SUSESAUN LIDERANSA F-FDTL: Sei Tempu atu Aprende?

Filipe Rodrigues Pereira*, Dili - opiniaun

Konflitu entres Orgaun Soberanu Estadu Timor-Leste nian, Presidente da Republika (PR), Governu no Parlamento Nasional (PN) ligadu ho nomeiasaun no exenorasaun BrigGen Filomeno Paixão no General Lere Anan Timur nudar CEMG F-FDTL ladauk kotu. Konflitu refere ikus hada’et mos ba’a politiku sira depois de PR Taur Matan Ruak hato’o Mensagem Estadu iha Uma Fukun PN, 25 Janeiro 2016. Rezonasia konflitu ne’e tama husi tilun ba’a tilun no ikus sai materia konversa  husi  uma lidun ba’a uma lidun iha populasaun baibain nia let, iha Kafe ba’a sosiadade bolsu mahar sira no ba’a akademikus e universitarius sira nia haknar fatin.

Konflitu temi iha leten daudaun nakfilak a’an sai disputa kompetensia pur kauza exonerasaun no nomeisasaun General Lere Anan Timur no BriGen Filomeno Paixao nudar CEMG F-FDTL tamba parte Governu konsidera desizaun PR Taur nian la tuir Governu nia proposta. Governu iha 24/1/2016 hatama ona rekursu kontensioza administrativa no husu providensia kautelar ba’a Tribunal Rekursu hasoru PR Taur nia desizaun.

Geralmente iha nasaun barak iha konseitu rua konaba oinsa atu rezolve kontensioza administrativa mak hanesan Sistema Rekursu Administrativu no Sistema Juridiksaun Administrativu. Konseitu rua ne’e  utiliza iha nasaun balun iha Eropa. Iha Sistema Rekursu Administrativu kompetensia atu investiga ka julga no hakotu desizaun ba’a kontensiozu administrativu mak Instituisaun nebe’e hirarkiamente a’as liu ka Instituisaun seluk nebe’e estrukturalmente hamrik ketak husi Instituisoins nebe’e hamosu objetu disputa. Iha sistema ne’e instituisaun nebe’e julga kontensiozu administrativu ne’e la’os julga deit validade (keabsahan) husi desizaun nebe’e sai objetu rekursu maibe sei julga no tetu mos aspetu benefisiu (kemanfaatan) husi desizaun refere. Iha ninia julgamantu Instituisaun ne’e iha kompetensia atu foti desizaun hanesan kompensasaun, muda buat balun iha desizaun tamba la los ou bele mos hasai ‘akordaun’ ba’a desizaun administrativu nebe’e hamosu konflitu-disputa. Dala barak sistema ne’e iha ambitu Direitu Administrativu ema hanaran Quasi Juridiksaun Administivu.

Diferente ho  Sistema Juridiksaun Administrativu, iha sistema ne’e Juiz (Tribunal) mak sei julga no foti desizaun ba’a rekursu kontensiozu administrativu nebe’e hato’o husi parte ruma. Tamba Tribunal nudar mos Orgaun Soberanu Estadu nian sei halo julgamentu hodi hamosu check and balances. Iha sistema ne’e Juiz sei hare liu ba’a aspetu validade (keabsahan) ba’a desizaun nebe’e sai objetu disputa nian. Juiz sei la tetu benefisiu (kemanfaatan) husi desizaun nebe’e sai objetu disputa. Iha sistema ne’e mos Tribunal la iha kompetensia atu hamosu desizaun foun hanesan kompensasaun, maibe so bele fo’o penalty multa (ba’a kazu sivil), ou iha ninia akordaun hato’o rekomendasaun atu hadia-muda no/ka kansela desizaun tuan nebe’e hamosu disputa, no Tribunal bele mos hasai rekomensaun hodi husu atu halo desizaun foun.

Geralmente sistema kontensiozu administravitu nudar sistema nebe’e atu fo’o solusaun ba’a konflitus ka disputa iha ambitu ordem administrativa.  Bazeia ba’a konseitu rua temi iha leten, Timor-Leste opta Sistema Juridiksaun Administrativa nudar dalan atu rezolve disputa kompetensia administrativa entre Orgauns Estadu sira.

Artigo 129.º pontu 1 C-RDTL haklaken katak “o Tribunal Superior Administrativo, Fiscal e de Contas (TSAFC) é o órgão superior da hierarquia dos tribunais administrativos, fiscais e de contas, sem prejuízo da competência própria do Supremo Tribunal de Justiça”, no  Pontu 4.b. hateten katak tribunal refere ninia kompetensia ida mos mak atu “Julgar os recursos contenciosos interpostos das decisões dos órgãos do Estado e dos seus agentes”.  Tamba Timor-Leste ladauk iha TSAFC maka Tribunal Rekursu mak sei hala’o julgamentu ba’a kontensiozu administrativa nebe’e mosu entre Orgauns Estado nian, Governu hatama rekursu hasoru PR Taur ninia desizaun, nomeia no exonera CEMG/Vice-CEMG F-FDTL.

Koalia konaba susesaun lideransa F-FDTL, art. 29 Lei No. 3/2010 konaba Defesa Nasional hateten, “o CEMGFA é oficial general nomeado e exonerado pelo Presidente da República, por proposta do Governo, precedida da audição do Conselho Superior de Defesa Militar (CSDM) e do Conselho Superior de Segurança e Defesa (CSSD), através do membro do Governo com competência em matéria de Defesa Nacional”.

Karik antes atu lori ba’a Conselho dos Ministros atu deside se los mak atu lidera F-FDTL, Ministro Defesa konvoka uluk reuniaun konsultivu hodi rona membru CSDM sira nia hanoin ka la’e?! Ida ne’e prosedimento legais nebe’e mak presiza halo uluk antes Governu hakarak hato’o proposta ba’a Presidente da Republika. Membru CSDM kompostu husi CEMGFA, Vice-CEMG. CEMFA, Comandantes Componente sira, Ministro Defesa no entidades nebe’e hetan konvite atu partisipa iha reuniaun CSDM (art. 20 Lei No. 3/2010, konaba Defesa Nasional). Informasaun nebe’e espalha iha publiku hateten governu la konvoka reuniaun konsultivu CSDM.

Artigu 195 pontu 1, Dekretu Lei No. 7/2014 konaba Estatutu Militar hateten “militar pasa ba situasaun reforma nian wainhira atinji ona idade tinan 60”. Pontu 2.(e) haktuir mos “militar nebe’e atinji ona tinan 60 bele kontinua hala’o nafatin ninia funsaun, desde ke hetan kondisoins tuir lei, hanesan: depois hetan tiha aprovasaun ba kontinuasaun funsoins sira husi CEMG F-FDTL nian ka husi Presidente da República, ba kazu CEMG no Vise-CEMG F-FDTL nian, proposta ba militar, nebe’e bele aseita hodi simu ka la’e”.

Bazeia ba’a artigu 195 temi iha leten, ba’a kazu General Lere no BriGen Filomeno Paixao maka governu lolos halo uluk pedidu ba’a Presidente da Republika hodi husu Presidente nia aprovasaun ba’a CEMG no Vice-CEMG F-FDTL nebe’e hala’o hela sira nia funsoins, sira rua bele kontinua sira nia k’nar nudar CEMG no Vice-CEMG ka lae, karik sira rua nia tinan tama ona ba’a idade reforma nian. Wainhira Presidente Republika aprova kontinuasaun ba’a sira, kontinuasaun signifika katak kargu nebe’e sira hala’o daudaun ne’e bele kontinua to’o durasaun mandatu nian remata. Artigu 195 iha leten fo’o mos dalan ba’a PR atu rejeita kontinuasaun ba’a jenerais nebe’e tama ona idade reforma atu lidera F-FDTL. Konaba faktor idade reforma ba’a CEMG no Vice-CEMG hanesan temi daudaun, PR mak iha liu kompetensia atu deside, la’os governu.

Kestaun mak ne’e, tamba sa Governu la hato’o uluk pedidu ba’a PR atu fo’o aprovasaun ba’a idade reforma maibe hato’o mak proposta atu extende Jeneral Lere ninia kargu nudar CEMG no Vice-CEMG F-FDTL nebe’e mak wainhira hot-hotu tu’ur hanoin didiak, sira rua nia kargu refere ladauk kompleta tinan 4. Tamba durasaun mandatu tinan 4 foin defini ninia limitasaun iha Dekretu Lei No. 7/2014 konaba Estatutu Militar. Antes ne’e la iha limitasaun ba’a durasaun mandatu CEMG no Vice-CEMG F-FDTL nian.  Hakerek’nain hakarak dehan deit katak, wainhira ita ka’er prinsipiu non-retroaktivu no bazeia ba’a Dekretu Lei No. 7/2014 maka Jeneral Lere no BriGen Filomeno Paixao ninia mandatu ka kargu foin hahu iha tinan 2014 no sei termina iha tinan 2018.

Ho esplikasaun hirak temi ona iha leten, oinsa mak Tribunal Rekursu atu julga rekursu kontensioza administrativa husi Governu hasoru PR Taur nia desizaun nebe’e Governu husu atu tesi?

Alem de prosedimentu legais wainhira atu exonera no nomeia CEMG ka Vice-CEMG hanesan temi iha leten no prosedimentu legais ba’a militar sira nebe’e tama ona ba’a idade reforma atu kontinua sira nia kargu, presiza mos atu konsidera katak geralmente objetu disputa administrativa nian iha ambitu Direitu Administrativu mak desizaun Nai-Ulun nian nebe’e konkreta, individual no final. Konkreta signifika objetu disputa husi desizaun refere la abstratu, izemplu katak iha duni Dekretu Presidente nian liga ho exonerasaun no nomeiasaun CEMG/Vice CEMG F-FDTL. Individual signifika desizaun refere la indika ba’a publiku maibe ba’a asuntu ema ida ka rua nebe’e temi iha desizaun nia laran. Final signifika desizaun refere definitivu no hamosu ona efeitu legais ou direitu no dever ba’a parte sira nebe’e temi iha desizaun nia laran.

Bazeia ba’a pontus hirak hato’o iha leten, liga ho rekursu kontensiosu administrativu nebe’e parte governu hato’o ona ba’a Tribunal Rekursu maka tuir Hakerek’nain prosesu julgamentu sei hala’o tuir Sistema Juridiksaun Administrativa. Tribunal Rekursu sei hare-tetu validade Dekretu Presidensial nebe’e PR Taur hasai. Hanesan ema barak iha sosial media argumenta ona ho ida-idak ninia opiniaun, Tribunal Rekursu sei tetu no analiza mos ba’a proposta Governu nian ne’e vinkulativu ka la vinkulativu ba’a PR atu foti desizaun. Tribunal mos sei hare-tetu tuir lei no iha praktika, durante ne’e prosedimentu legais hodi exonora no nomeia CEMG/Vice CEMG la’o oinsa, no mos, objetu disputa (PR nia desizaun) nudar desizaun nebe’e final ka lae?!

Disizaun konsidera final wainhira publika ona iha Jornal da Republika tamba ho publikasaun iha Jornal da Republika mak foin fo’o ninia efeitu legais ka hamosu direitu no deveres ba’a individu sira nebe’e exoneradu no nomeadu husi PR nia desizaun. Ba’a kazu ne’e, Governu iha dilema nia laran, karik publika Dekretu Presidensial refere iha Jornal da Republika tamba sei hamosu implikasoins legais, maski lei mos fo’o dalan ba’a governu husu providensia kautelar ba’a Tribunal atu hapara provisoriamente implementasaun ba’a PR nia desizaun hodi hein prosesu julgamentu la’o to’o nia rohan.

Tribunal harí iha mundu tomak ho objetivu geral ida, sai fatin atu hakotu konflitu. Hein katak ho tribunal ninia existensia no mos ho juizes nia imparsialidade iha sira nia k’nar bele fo’o akordaun ida justu ba’a parte sira, Governu no Presidente da Republika, no mos ba’a sosiadade rasional Timor-Leste bele simu juizes sira nia desizaun nebe’e sei hakotu liu husi Tribunal.

   

Atu taka opiniaun ne’e, Hakerek’nain hakarak fo’o hanoin katak dalaruma ida ne’e mak prosesu harí estadu. Kazu exonerasaun no nomeisaun ba’a CEMG no Vice CEMG F-FDTL sai lisaun bo’ot ba’a entidades hotu iha nasaun ne’e, liu-liu ba’a Ukun-Nain sira. Se Ukun-Nain sira la esforsu atu koko hatu’ur no entende prosedimentus legais ba’a saida deit iha Estadu Direitu Demokratiku ne’e maka ikus bele  fo’o implikasoins politika no sosial  hanesan akontese daudaun.  Mai ita hotu buka atu aprende tan! ** (4/3/2016)***

*Hakerek’nain nudar Observador Politika-Sosial, Dosente iha Universidade da Paz, no Mate-Restu Masakre Santa Cruz, 12 Nov. 1991, Dili. 

CNRT HUSU PR TAUR LABELE KOMPARA SOEHARTO BA XANANA

Señor Prezidenti Repúblika (PR) ema veteranu ida, konserteza nia luta ho prinsípiu no valores to’o iha independénsia ida ne’e. Valór sira ne’e maka ita atu respeita, rona, no konsidera malu, maibé ho nia mensajen ida iha (25/02/2016) ida ne’e kontraditória tiha ona.

Polémika ezonerasaun Maijór Jenerál Lere Anan Timur  seidauk ramata, kazu sira seluk mosu no buras tan. Tanba kazu ezonerasaun ne’e maka Prezidenti Repúblika Taur Matan Ruak hakat ba Parlamentu Nasionál hodi justifika ninia razaun ba deputadu sira, eh, Prezidenti Taur mós sukit (sita) kazu sira seluk iha nia mensajen estadu. Taur dehan, unanimidade orsamentu jerál estadu fó previléjiu de’it ba família Kay-Rala Xanana Gusmão no Dr. Marí Alkatiri—Xanana kaer Timor no Marí kaer Oe-Cusse.

 Mensajen Xefi Estadu nian ne’e todan. Tan ne’e, hamosu reasaun oi-oin hosi bankada sira iha Parlamentu Nasionál.

“Fretilin intende katak Xefi du Estadu sai hanesan símbolu unidade nasionál la’os elementu ida atu kria instabilidade hodi sukit lia ho nia konsekuénsias graves ne’ebé maka bele mosu iha ita nia rai,” Prezidente Partidu Fretilin, Francisco Guterres “Lu-Olo” hato’o lia hirak ne’e liuhosi konferénsia imprensa iha Komité Sentrál Fretilin (CCF), Sungunda (29/02/1016).

Lu-Olo dehan Fretilin manifesta ninia totál diskordansia no la haksolok ho Prezidente Repúblika nia mensajen ne’ebé hato’o iha Parlamentu Nasionál. Tuir artigu 74 númeru 1 Konstituisaun, Prezidente Repúblika hanesan Xefi Estadu sai hanesan símbolu no garantia estabilidade nasionál no unidade estadu ninia, la’os atu ba sukit povu.

Eis Primeiru Prezidente Parlamentu Nasionál esklarese imunidade ne’ebé Prezidente Repúblika iha hodi uza atu diriji mensajen iha Parlamentu Nasionál devia uza ba objetivu prinsipál atu bele kaer koezaun nasionál maibé halo fali para fahe povu Timor-Leste no líder sira.

“Prezidente Repúblika ida labele sai hanesan elementu ida hodi sukit lia ba iha públiku bainhira hakarak hato’o mensajen ba públiku,” Lu-Olo lamenta.

Lu-Olo dehan unanimidade ne’ebé Parlamentu halo ne’e hanesan aktus relasaun ne’ebé di’ak entre líder sira hanesan Xanana, Alkatiri no Lu-Olo rasik nune’e bele lori rezultadu ne’ebé di’ak ba ita nia rain.

“Ami hamutuk hodi hatudu ba jerasaun foun sira atu nune’e dalan ida ne’ebé ami loke bele moos ba jerasaun foun sira tuir mai labele sidi ain,” nia esplika.

Hatán kona-ba ezvajamentu ne’ebé Parlamentu halo, Lu-Olo haklaken “CNRT, PD, Frnti-Mudansa no Fretilin, ami halo konsensualidade ida ne’e para bele trava ezvajamentu osan povu maubere ninian. Verba sira ne’ebé Prezidente Repúblika hodi hateten ami la’os halo unanimidade para lori osan ida ne’e hodi hetan previleiju maibé lori halo imunidade atu trava ezvajamentu ne’ebé Prezidente Repúblika hateten para osan ida ne’e gasta ou ezekuta tuir nia dalan tuir interese povu Timor-Leste ninian”.

Eis gerileiru ne’e deskonfia katak karik mensajen PR iha Parlamentu ne’e atu hasees hosi responsabilidade inkonstitusionál ne’ebé Prezidente deside ba ezonerasaun Lere Anan Timur nian.

“Prezidente hakarak kria krizi institusionál entre partidu boot rua (2) hanesan CNRT ho Fretilin nia laran? Prezidente Repúblika hakarak kauza dez-órden ruma tan iha ema seluk nia uma laran?  Sá objetivu maka lori Prezidente atu bele ba to’o iha ne’ebé maka fó sai nia mensajen ida ne’e? Prezidente hola ona konsekuénnsia katak nia sala tiha ona,” Lu salienta.

Lu apela ba prezidente ne’ebé asumi responsabilidade konstituisionais ho dignidade. Prezidente labele fahe povu atu bele ukun tanba besik eleisaun jerál ona.

Prezidente oras ne’e protezidu hela ho imunidade, maibé depois de mandatu ramata karik Fretilin sei lori Taur Matan ruak ba Tribunál tanba defamasaun? Lu-Olo hatán,prezidente proteje duni ho imunidade maibé Fretilin sei haree kestaun ne’e iha futuru tanba justisa la taka dalan ba sé de’it.

Kona-ba Fretilin nia pozisaun ba Ezonerasaun Lere Anan Timur, Lu-Olo dehan “Ami Fretilin en-prinsípiu laiha buat ida kona-ba ezonerasaun. Atu ezonera Maijór Jenerál Lere, atu nomeia fali Filomeno Paixão ou sé-sé de’it, ba ami Fretilin respeita desizaun estadu nian”.

Maibé, tuir Lu katak desizaun ida ne’e sai tiha polémika tanba tuir baze legál ou lae, maka órgaun soberanu seluk tenke haree para bele rezolve problema ne’e.

“Ida ne’e la’os diskursu no menus liu mensajen xefi Estadu ida ba nasaun. Prezidente Repúblika falla iha oportunidade ida no uza fatin ida in-apropriadu hodi halo mensajen polítika ida afavor ba nia  partidu rasik,” nia afirma.

Deputadu Bankada CNRT, Aderito Hugo da Costa liu-hosi deklarasaun bakanda iha uma fukun Parlamentu Nasionál katak prezidente uza uma fukun Parlamentu hodi insulta no akuza lideres nasaun nian inklui partidu CNRT no Fretilin hanesan instituisaun demokrátiku.

“Uza fatin ida ne’e hodi insultu própriu Parlamentu Nasionál hanesan órgaun soberania ho nia kompeténsia apropriadu atu halo lejizlasaun, fiskalizasaun no desizoens polítiku. Uza mós fatin ida ne’e atu halo mensajen ida ke laiha karakter edukasaun sívika,” Aderito esplika.

Nia hatutan bankada CNRT lamenta tebes Prezidente Repúblika akuza deputadu sira autoriza governu halo ezvajamentu ba osan estadu nian, prezidente halo mensajen haree liu-ba pozisaun politiku pesoál tuir prespetiva Prezidente nian.

Vise Prezidente PN ne’e ezije ba Prezidente Repúblika atu respeita Parlamentu Nasionál hanesan órgaun soberanu, lideres istóriku na’in rua (2) hanesan Xanana no Alkatiri, inklui mós partidu boot rua hanesan CNRT no Fretilin.

CNRT lamenta katak lideres istóriku hanesan Xanana Gusmão, prezidente halo fali komparasaun hanesan Soeharto. Nia dehan Xanana ohin loron laiha uma di’ak ida atu hela, no agradese ba governu tanba bele oferese uma ida Xanana hodi hela.

Deputada hosi Bankada FRETILIN, Josefa Alvares Pereira iha sesaun plenária Segunda (29/02) hateten, mensajen PR nian foin lalais ne’e hanesan mensajen ida ne’ebé atu hamanas, sunu, ke’e, akuza no akredita, la’os mensajen ida ne’ebé atu siviliza povu hanesan Prezidente rasik ko’alia.

Deputada ne’e afirma, ita moris iha demokrásia la’os atu hanorin ema no atu haree de’it ba iha fallas hodi krítika, maibé atu iha kapasidade hodi akompaña dezenvolvimentu, no tenke iha umildade hodi rekoñesse forma objetiva ida ba susesu  sira ne’ebé halo durante tempu tomak ida ne’e.

“Señor PR ema veteranu ida, konserteza nia luta ho prinsípiu no valores to’o iha independénsia ida ne’e. Valór sira ne’e maka ita atu respeita, rona, no konsidera malu, maibé ho nia mensajen ida iha (25/02/2016) ida ne’e kontraditória tiha ona,” dehan deputada ne’e.

Josefa dehan tan katak, PR hahú dezakredita figura na’in rua (2) hanesan Xanana Gusmão ho Marí Alkatiri ne’ebé respeitadu iha mundu, no la konsidera figura rua (2) ne’ebé ita hateten katak hanesan memória instituisionál hodi tau interese ninia popularizmu.

Deputadu Frenti-Mudansa (FM), Jorge da Conceicão Teme dehan, depende ita atu haree ba parte ne’ebé nian, maibé tuir nia PR depois de nia vizita sukus barak nia rona duni povu no hatene povu ninia preukupasaun. Ida ne’e maka nia ba hato’o iha PN.

Nia hatutan sé karik ita la konkorda hodi ofende líderes nasionál balun ne’e espasu iha para bele túr hamutuk ko’alia ba malu hodi bele rezolve. “Iha parlamentu ne’e insulta malu, dún malu koruptór ne’e dezde uluk kedas, la’os foin, maibé ikus ita túr ko’alia ba malu di’ak hela,” Jorge afirma.

Eis Minístru Interior nu’udar mós veteranu, Rogério Tiago Lobato hateten dalan úniku maka diálogu, tanba ita nia rai independente ona. No antes manán rai ida ne’e ita lakon ema barak, ne’eduni lakohi rai ne’e monu tan ba konflitu. Buat ida demokrásia, tuir nia, ema ida-idak iha direitu atu ko’alia, maibé ko’alia halo didi’ak para labele halo ema seluk hakfodak. Ne’eduni, líder sira presiza túr hamutuk halo diálogu, tanba ho diálogu maka bele hetan solusaun.

Diretór Forum ONG Timor-Leste (FONGTIL), Arsenio Pereira hateten, relasiona ho deklarasaun Prezidente Repúblika (PR) nian iha PN, tuir loloos PR maka fó garantia tanba mandatu konstituisaun nia fó garantia ba unidade nasionál, no estabilidade. Maibé, depende ba ema ida-idak nia interpretasaun. Katak, ita interpreta ida ne’e bele fó impaktu ba ita nia dezenvolvimentu, no ba estabilidade.

Maibé, nia esplika, sé interpreta deklarasaun ne’e hanesan situasaun ne’ebé ladi’ak, tuir loloos ne’e ita sira ne’ebé iha kraik bele tau ita nia án liu-liu labele monu lalais ba interese sira, tanba ita monu lalais. Ida ne’e maka ita bele hetan instabilidade.

“Sé mosu instabilidade ema dehan terseira pesoa ne’e bele aproveita situasaun ne’e, satán agora dadauk ita halo negosiasaun mina nian no halo demonstrasaun hasoru Austrália ne’e buat ida ne’ebé mais fásil, no frázil kuandu ho situasaun sira hanesan ne‘e tanba ema bele aproveita. Ne’eduni, Timor lakohi ida ne’e,” dehan Arsenio iha Sentru Konvensoens Díli, Sábadu (27/02).

Hatán ba deklaraun PR nian ne’ebé hateten, Xanana kaer iha Timor, Marí Alkatiri kaer iha Oe-Cusse hodi fó projeitu ba sira nia família, Arsenio dehan, ida ne’e bele sai hanesan defamasaun. Maibé, sé PR iha dadus kompletu ne’e laiha buat ida. Sé laiha, Marí ho Xanana bele lori PR ba Tribunál relasiona ho asuntu defamasaun.

Relasiona ho kestaun ne’e, tuir nia, sé bainhira iha keixa ruma ba iha Komisaun Antí Korrupsaun (KAK) ho PDHJ bele halo investigasaun tanba ida ne’e sira nia serbisu hafoin lori ba Ministériu Públiku no kontinua ba Tribunál.

Entretantu, Dekana Fakuldade Siénsias Sosiais Universidade de Díli (UNDIL), Cesaltina Angela Soares hateten deklarasaun Prezidente ne’e hanesan preukupasaun ne’ebé maka nia ba tour iha suku sira saida maka komunidade sira preukupa, la sees malu. Ne’ebe, prezidente iha razaun atu ko’alia ba Parlamentu.

 Deklarasaun PR bele hamosu instabilidade? Angela esplika, la’os atu hamosu instabilidade. Instabilidade katak polítiku sira halo ajitasaun ou propaganda barak, maibé ema hotu kompriende katak dezde 2006 ne’e, oinsá instabilidade ne’e mosu, impaktu ba sé no sé maka benefísia hosi instabilidade ne’e.

“Rai ida demokrásia, liberdade boot, buat ida sala ema tenke hasee. Tuir loloos iha Psarlamentu opozisaun tenke forte para hasee sasán sira. Opozisaun ohin loron laiha entaun Prezidente tenke hasee. Ita povu ki’ik hasee mós ema la rona, mídia no akadémika sira hasee mós sira dehan ne’e polítika sira maka iha kotuk, entaun prezidente di’ak liu hasee,” nia tenik.

Nia dehan, laiha impaktu ba estabilidade tanba nasaun ne’e ita hatene sira ne’e sé-sé, sira hirak ne’e sé, sira hirak ne’e mesak luta ba rai ida ne’e, mesak hanoin interese povu no rai ne’e maka’as.

PR halo ezonerasaun tanba defende tranzisaun lideransa? Angela aseita katak kadernizasaun ne’e importante ba jerasaun sira, atu rai hela lisaun di’ak ba jerasaun foun sira. Jenerál Lere nia kargu ne’e importante liu interese nasionál, ou seitór hotu-hotu ne’ebé vitál ne’e importante liu.

Nia dehan sé ita la halo kadernizasaun entaun bainhira maka bele promove membru seluk. Militár ne’e la’os hanesan sivíl ne’ebé haree de’it ema ne’e matenek no serbisu di’ak foti nia sa’e, maibé militár ema tenke sa’e hosi eskada (ajente) maka to’o jenerál.

“Ema dehan sidadaun Timor hotu-hotu polítiku maka barak liu. Ema hotu ko’alia polítika hanesan ema sientista maibé  ita apriende ona kazu 2006 ema barak vítima, susar, dezenvolvimentu la la’o,” Dekana ne’e haktuir. (Efrem)

Matadalan

DON CARLOS SEI PARTISIPA ORDENASAUN BISPO FOUN

Eis-Bispu Dioseze Díli, Don Carlos Filipe Ximenes Belo saudade tebes Sarani Timor-Leste no Promete sei vizita Timor hodi partisipa iha seremónia Ordenasaun Bispu Don Virgilio da Silva do Carmo no instolasaun bispu Dioseze Díli.

“Ha’u konsege hasoru Amigo Don Carlos iha Portugal, nia saudades sarani Timor. Don Carlos hato’o beijinhos, abracos, saudades, nst ba sanani Timor, nia (Don Carlos) promete atu mai iha odenasaun Don Virgilio, maibé ita hein,” Bispu Dioseze Baucau, Don Basílio do Nascimento hato’o lia hirak ne’e bainhira selebra misa iha Igreja Katedrál Baucau, Domingu (21/02/2016).

Bispu Baucau konta katak baihira ba Portugal halo tratamentu saúde, konsege hasoru Don Carlos, sira ko’alia oituan kona-ba situasaun polítika Timor, kreda Timor, nune’e Don Carlos promete sei mai Timor.

Don Basílio dehan ordenasaun Don Virgilio sei hala’o iha loron 19 Marsu, iha Uma Adat Tasi tolu, Díli, ne’ebé sei partisipa mós hosi eis Bispu kongregasaun Don Bosco, Don Carlos.

Arsebispu ne’e husu ba sarani Baucau tomak atu bele partisipa másimu iha misa ordenasaun Don Virgilio tanba durante halo misaun, Don Virgilio iha de’it dioseze Baucau hanesan Fatumaca no Venilale.

Bispu Baucau dehan Don Virgilio ne’e mi hosi dioseze Bauncau, no nia serbisu barak liu iha dioseze ne’e, ita sai família boot Don Virgilio nian ne’ebé Papa deside ona atu ka’er misaun foun hanesan bispu Díli, entaun sarani dioseze Baucau tomak tenke suporta másimu ba Bispu foun.

“Don Virgilio nia ordenasaun la hanesan ho Ha’u no Don Norberto. Ami rua ordena tiha iha Díli depois ba tomada de pose (instolasaun) iha fatin seluk, Don Virgilio ordena iha Díli no instolasaun kedan iha momentu ne’e kedan,” Bispu esplika.

Loron 19 marsu, Don Virgilio ordena nu’udar Bispu, no iha momentu hanesan instolasaun Don Virgilio da Silva do Carmo hanesan Bispu Dioseze Díli.

Don Basílio esplika misa sei realiza iha Tasi Tolu, Díli, tanba ordenasaun ne’e sei partisipa másimu hosi sarani, leigos, madres, padres no ukun na’is sira, nune’e Bispu hili selebra misa iha fatin refere. (Efrem)

Matadalan

Veteranus Sei Infrenta Dezigualdade

DILI - Presidenti Republika Taur Matan Ruak hatete, Oras nee veteranu sira sei enfrenta hela dezigualdade entre sira, neebe simu ona apoiu Estadu no sira-neebe ladauk simu, maibe veteranu sira labele fahe malu.

Xefe Estadu hatete, estrutura no organizasaun neebe mak diskute durante konferensia Nasional ida-nee hanesan hakat ba oin atu fo lian ba veteranu sira, organiza sira-nia partisipasaun no hametin unidade.

Ita nia veteranu sira sei enfrenta hela dezigualdade entre sira-neebe simu ona apoiu Estadu no sira-neebe ladauk simu, maibe veteranu sira labele fahe malu, tamba maturidade no determinasaun neebe ita-nia povu no ita-nia veteranu sira hatudu atu buka no harii pas no estabilidade, hanesan bensaun ida ba Timor-Leste,” dehan PR Taur, bainhira halo abertura ba konferensia veteranus iha CCD, Kinta (03/03/2016).

Presidente Republika Taur Matan Ruak afirma tan katak, enkontru nasional ida-nee lori duni hakat foun atu bele implementa solusaun hirak neebe estavel no tasak ona ba veteranus-nia problema sira.

Iha fatin hanesan Presidenti Meja ba kongresu veteranus Francisco Guterres Lu-Olo hatete, ema hotu hakarak veteranus sira sei buka para atu bele kontribui nafatin, ba ida nee mak halibur malu hamutuk iha fatin nee. Informasaun kompletu iha STL Jornal no STL Web, edisaun Sabado (5/3/2016). Carme Ximenes

Suara Timor Lorosae

Tribunál kondena trafikante ema sira nian ne'ebé lori labarik-mane síriu Aylan Kurdi

Trafikante sira hetan absolvisaun hosi krimi neglijénsia ne'ebé halo ema na'in 12 mate.

Tribunál turku kondena ona ba kadeia tinan haat ba ema na'in rua ne'ebé halo trafikante ba ema sira tanba ró ne'ebé mout no halo Aylan Kurdi, labarik-mane síriu mate no imajen hosi nia mate-isin iha rai-henek sai hanesan símbolu hosi trajédia krizi migratóriu nian.

Tribunál Bodrum (iha sudueste Turkia nian) deklara ona Muwafaka Alabash ho Asem Alfrhad sai kulpadu iha "tráfiku migrante sira nian" no kondena ona sira ba kadeia tinan haat ho balun, maibé simu absolvisaun hosi akuzasaun "neglijénsia nian" ne'ebé halo refujiadu sira mate, informa hosi ajénsia Dogan.

Trafikante na'in rua, ne'ebé iha nasionalidade síriu, bele hetan kondenasaun to'o tinan 35. Faktu ne'e relasionadu ho akontesimentu loron 02 Setembru 2015 bainhira ró ida ne'ebé lori refujiadu sira mout iha largu Turkia nian bainhira hakarak to'o iha illa gregu Kos.

Ema na'in 12 mate ona iha naufrájiu, entre sira maka labarik-mane síriu ho tinan 3, Aylan. Imajen sira hosi Aylan nia mate-isin, iha rai-henek sira iha tasi-ibun ida turku nian, haleu iha mundu no hamosu indignasaun maka'as.

Fonte: AFP

Xina duun EUA militarize Tasi parte Sul Xina

Xina ohin duun EUA militariza Tasi hosi Sul Xina no hatutan tan katak instalasaun unidade nomós ekipamentu militár ba iha illa ne’ebé halo kontrolu ba rejiaun ne’e hanesan resposta ida “intruzaun” norte-amerikana.

“Maioria hosi embarkasaun nomós aviaun milit’ar hirak ne’ebé liu hosi teritóriu refere hosi Estadus Unidus Amérika”, tenik Fu Ying, portavós hosi Asembleia Nasionál Populár (ANP), órgaun másimu lejislativu xinés.

Fu haktuir hikas kona-ba estratéjia hosi Governu atuál, ne’ebé Barack Obama halo mudansa “ba deslokasaun 60% hosi marina norte-amerikana ba iha tasi rejiaun Ázia Pasifiku".

"Ida ne’e la’os movimentu militarizasaun nian?", Fu kestiona, durante konferénsia imprensa ne’ebé hala’o bainhira hahú sesaun anuál ANP nian.

Iha jornalista besik rihun ida nia oin, hosi Xina nomós estranjeiru, lejisladora ne’e akuza Washington "ladun apoia" pasifikasaun ba iha Tasi parte Sul Xina.

"Tuir lolos EUA molok ne’e tenke apoia diálogu entre Xina ho nasaun viziñu sira", nia defende. Tuir Fu Ying, "bainhira dehan katak Xina militariza rejiaun ne’e, ida ne’e hamonu ema ba sala".

Pasífiku sai hanesan fatin ba problema ne’ebé akontese iha semana hirak liu ba, hafoin imprensa norte-amerikana nomós fonte ofisiál hosi Governu Tiwan fó sai katak Xina instala ona miseis terra-ar iha illa Woody, arkipélagu Paracel, ne’ebé Taiwan ho Vietname mos hadau malu ba.

Iha arkipélagu Spratly, ba liu parte sul, ne’ebé Xina, Filipina, Malázia, Taiwan, Vietname no Brunei reklama, totál ka parsialmente, hanesan “illa bot aziátika nian ne’ebé harii illa artifisiál, inklui ho pista aviasaun balun.

Pekin insisti katak iha direitu soberania kuaze totál ba iha Tasi parte Sul Xina, via marítima estratéjika ne’ebé fó sai ona mina negosiu tersu ida internasionalmente.

EUA larekoñese soberania xineza iha rejiaun ne’e no sira haruka beibeik, unidade militár hodi halo patrulla “atu defende liberdade navegasaun”.

Fu defende katak Xina ne’ebé tau parte milit’ar bot ba iha illa ne’ebé parte barak hadau malu ho objetivu “mantén dame no estabilidade iha rejiaun refere”.

"Tanba illa ho resife sira besik liu ho Xina continental, ho nune’e maka tenke kontinua nafatin ho sistema defeza rasik", dehan, no hatutan tan katak Xina “sei lapara atu defende ninia soberania”.

SAPO TL ho Lusa 

Coreia do Sul no EUA inisia diálogu ofisiál kona-ba eskudu antimísseis

Coreia do Sul no Estadus Unidus  Amérika iha ohin hahú diálogu kona-ba  instalasaun  "eskudu antimísseis" norte-amerikanu THAAD iha nasaun  aziátiku, projetu ne’ebé  rejeita tebes hosi  Coreia do Norte no Xina.

Negosiasaun formalmente la’o ona hafoin parte rua aprezenta iha Seul grupu traballu konjuntu foun ida, hatete  ba Efe hosi portavóz Ministériu Defesa iha Seul.

Grupu traballu ne’e, lidera  hosi  tenente jenerál sul-koreanu Jang Kyung-soo no norte-amerikanu Robert Hedelund, hahú ohin  reuniaun dahuluk nian iha ministériu atu aborda futura instalasaun eskudu antimísseis norte-amerikanu.

Órgaun ne’e hamutuk sei halo debate ida sériu ba asuntu sira hanesan efikásia militár iha THAAD, fatin ne’ebé  adekuadu liu ba iha instalasaun, kalendáriu ezekusaun ba projetu, iha divizaun kustu no impaktu ba iha seguransa no meiu ambiente, entre sira seluk, hatutan  portavóz Defeza ne’e.

Seul no Washington anunsia ona iha fevereiru katak atu hahú halo negosiasaun ba instalasaun iha territóriu sul-koreanu no eskudu antimísseis hanesan resposta ba teste nukleár no lansamentu fogete espasiál ida -- konsideradu hanesan ba teste mísseis -- hosi Coreia do Norte nian.

Projetu THAAD, sistema ida deseñadu atu interompe mísseis iha faze voo terminál nian, hetan  protestu barak hosi parte Coreia do Norte, ne’ebé  konsidera ameasa ida direta ba nia seguransa, hanesan moos Xina no, maibé medida menor, Rúsia nian.

Pekin deklara sira nia  opozisaun kontra  instalasaun sistema ne’e, konsidera  katak nia  radar sira bele kapta informasaun militár konfidensiál xineza nian, maibé Moscovo defende katak sistema ne’e permite inspesiona espasu aéreu sira iha rejiaun balun iha extremu orientál.

Iha inísiu konversasaun ofisiál nian akontese iha  momentu tensaun nia-laran, hafoin Coreia do Norte lansa, iha kinta-feira ne’e, mísseis barak ho alkanse besik nian ba iha tasi no ohin  ameasa katak sei halo atake nukleár preventivu, hafoin  simu sansaun foun hosi Konsellu Seguransa ONU.

Fiar katak eskudu ne’e bele  instala besik ba fatin Pyeongtaek nian, iha Kilómetru 70 hosi  Seul ne’ebé maka sei  konsentra  tebes ba  instalasaun militár norte-amerikanu.

SAPO TL ho Lusa

Direitu indíjena iha Brazil sei avalia hosi Nasoins Unidas

Relatora espesiál  Nasoins Unidas kona-ba  direitu povu indíjena, Victoria Tauli-Corpuz, sei vizita Brazil entre loron  07 no 17 marsu ne’e atu  identifika problema  ne’ebé  afeta  komunidade sira iha nasaun ne’ebá.

"Enkuantu populasaun indíjena iha Brazil ne’e oituan liu, dezafiu ne’ebé  sira hasoru agora dadaun maka barak liu", hatete relatora ne’e iha komunikadu ne’ebé fó sai horisehik iha Genebra.

Relatora, ne’ebé sei halo  segimentu ba rekomendasaun prinsipál maka formula ona iha 2008 hosi nia predesesór, James Anaya, hatutan iha komunikadu ne’e katak sei ezamina "ba proposta emenda sira kona-ba povu indíjena nian, iha demarkasaun no protesaun ba rai indíjena, impaktu hosi projetu dezenvolvimentu ne’ebé ho eskalaun boot, hanesan moos atualizasaun sira kona-ba saúde nian" komunidade ne’ebá nian.

Durante nia vizita, Victoria Tauli-Corpuz previstu ona katak sei halo enkontru ho membru sira governu brazileiru nian, funsionáriu ONU, reprezentante organizasaun laós-governamentál, komunidade indíjena Brazília, no Estadu  Mato Grosso iha Sul , Bahia no Pará.

"Ida ne’e hanesan momentu oportunu (..) atu identifika  inisiativa pozitiva ne’ebé foti hosi Governu, sosiedade sivil no líder indíjena sira", hatete Tauli-Corpuz.

Relatora espesiál sei aprezenta ninia konkluzaun no rekomendasaun finál ba Governu no ba Konsellu Direitus Umanus Nasoins Unidas iha setembru 2016.

Maibé tama ba finál misaun nian iha Brazil prevé ona atu halo aprezentasaun ba balansu vizita ne’e.

Membru hosi povu indíjena Kankana-ey, iha Igorot, rejiaun Cordillera Filipina nian, Victória Tauli-Corpus hanesan ativista ida ba Direitus Umanus no espesialista iha direitu povu  indíjena nian.

Relatore  espesiál sira hetan mandatu hosi Konsellu Direitus Humanus Nasoins Unidas sei sai independente ba kualkér governu ka organizasaun no presta servisu ho karákter ida individuál.

SAPO TL  ho Lusa