Kazu Emilia, TDD Kontinua Rona Sasin, Deskonfia Diretora ETDA Involve

DILI - Tribunal Distrital Dili (TDD) kontinua halao julgamentu ba kazu krime partisipasaun ekonomiu iha negosiu, neebe kontinua rona sasin husi defesa arguida Emilia Pires.

Sasin Jose Barreto Gonçalves nudar vice diretor sentru formasaun no empregu ETDA husi 2012 ate agora. Sasin nee arola husi defesa arguida Emilia Pires. Iha julgamentu nee alende defesa halo perguntas, parte Ministeriu Publiku mos husu tuir ba sasin nee katak diretora ETDA mak se. Nunee sasin nee hatete katak, diretora mak Palmira Pires, neebe sei iha relasaun familia hanesan alin feto husi arguida Emilia Pires.

Sasin neebe defesa arola kondis ho relatoriu neebe mai husi banku ANZ katak diretora ETDA nee transfere osan rihun 40 ba iha ANZ. Tanba nee MP husu ba tribunal atu haree dokumentus nee, para nunee MP bele halo sertidaun extraia ba diretora nee. Tanba husi dokumentus neebe iha bele dehan katak iha projetu nee laos deit iha arguida nain rua nee maibe sei iha tan arguidu seluk.

Durante julgamentu tribunal rona deklarasaun sasin Jose Barreto Gonçalves katak, iha 2012 nia simu pedidu husi Worren Macleod, diretor Max metalcraft’s hodi bele buka ema tekniku ruma hodi monta kama iha HNGV. Nunee iha loron 2 depois tinan foun nia ba tula Cris, neebe nia hanesan ema tekniku ida husi Australia kompania Max Metal craft’s nia ema. Kama sira nee iha hela container nia laran, loron tuir fali mai mak sasin nee lori nia kolega Jimmy de Castro ho nia ema nain tolu hodi ba monta kama iha HNGV.

Nia hatuir, iha loron dahuluk sasin nee ba hasoru Jimmy ho nia kolega nain tolu hetan orientasaun husi Cris. Kama nee ho modelu elektroniku, neebe sira monta nee simples ka fasil los. Kama nee tau marka naran Max metalcraft’s. Sira monta kama nee durante loron rua nia laran hamutuk 40 kama mak sira monta iha tempu nee. Informasaun kompletu iha STL Jornal no STL Web, edisaun Kinta (10/12/2015). Domingas Gomes/Madalena Horta

Suara Timor Lorosae

Governu Deskrimina Povu Aileba Nia Oan ho Lingua Portugues

UAIOLI - Governu halo deskrimanasaun ba povu aileba sira nia oan iha rai ida nee, tamba ukun nain nia oan hatene liu portugues, duke povu nia oan.

Andre de Fatima Guterres hanesan komunidade Uaioli hatete, uluk iha tempu resistensia, koalia konaba luta Timor Leste nian, maibee ohin loron situasaun nee lingua ba Timor Leste nee lingua 2, tetun ho Portugues, maibee aileba nia oan kuaze labele asesu ba lingua Portugues, tamba lingua Portugues hanorin deit iha Dili, no nai ulun nian oan mak bele eskola iha Portugues.

Ami aileba nia oan labele hetan Portugues, maka dala barak ida nee ita iha tiha ona rasa ida katak, aban bain rua ba jerasaun foun mai nee atu ukun karik bain hira boot nia oan mak bele hetan kadeira ami neebe povu labele hetan, tamba ami nia oan nee aprende lingua tetun deit, labele hetan Portugues,” dehan Andre bainhira Presidenti Republika Taur Matan Ruak, halo dialogu ho komunidade sira iha Uaioli, Postu Administrativa Venilale, Municipiu Baucau, Tersa (09/12/2015).

Nia hatete, povu nia oan sira labele ba eskola iha eskola neebe ho kualidade neebe mak diak, tamba laiha ekonomia neebe mak sufisienti.

Iha fatin hanesan Presidenti Republika Taur Matan Ruak hatete, nia konkorda ho alin nee problema ida governu presiza hare, nia ba iha lospalos iha suku ida labaraik sira hatene deit lian fataluku deit.

Entertantu Inspetur Edukasaun Municipiu Baucau Adolfo hatete, konaba lingua Portugues neebe boot nia oan deit mak hatene nee lalos, tamba lian portugues nee depende ba estudante, tinan-tinan hodi estudante sira ba halo konkursu iha nivel regional no Nasional povu kiik nia oan mak sai primeiru lugar iha konkursu ba lingua Portugues, laos boot nia oan sira. Informasaun kompletu iha STL Jornal no STL Web, edisaun Kinta (10/12/2015). Carme Ximenes

Suara Timor Lorosae

GOPAC Lamenta PN Laiha Seridade Diskuti Lei Anti Korupsaun

DILI - Global Organization Off Parliamentarians Corruption (GOPAC) lamenta reprezentante Povu iha uma fukun Parlamentu Nasional (PN) la seriu hodi diskuti lei Anti Korupsaun, tan nee husu atu ajenda nee iha tinan 2016.

Tuir Prezidente GOPAC Timor Leste Francisco Miranda Branco katak kona ba lei anti korupsaun, Gopac lamenta tebes tamba hahu kedas iha segundu legislatura too ohin loron seidauk aprova husi Parlamentu Nasional.

GOPAC husu ba Parlamentu Nasional neebe mos ami halo parte atu bele hare ho seriedade no tau ba tinan 2016 aprovasaun lei Anti korupsaun, atu nunee ita fo instrumentu legal ida ba institusaun neebe Estado harii tiha ona hanesan KAK,” dehan Branco liu husi Konferensia Imprensa, Kuarta (09/12/2015) iha Salaun GOPAC PN.

Nia hatete institusaun estadu sira halo serbisu ho diak no mos kontribuisaun ba instituisaun seluk, hanesan Ministeriu Publiku hodi sira kaer instrumentu atu luta kontra korupsaun. Relasiona ho loron Mundial Anti Korupsaun Tuir Branco GOPAC TL hakarak aproveita oportunidade hodi fo mensagem katak TL foin tinan 13 restaura independensia, maibe seriu kombate korupsaun.

Iha fatin hanesan deputadu bankada Frente-Mudansa Jorge Teme hatete loron mundial anti korupsaun hanesan loron importante tebes ba nasaun TL, tanba esperiensia mundu hatudu akontese klase sosiedade, riku, kiak, no bei-beik neebe afeta moras korupsaun. Informasaun kompletu iha STL Jornal no STL Web, edisaun Kinta (10/12/2015). Timotio Gusmao

Suara Timor Lorosae

AVENIDA KULU-HUN CALIFORNIA NARAN BA UKUN RASIK A’AN – Zito Soares Magno, S.sos

Jornal Nacional - opiniaun

Plano Governo hodi implementa programa Fo naran Dirasaun ho numero ba Uma kain hosi bairo ba bairo sei realiza duni iha tempo badak, no sei komesa husi Municipio Dili. Ne’e hanesan progresso dezenvolvimento ne’ebe mak la’o diak, maka presiza mos kontribuisaun positivo hosi komunidade hodi alkansa plano hirak ne’e ba to’o nia rohan. Ita hotu hatene katak Fo Naran Dirasaun Bairo ho Numero Uma Kain ne’e importante tebes atu ema hosi estrangeiro ka hosi rai laran mos bele aksesu lais hodi hatene no sei la kria konfuzaun ba ema ne’ebe deit.

Iha ne’e, ami nudar reprezenta komunidade Suco KuluHun, Aldea Funu Hotu hakarak fo hanoin fali ba Chefe do Administrador Municipio Dili ho Secretario de Estado do Dezenvolvimento Local atu Verifika lolo’os naran ne’ebe ami sujere ba mak hanesan : Av. KuluHun California; tamba lori ho naran ida ne’e sai nudar motivasaun no influensaun bo’ot ba resistensia da luta hosi Juventude tomak no Komunidade sira mak hela iha area KuluHun California.

Iha medio tinan 1987 unidade Juventude Kulu-Hun California ( JKC )hamosu paradigma foun hodi halibur malu ho Juventude sira hosi bairro seluk ho naran Avenida tuir ida-idak nia bairro, mak hanesan Becora(Choque,Vertude,Remack,Klak Fuik), Bemori, Bidau, Taibessi(Porto Taibessi,Ruku Raka,Matando Guerros,) Audian, Balide(Rebal), Santa Cruz, Matadouro, no Vila-Verde, hotu hamutuk hodi hamahon A’an iha organizasaun FITUN( Fretilin Iha Timor Unidade Nafatin) ne’ebe sai aliado diak ho Ojetil, maske uluk iha polemika politika entre FITUN ho Juventude Externato ne’ebe hamahon a’an iha Ojetil tamba mosu deprivasaun de komunikasaun entre Fitun no Ojetil, maibe ne’e nudar istoria.

Iha tempo hirak ne’eba Militar Indonesia sei okupa hela Timor, naran Avenida Kulu-Hun California sei uza hela naran Jalan Baru KuluHun California alias Markas Besar Garis Merah RT 03 RW 01. ; Mas idepois de ukun a’an naran ne’e Transforma ka habadak fali ba Kulu-Hun California. Ema hotu hatene katak naran California nudar sidade boot ida iha America ne’eba, ne’e normal tamba iha nasaun seluk hanesan Portugal mos estabelese ona Rua: Av. Timor-Leste. Ne’e duni ami sujere ba maluk sira atu labele minimiza naran California, tamba ho naran ida ne’e maka ezistensia Juventude KuluHun sira sakrifika a’an hodi halibur malu ho Juventude hosi bairo seluk, halo Maun Alin,Hemu-Ran, ho Prinsipiu “Mate ka Moris Ukun Rasik A’an” nia objetivu hametin unidade ba luta ukun rasik a’an, atu nune’e wainhira Militar/Intel(Inteligen) Indonesia karik kaptura kualker joven ida maka sei la divulga segredo no informasaun kona ba Aktividade no Plano Assaun Estrategia de Resistencia entre joven sira ho Falintil.

Atu diak ka a’at, istoria sempre istoria, sei la lakon iha ema nia neon hodi konta nafatin husi ema ida ba ema ida. Ho razaun no realidade hirak ne’e mak Ami husi Juventude KuluHun California sujere ba Administrador Municipio Dili ho Secretario de Estado do Dezenvolvimento Local katak wainhira hanoin atu fo naran dirasaun ba bairo ruma tenke koordena ka impoen ba chefe do suco hodi implementa ka kria uluk consensus iha komunidade bairo nian hafoin em caminha karta konkordansia ne’e ba Governo ne’ebe kompeten; atu nune’e sistema demokrasia iha Timor la’o tuir dalan, entao tenke mai hosi buat ki’ik sira ne’e, tamba ema hotu hatene katak Demokrasia ne’e Mai Hosi Povu, Ba Povu, Ho Povu. Liu hosi dalan ida ne’e maka ita hatudu lisaun ruma no eduka povu, tamba ami komunidade no joven KuluHun California sente la satisfas ba informasaun ne’ebe ami rona katak Avenida KuluHun California sei Transforma fali ba naran Seluk, maka ami konsidera desizaun hirak ne’e la justu no la akumula ami hotu nia aspirasaun, ami sei kontra. Ho nune’e mak ami komunidade husu ba Conselho Dos Ministros no Parlamento sira atu iha sensibilidade hodi tetu ho proporsional no hare’e didiak naran Avenida bairo nian, atu nune’e labele sala wainhira foti Desizaun ruma, tamba KuluHun California nudar naran ida ne’ebe que ami orguillu tebes tamba sai mos nudar mata dalan entre juventude sira mak iha sidade Dili. Plano estrategia no assaun ne’ebe mak Juventude KuluHun California halo mak hanesan: Kria ligasaun klandestina no komunikasaun persuasiva ho membro no Chefe das Falintil iha medio tinan 1989, fo kontribuisaun positivo ajuda Ai-moruk, Hasa’e bandeira Timor (bandeira Nasional) iha SMA 1 Bekora no Cemiterio Santa Cruz(Pai Nosso nia krus tutun-red)iha tinan 1990, no plano hodi asaltu Markas ABRI/TNI AU iha Lanud Aitarak Laran Dili, hodi halo rabenta iha area ne’eba, maibe to’o ikus la konsegue tamba Intel sira la fo dalan ba joven hodi alkansa sira nia plano ne’ebe mak atu trasa iha 15 de Agostu de 1990, oras tuku 02.30 Madrugada; imajina karik planu hirak ne’e mak konsegue realize duni…? Maka saida mak atu akontese ???.. Dili laran bele nabe’en tiha. Iha dia 11 de Novembro de 1991 Fitun kolabora servisu hamutuk ho Ojetil hodi halo Atribut pinta Spanduk ho tematik oi-oin nudar preparasaun ba demonstrasaun 12 de Novembro de 1991. Entertantu sei laiha tan Naran seluk mak Governu no Parlamentu atu hili tuir ema ida ka rua nia hakarak, maka ne’e distorsia faktus, iregularidade no kontraprodutiva;   Intervensaun ne’e Ami halo nudar referensia ida hodi kria kooperasaun Mutua Vertical-Horizontal entre Governo ho Sidadania; Atu fo mos hanoin ba Governo ka Parlamento katak ezemplo ida ba saudoso Sebastiao Gomes ne’ebe militar Indonesia Oho iha igreja Motael iha 28 de Outubro 1991, Devia Governo halo Monumento Statua/Artefak saudoso nian iha Igreja Motael oin hodi hatutan istoria Tragedia 12 de Novembro de 1991 ba oin nudar Pontu da Resistensia e Sentimento Patriotismo de Juventude iha altura ne’eba. Tuir lo’os Governo foti desizaun hodi muda fali Statua Amali ho Levi sai hanesan simbolu ne’ebe merese hari’i iha area Cemiterio Santa Cruz no labele konserva iha Igreja Motael oin…       ”Hanoin to’ok ba…”

Nudar mos Referensia, ami hakarak esklarese perfil atu dignifika naran husi ema ne’ebe merese duni atu uza ba naran Dirasaun especial Kuluhun tuir klasifikasaun mak hanesan:

Istorikamente : Agustinho Borges Alias Kuda Kareta; Saudoso Agustinho Borges nudar sidadaun ida ne’ebe primeiro mai hela iha rai Kuluhun desde tempo Japaunesse, altura ne’eba seidauk iha ema ida mai hela iha rai kuluhun. Tempo uluk iha Timor ema ne’ebe mak iha Kuda Kareta maka :       1. Agustinho Borges, 2. Sr.Orlando hela iha Fatu-Hada. So sira nain rua deit, la iha tan seluk.

Saudoso Agustinho Borges “ Kuda Kareta” falleceu iha KuluHun California.

Resistensiamente : Paul Ferreira nudar lideransa Politika Fretilin nian ne’ebe famouso no iha kargo importante tamba Saudoso nudar Motivador no Katalisador durante tempo rezistensia.

Saudoso mos konhesido ho forsa mai hosi natureza ba nia a’an forte tebes hodi tuba rai metin no taka dalan ba militar Indonesia hodi labele invade Timor iha tempo hirak ne’eba.

Saudoso Paul Ferreira Falleceu iha KuluHun California.

Politikamente : depois de deside naran Jalan baru Kuluhun California hosi Irmao Abel Amaral, tamba iha tempo ne’eba Juventudeiha tinan 1984 Juventude Kuluhun California hahu’u kria relasaun hosi bairo ba bairo hodi sosializa organizasaun resistensia mak hanesan Ojetil no Juventude Loriko Asswain molok atu funda organizasaun Fitun. Iha tinan 1987 organizasaun Fitun estabelese no halo boot naran Fitun mai husi Juventude Resistensia Kuluhun California ate agora;

Politikamente : Bonifacio Magno Ferreira nasceu iha Dili-Taibessi, kaben no hela iha Kuluhun 1973, 1975 halo abrigo no tiru malu kontra Militar Indonesia iha Ponte Kuluhun, requa ba Fatu Ahi. Saudoso tama kadeia ho kausa Politika iha tinan 1977 Komarka Tropical, 1979 Komarka Balide, 1981 Komarka Balide, 1983 Komarka Becora, 1985 Komarka Denpasar Bali, no 1991 Komarka Kupang ( Kausa 12 Novembro 1991). Saudoso Bonifacio rekonhese mos luta hosi saudoso Paul Ferreira nudar motivador hodi banati tuir. Saudoso Bonifacio Magno Ferreira sai nudar Motivador no Katalisador ba Ojetil no Juventude Loriko Aswain, sai mos Conseleiro no Motivador ba Organizasaun Fitun. Depois de Independencia saudoso nudar membro CCF no simu Certificado de Reconhesimento 40 Anos da Fretilin, nudar Representante Fretilin Distrito Dili.

Saudoso Bonifacio Magno Ferreira, Falleceu iha KuluHun California dia 4 de Outubro de 2013

Istoria Foun : Alternativa atu labele kria konfujaun kona ba naran Avenida hirak ne’e, maka ami aprezenta mos naran foun ne’ebe bele akumula ami hotu nia hanoin, ami sujere mos naran                  Rua : Av. Xanana-Alkatiri, nudar alternativa Proporsional, karik wainhira Governo no Parlamento la aseita ho naran KuluHun California.

Politikamente : Saudoso Enfremeiro Matias hela iha Bidau-Akadiru Hun, muda mai Kuluhun-Taibessi iha tinan se-la-sala 1985, hodi halao servisu nudar enfremeiro no halo Assaun klandestina durante tempo rezistensia hodi ajuda aimoruk ba Falintil sira; Maun Boot Kay Rala Xanana Gusmao mai hela dala ida iha Saudoso Enfremeiro Matias nia residensia, se-la-sala iha medio 1989 ou 1990, no iha tinan 1991 saudoso tama Kadeia ba kausa 12 Novembro, depois de Independensia dia 4 de Setembro de 1999 saudoso Enfremeiro Matias la konsegue halai sai no hetan kapturasaun hosi military Indonesia, ikus mai saudoso lakon nia Vida.

Nudar Honra no orguillu boot ba ami hanesan Juventude KuluHun California ( JKC )bele sai mos nudar mata dalan ba asaun-asaun istoriko durante okupasaun Indonesia; Nudar Juventude, ne’e mak ami nia kontribuisaun maximo, ami sei la ejiji buat ruma ba Governo, maibe ami hakarak naran Av. KuluHun California kontinua nafatin hodi hatutan istoria hosi ema ida ba ema ida.

Motto :

“ Imi Funda

Ami Reforsa

Sira Hatutan ”

Zito Soares Magno, S.sos

Sidadaun KuluHun California Dili

Siensia Komunikasaun-Jornalista

Univ.DR. Soetomo Surabaya,2005

Timor-Leste importa ona euros milloens 72 iha fulan outubru liu ba, no ida ne’e liu ona 42,92% lahanesan tinan kotuk

Timor-Leste importa ona sasan ho valór dolár milloens 78,22 (besik euros milloens 72) iha fulan outubru, 42,92% duké iha períudu 2014, tuir dadus ofisiál ne’ebé iha. 

Valór esportasaun nian aumenta ba dolár milloens 9,25 (besik euros milloens 8,5), liu 147,9% hanesan mos iha fulan ne’e, tinan 2014 nian, hanesan dadus hosi Diresaun Jerál Estatístika Ministériu Finansas.

Kafé maka hanesan produtu esportadu, tanba Timor-Leste faan ona produtu refere ba rai liur – espesialmente ba Estadus Unidus Amérika (EUA), Alemaña, Béljika no Kanadá – ho tonelada 5.893 ho valór totál dolá milloens 6,83 (euros milloens 6,20).

Restu ho besik dolár milloens 2,4 (euros milloens 2,2) koresponde ba reesportasaun, grupu ne’ebé identifika “sasan hirak ne’ebé esporta ona, maibé molok ne’e importa ona mai Timor-Leste no sasan hirak ne’e lato’o 50% hosi konteúdu valór Timor-Leste nian”.

Kona-ba importasaun, vendedór bot mai Timor-Leste iha fulan outubru maka Indonézia (dolár milloens 26,55), Malázia (milloens 15) no Xina (milloens 8,3).

SAPO TL ho Lusa 

Manan-na’in neen iha edisaun ba Prémiu Sérgio Vieira de Mello Timor-Leste tinan 2015 nian

Personalidade tolu no instituisaun tolu maka sei prémiu refere aban, iha edisaun daualu (8ª) hosi Prémiu Direitu Umanu Sérgio Vieira de Mello ne’ebé atribui hosi prezidénsia Repúblika Timor-Leste.

Xefe Casa Sivil hosi Prezidénsia Repúblika esplika iha komunikadu katak iha kategoria ba Direitu Sivil nomós Polítika ba tinan ne’e nian sei entrega ba advogadu Gregório de Oliveira Ximenes nomós Domingos Brandão, funsionáriu hosi Institutu Nasionál Formasaun Dosente no Profisionál Edukasaun (INFORDEPE).

Parte rua ne’e hala’o serbisu hodi defende no promov ema ninia direitu iha Timor-Leste, tuir fonte prezidénsia nian fó sai.

Iha kategoria Direitu Sosiál, Ekonómika no Kulturál sei entrega ba parteira Maria Ximenes nomós ba instituisaun Kongregasaun Imitadora Jesus (CIJ), Sentru Reabilitasaun-Liman Hamutuk-Hera "Maria Aparecida Lopes" (ne’ebé mos koñesida hanesan Mana Branca) no ba Dormitóriu Santa Catarina de Sena - Misionárias Dominikana do Rosário.

Prémiu ho dolár rihun 10 ba ema idaidak sei entrega hosi prezidente Taur Matan Ruak, iha serimónia ne’ebé sei hala’o aban, bainhira komemora Loron Internasionál ba Direitu Umanu.
Foto: Antonio Amaral, Lusa

Prémiu Sérgio Vieira de Mello fó ho objetivu atu rekoñese timor-oan no sidadaun etsranjeiru, organizasaun governamentál no la’os-governamentál ne’ebé promove, defende no fó sau direitu umanu iha Timor-Leste.

Prémiu ne’e kria iha 18-marsu-2009 hosi eis-xefe Estadu José Ramos-Horta, atu nune’e kada tinan komemora Loron ba Direitu Umanu.

Inisiativa ne’e mos ho objetivu atu fó rekoñesimentu ba serbisu ne’ebé brazileiru Sérgio Vieira de Mello halo, bainhira sei asumi knar nu’udar xefe Misaun ONU durante Administrasaun Tranzitória Timor-Leste, hosi novembru tinan 1999 to’o maiu-2002.

Diplomata brazileiru ne’e mate iha 19-agostu-2003 liu ba, hanesan vítima hosi atentadu Irak nian ida.

SAPO TL ho Lusa 

Selebra Loron Kontra Korrupsaun, ohin konferénsia rua iha Lisboa

Loron Internasionál kontra Korupsaun ohin sei hala’o ho konferénsia rua iha Lisboa no sei trata fenómenu ne’ebé maka Nasoins Unidas konsidera iha relasaun diretamente ho ki’ak. 

Iha dader, tuku 10:00, sei hahú iha edifísiu foun -sede Polísia Judisiáriu, no iha konferénsia kontra Korrupsaun, konta ho partisipasaun hosi ministru Saúde, Adalberto Campos Fernandes, ministru Traballu, Solidariedade no Seguransa Sosiál, Vieira da Silva, nomós ministra Justisa, Francisca Van Dunem.

Sei iha moos oradór ba eventu ne’e maka diretór nasionál Polísia Judisiária, Almeida Rodrigues. Iha lorokraik, oras 14:30, sei realiza semináriu ida iha auditóriu Tribunál Kontas nian kona-bá 'Prevene no Investiga', hamutuk ho organizasaun hosi Konsellu Prevensaun Korrupsaun, Observatóriu Ekonomia no Jestaun ba Fraude, Sindikatu Majistradu Ministériu Públiku no Polísia Judisiária.

Loron 9 fulan dezembru Nasoins Unidas hili hanesan Loron Internasionál kontra Korrupsaun ne’ebé iha tinan 2003 loron hanesan maka nasaun liu 100 selebra Konvensaun ONU Kontra Korrupsaun ne’e, iha sidade mexikana Mérida nian.

Objetivu hosi konvensaun ne’e atu kriminaliza iha nível internasionál ba korrupsaun, no hanesan moos komportamentu seluk ne’ebé iha relasaun, kazu iha brankueamentu kapitál ka obstrusaun ba justisa.

Dokumentu Nasoins Unidas nian refere moos katak kooperasaun internasionál, konsidera relasionamentu ne’ebé di’ak entre autoridade nasionál oioin ne’e importante tebes atu ajuda hodi kombate krime sira ne’e, hanesan auxíliu judisiáriu no estradisaun.

Ba ONU korrupsaun hanesan fenómenu ida ne’ebé urjente liu atu kombate no konsidera katak "atu redus kiak no alkansa Objetivu ba Dezenvolvimentu Miléniu nian hetan ameasa diretamente hosi korrupsaun".

SAPO TL ho Lusa 

Polísia australianu liberta joven ne'ebé kombate hasoru Estadu Islámiku iha Síria

Polísia australianu liberta ona joven ida ne'ebé halo viajen iha fulan-Maiu ba Médio Oriente hodi kombate grupu extremista Estadu Islámiku no fila ona iha kalan ne'e ba nia nasaun, hafoin deportadu hosi Alemaña, haktuir hosi meiu komunikasaun lokál sira iha loron-segunda ne'e.

Antes hetan libertasaun, autoridade sira halo interogasaun ba Ashley Dyball, ho tinan 23, ne'ebé hamutuk ho milísia kurdu ne'ebé koñesidu ho naran YPG (Unidade sira Protesaun Populár), ho ideolojia progresista, hodi kombate extremista sira hosi Estadu Islámiku (EI) tanba autonomia hosi teritóriu kurdu iha Síria.

Joven australianu husik zona kombate nian ba loron balun no halo viajen ba Alemaña, hodi nune'e maka ema kaer iha semana liubá no hafoin ne'e hetan deportasaun.

Nia advogada, Jessie Smith, esplika ona katak Ashley Dyball hetan interogasaun no hetan liberdade lahó akuzasaun ruma no sira hein tan investigasaun ruma", haktuir hosi kanál televizaun australianu ABC.

Ashley bele hetan akuzasaun tanba viola lei ida ne'ebé hahú iha tinan liubá bandu ema australianu sira hodi kombate iha Síria hosi grupu EI rasik ka hosi sira nia opozitór sira.

Dyball nia aman-inan garanti ona katak joven ne'e tulun ona YPG hodi dezativa bomba terestre antipesoál sira no husu ona ba Governu australianu hodi labele avansa ho akuzasaun ruma tanba nia konsideradu hanesan ona kulpadu no bele hetan kastigu to'o tinan 25 iha kadeia.

"Iha tempu ne'ebá lei ne'e ladún klaru. Karik klaru, joven sira la ba Médio Oriente", afirma hosi Scott Dyball, joven ne'e nia aman, iha deklarasaun sira ba kanál 9.

"Buat úniku ida ne'ebé ami husu maka amnistia ida", nia hatutan.

Austrália, ne'ebé iha ema australianu atus resin maka luta iha parte rua hosi konflitu ne'e, hanesan nasaun ida ne'ebé iha kombatente estranjeiru barak iha Médio Oriente "tuir kapita".

SAPO TL ho Lusa

REDE FETO REALIZA FESTIVAL LALORAN

Dili - Atu completa loron 16 capanhia activismo violência contra feto no labarik. Quinta feira nee, organização Rede Feto realiza festival laloran nebe halao iha Jardim 5 de maio Colmera. Evento nee, oficialmente loke direita husi Vice Ministro Estatal Tomas Cabral, participação husi organização feto sira seluk, SEM, no DNTT. Tomas Cabral  molok  halo abertura ba evento nee, iha nia discurso dehan; festival nee bele fo anin foun ba público, tanba tinan atus haat ba kotuk, continua ho ocupação Indonésia, tempo transizaun to ukun, violência barak mak acontece ba feto no labarik. Tanba nee, Tomas dehan: hanesan Timor oan no estado iha preparação atu combate hahalok negativo nee. Vice Ministro Estatal nee,  dehan: iniciativa nee positivo, tanba bele hahu no halao, maski Timor oan educado hotu ona, maibé,  tanba evoluação moderno nebe lao, balun adopta sala. Tomas dehan; festival nee, bele fo hanoin fali ba púlico kona ba  liberdade atu  respeita malu, tanba violência laós cultura Timor nian. Atual Diretora Executiva Organização Rede Feto, Dinorah Granadeiro dehan; festival nee convida comunidade tomak, atu  hapara violncia contra feto no labaraik iha fatin público no transporte public. Tanba basea ba assesmento nebe rede feto iha katak; violensia barak laos acontece deit iha uma, maibe mos iha trasporte público.  Alem de nee, atu hasae consciência público hodi  assegura segurança iha fatin público nee importante. Campanha nee halao deit iha Dili, tanba Dili mak ocupa primiero lugar número violência aas liu. Atu completa evento nee, Rede Feto sei halao mos treinamento ba condutores sira iha Acanuno hera, semana oin mai. (Angel)

Rádio Timor Kmanek

2016 MAE SEI DELEGA COMPETÊNCIA BA ADMINISTRAÇÃO MUNICIPAL

Díli – Relaciona ho política governo nian, liu husi Ministério Administração Estatal ba programa desentralização iha município sira, Quinta-feira nee (03/12), iha Jardim 5 de maio Colmera, Vice Ministro Estatal Tomas Cabral ba RTK  dehan; prioridade ministério ba tinan oin (2016), sei consentra ba regime jurídico ba desentralização nebe  iha ona Parlamento Nacional; iha mos lei 6, ida aprova no submete  ona ba Presidente da República, 5 seluk  sei iha parlamento, ida iha Conselhos dos Ministros. Tamba nee, iha 2016 precisa finaliza leis hirak nee, atu política desentralização lao ba oin.Tomas, dehan: prioridade liu mak Ministério Administração Estatal sei delega competência ba administração municipal sira, tamba  oras nee administrador sira iha municípios halao hela serviço  ministério nian. Vice Ministro Administração Estatal explica; iha tinan oin ho decretos  foun no preparação ba política desentralização, sei  hahu  reforma  no implementa iha municípios hotu-hotu. Além de nee, sei halo mos preparação ba desconsentração administrativo iha base, tamba plano desentralização laos hahu iha V no VI governo. Maibé, hahu kedas iha Primeiro Governo, iha tinan 2003. Maski hahu kleur ona, maibé lao nei-neik tamba problema legislação no laiha péritos. Tamba nee, precisa prepara esboço, halo consultação no conferência, hafoin submete ba Conselhos dos Ministros no Parlamento atu discute no aprova, maibé dala ruma precisa hein, tamba  processo desentralização lao demora. Tomas, espera katak: maski nunee, maibé neneik sei finaliza processo refere. (Angel)

Radio Timor Kmanek

PE. EVARISTO DEHAN: LA HO FIAR BUAT HOTU LAO SABRAUT

Díli – Pe. Evaresto Fernandes da Costa Soares, iha nia homilia, wainhira preside missa agradecimento nebe realiza iha ensino básico no 04 Naroman Perumnas, Quinta-feira nee dehan: Maromak nia reino no presença iha ema nia leet, hatene ema nia condição no situação, maski hatene  Maromak la halo buat hotu  conforme nia hakarak, maibé sempre husu ema ida-idak nia colaboração. Escola no 04 Perunas bele lao diak, tamba iha confiança husi inan-aman ba professors sira. Ho confiança nee  mak  husik oan sira atu professor sira bele educa ho sistema educação nebe escola nee iha, tamba wainhira fo confiança uituan deit, resultado mos hanesan, maibé wainhira fo confiança tomak, Maromak mos sei serviço totalmente iha ema nia-an. Confiança nee importante, se wainhira laiha confiança escola sei lao sabraut, tamba inan-aman no professors sira laiha confiança ba malu. Fiar malu nee, precisa sacrifício, iha espírito haraik-an; tamba nee atu alcança objetivo precisa brani atu fiar malu; basá parte hotu hamutuk maka  desemvolve escola, tamba investimento boot liu mak  oan sira. Sira mak futuro nação no kreda nian. Nailulik nee dehan; difícil, wainhira ema hakarak buat hotu, maibé la coloca Maromak iha ema nia leet.  Biban hanesan;  vice director Aguida Ximenes dehan; cerimónia missa agradecimento  nudar despedida ba estagiário nain 3 husi  instituto ciências de religiosas, no alunos 6 ano atu husik hela  escola nee. Vice director  nee comenta  estagiários  sira hanorin diak iha conhecimento específico, tamba nee precisa alarga sira nia presença iha escola sira,  atu  ajuda processo aprendizagem.  Vice directora  preocupa, tamba  alunos barak, maibé falta mobiliários hanesan cadeira, mesa, bee, dificulta alunos sira iha processo  apredizagem, nia parte husu ba governo atu  responde  condição escola,  tamba ambiente escola diak maka alunos bele  apreende ho diak, tamba sira mak futuro ba nação. (Leo)

Radio Timor Kmanek

AVIAUN ZEESM TAKA GOVERNU NIA MATAN BA POVU NIA TERUS

Aviaun ne’ebé foin lalais Governu sosa hodi fasilita projetu Zona Espesial Ekonomia Sosial Merkadu (ZEESM) Oe-cusse, taka Governu nia matan ba povu ki’ik sira nia susar no terus.

Prezidenti Repúblika (PR) Taur Matan Ruak dehan, populasaun sei la hakarak sa’e aviaun, mas sira presiza bee lor-loron para sira moris no sira nia saúde.

“Prezidenti la preokupa ho aviaun ZEESM ne’ebé Estadu hola ona, simplesmente labele haree ba sorin de’it, no taka tiha matan ba sorin,” dehan Taur Matan Ruak ba Jornalsita sira iha Tasi laran parte Karimbala nian, Kuarta (02/12), bainhira fila husi Oe-cusse ho roo Naval Falintil Forsa Defeza Timor Leste (F-FDTL) nian.

Taur Matan Ruak dehan, presiza duni atu dezenvolve nasaun no povu ida ne’e, maibé la presiza atu hatudu hanesan ne’e.

“Prezidenti apoia, maibé la’os apoia atu sakrifika fali povu ninia nesesidades bázikus, ba projetu bo’ot sira ne’e,” katak Taur Matan Ruak.

Taur Matan Ruak dehan, projetu bo’ot sira ne’e, agora ne’e hanoin atu gasta osan de’it, tanba gasta osan ne’e mais fasil liu, maibé aban bairua atu hatama osan, ida ne’e mak problema.

Nia esklarese, ema barak preokupa kona-ba aviaun ne’ebé Governu hola tiha ona, maibé Prezidenti Repúblika la preokupa ho ida ne’e, maibé husu atu haree mós preokupasaun povu sira nian iha área rurál. Prezidenti Repúblika hakarak kria ekilibru ida entre dezenvolvimentu urbana, ho dezenvolvimentu rurál. cos

Jornal Nacional

FRETILIN LA PREOKUPA MINA MARAN

Membru Parlamentu Nasional (PN) husi Bankada FRETILIN, Francisco Miranda Branco, la preokupa ho mina maran, maibe preokupa liu maka be kuandu maran.

“Hau la preokupa ho minarai atu maran, maibe hau preokupa ho be karik maran maka ita sei mate, minarai sei iha nasaun barak, ita nia maun alin Cabu-Verde laiha minaria, laiha buat ida mais sira sei moris nusa mak ita iha rekursus bar-barak, hau hanoin be mak prinsipal,” hateten Francisco Branco iha debate Orsamentu Jeral Estado (OJE) 2016 ba loron tolu Jeneralidade, Kinta (03/12/2015).

Reprezentante povu iha uma fukun PN ne’e haktuir tan, Debate orsamentu ne’e inportante tebes ba Estado tomak, tanba ida ne’e nia konvida atu halo balansu situasaun Estado TL ninian.

“Ita iha Estado ida ne’ebe estabilidade politika, ita presija kongratula ba situasaun ida ne’e, maibe iha senaria balun ne’ebe husi Banku Central hatudu mai ita, katak mos tenke prudensia ba gastus ne’ebe ita halo durante tinan hirak liu ba, se ita nafatin gasta hanesan ne’e maka senaria balun ne’ebe karik pesimista, maibe ita presija konsidera mos katak iha tinan hira mai ne’e, karik iha tinan 2036, ita nia fundu ne’e bele lafunda tiha ona.

Ne’ebe iha momentu ida ne’e mos presija ita halo reflesaun atu ita iha predesia oitoan ita nia gastus hirak ne’ebe uja fundu petrolio nian,” Francisco Branco hateten.

Nia hatutan, “enkuantu ema barak preukupa ho minarai atu hotu, hau interpreta hanoin ne’ebe simples husi ita nia povu ne’ebe ain tanan, aileba ne’ebe moris 80 % iha setor agrikultura, sira la preukupa ho minarai, tanba sira rasik mos seidauk iha benefisiu husi minarai ninian, sira preukupa liu ho be, hau hanoin inportante Estado tomak tenke preukupa ba be.

Food and Agriculture Organization (FAO) fo tiha ona sinal ida katak 2050 mundu sei tama iha krizi be, karik be nia folin sei bot hanesan minarai, entaun iha situasaun ida ne’e Estado li-liu Governu tenke define ona politika nasional ba be, ita presija rezerva be iha ita nia planeta sira ne’e, ita presija hanoin ona ba sistema rezerva be ba uma hot-hotu, li-liu ba eskolas, postu saude, hospitais no uma ne’ebe Estado hari’i. se karik iha definisaun politika ida uma hot-hotu tenke iha instalasaun atu rezerva be ba momentus ne’ebe difisil, Ita lapresija hein kuandu tempu iha krizi ona mak ita foin hanoin,”.

Ho situasaun ida ne’e Deputado ne’e husu karik Governu liu husi konselhu ministrus hanoin atu define politiku nasional be atu nune’e hare ho seriedade ba situasaun be iha Timor. mia

Jornal Nacional