaixadór timoroan iha CPLP atu esklarese eleisaun iha Giné Ekuatoriál

Komisaun Negósiu Estranjeiru parlamentu portugés nian sei konvida embaixadór timoroan iha CPLP hodi fó esklaresimentu kona-ba eleisaun prezidensiál iha Giné Ekuatoriál, nu’udar proposta PSD ne’ebé hakarak hatene karik organizasaun ne’e limita iha nia misaun observasaun nian. 

"Util no oportunu ita akompaña eleisaun prezidensiál iha Giné Ekuatoriál", nasaun ne’ebé kompromete ho "diskretu kronograma reforma polítika", iha kuadru nia adezaun ba Komunidade Nasaun Lia-portugés (CPLP), iha jullu 2014, hatete ohin deputadu Paulo Neves (PSD), iha reuniaun komisaun parlamentár Negósiu Estranjeiru no Komunidades Portugeza nian.

Organizasaun ne’e haruka misaun observasaun nian ida, xefia hosi timoroan Antonino de Araújo, entre loron 22 no 26 abril, ba eleisaun prezidensiaál iha Giné Ekuatoriál, ne’ebé hala’o iha loron 24, iha ne’ebé Prezidente, Teodoro Obiang Nguema, iha podér tinan 37 ona, reeleitu ba mandatu tinan hitu.

CPLP "haruka konjuntu diplomata sira, ne’ebé hetan de’it permisaun atu to’o iha véspera atu eleitorál no la’ós durante kampaña, hanesan sira rasik hakarak", afirma Paulo Neves, iha diskusaun kona-ba rekerimentu ba audisaun xefe misaun nian, embaixadór Timor-Leste iha CPLP, Antonino de Araújo.

Deputadu sosiál-demokrata refere katak observadór sira "la hetan lisensa hodi akompaña kampaña eleitorál, maybe sira akompaña loron eleisaun no loron rua tuir malu ".

Iha komunikadu ne’ebé fó sai loron rua hafoin eleisaun, observadór sira CPLP nian konsidera katak eleisaun la’o ho "di’ak no dame" no rejista predominánsia element hosi partidu ne’ebé iha podér.

Tuir CPLP, asaun ekipa nian "depende ba to’o tarde iha nasaun, buat ne’ebé lapermite atu akompaña siklu eleitorál, liu-liu períodu kampaña, nein asegura kobertura hosi parte kontinentál iha territóriu nasionál".

Iha deklarasaun ba Lusa, sekretáriu ezekutivu komunidade nian, Murade Murargy, hatete katak ida ne’e karik tanba konstranjimentu finanseiru.

Kestiona hosi Lusa, deputadu Paulo Neves hatete katak ida ne’e hanesan mós matéria, entre sira seluk, ne’ebé hakarak haree esklarese hosi embaixadór Timor-Leste nian, nasaun ne’ebé atualmente ezerse prezidénsia CPLP nian.

Deputadu Paulo Pisco (PS) afirma katak "PSD hatudu ho kuriozidade, preokupasaun balun, obsesaun, to’o, ho kestaun Giné Ekuatoriál nian", lembra katak "asinatura hodi admite Giné Ekuatoriál tama iha espasu CPLP nian to’o halo hosi governu PSD nian".

Paulo Neves rejeita akuzasaun ne’e: "Klaru katak laiha obsesaun ruma hosi PSD relasiona ho Giné Ekuatoriál, ha’u lahatene iha ne’ebé deputadu Paulo Pisco konklui ida ne’e".

Sosiál-demokrata salienta katak ne’e akontese "ho mera koinsidénsia" katak Giné Ekuatoriál adere ba CPLP durante governu PSD nian (iha koligasaun ho CDS, xefia hosi Pedro Passos Coelho).

"Sé mak desidi atu tama iha CPLP la’ós Governu portugés, maybe ne’e hanesan desizaun nasaun hotu nian, no ida ne’e akontese iha simeira iha Timor-Leste.

Nein merese tama iha pormenór sira iha simeira ne’e", nia refere. Iha jullu 2014, ihaa simeira iha Dili, anunsia Giné Ekuatoriál hanesan membru totál direitu komunidade luzófona molok aprovasaun formál ba nia adezaun, hosi Estadu-membru ualu.

Eis Prezidente Repúblika, Aníbal Cavaco Silva, no primeiru-ministru, Pedro Passos Coelho, deklara katak sira hakfodak ho anúnsiu antesipadu ne’e no sira dezvaloriza "insidénsia protokolár" liuhosi susesu simeira ne’ebé Timor-Leste organiza.

Partidu sira seluk ho kadeira iha komisaun parlamentár konkorda ohin ho pedidu atu rona Antonino de Araújo, maibé salienta katak embaixadó atu ba Asembleia Repúblika portugés tenke halo liuhosi konvite no la’ós liuhosi rekerimentu, tanba ne’e hanesan reprezentante Estadu soberanu ida nian.

Paulo Neves salienta katak sei rona Antonino de Araújo hanesan xefe missaun observasaun eleitorál nian no la’ós hanesan embaixadór.

Dekanu ba iha termu lonjevidade iha poder hosi xefe Estadu afrikanu nian sira, Obiang Nguema, ho tinan 73, maka lidera rejime ida ne’e baibain hetan kritika hosi organizasaun defeza ba direitu ema nian tanba represaun hosi opozitór, sosiedade sivil, meiu komunikasaun sosiál, nune’e mos tanba korupsaun ne’ebé barak.

Foin lalais, Governu portugés husu "pasu klaru no evidente kona-ba demokratizasaun polítika no, iha planu ne’e, forma oinsá sei hala’o kampaña, eleisaun no apuramentu rezultadu iha eleisaun prezidensiál ne’e determinante".

Kestiona hosi Lusa kona-ba forma oinsá ezekutivu haree prosesu eleitorál iha nasaun ne’e, ministru Negósiu Estranjeiru Portugál nian, Augusto Santos Silva, hatete katak nota misaun CPLP nian "ekilibrada no klaru tebes".

SAPO TL ho Lusa