PETISAUN BA PR TAUR, ESTABILIDADE NO DIGNIDADE VETERANUS

Karta petisaun ne’ebé mak foin lalais veteranu ativu iha F-FDTL hato’o ba Prezidenti Repúblika (PR), Taur Matan Ruak mak preokupasaun konaba estabilidade nasionál no Estadu dignidade veteran sira nian depois reforma.

Xefi Estadu Maior das Forsas Armadas, F-FDTL, Maijor Jeneral Lere Anan Timur hateten katak, veteranus la’os kontra Prezidenti Repúblika nia desizaun, maibé Prezidenti Repúblika bele garante estabilidade nasionál ba povu ka la’e.

“Ami hato’o ami nia aspirasaun nu’udar veteranus Falintil ninian, ami tau de’it pontu rua, ida mak estabilidade nasionál. Ami foti kestaun ba Prezidenti Repúblika katak, ami sai hotu ne’e, Prezidenti Repúblika bele infrenta situasaun ne’e ka la’e, se situasaun aat ruma akontese,” dehan Lere Anan Timur ba Jornalista sira iha Palácio Nobre Lahane Dili, Sesta (06/05).

Lere Anan Timur esplika katak, kestaun ida seluk ne’ebé mak veteranus aprezenta ba Prezidenti Repúblika mak, dignidade Falintil ninian.

“Diálogu entre Prezidenti ho ami veteranu sira, bazeia ba petisaun ne’ebé ke ami halo ba Prezidenti Repúblika,” katak Lere Anan Timur.

Xefi Estadu Maior ne’e afirma katak, petisaun veteranus nian ne’e mós, la’os atu kontra Prezidenti Repúblika no a favor ba ema ida.

“Kuandu ami ba vida sivil ne’e, Prezidenti garante ami nia seguransa ka la’e,” Lere Anan Timur esklarese.

Lere Anan Timur fundamenta katak, iha diálogu ho Xefi Estadu ne’e ko’alia buat barak, maibé ambiente Palácio Nobre Lahane ne’e, la serve atu ko’alia buat sira ne’e hotu.

“Entaun ne’e mak Prezidenti Repúblika hateten katak, ita buka tok tempu seluk atu halo reuniaun informal ida, tanba ohin ne’e kuaze formal liu, ita atu ko’alia mós, la livre atu ko’alia saida mak ita sente,” informa Lere.cos

Jornal Nacional

Negosiasaun Fronteira Maritima, Alkatiri: “Tenke Obriga Australia Atu Kumpri”

DILI – Negosiasaun Fronteira Maritima entre Timor Leste ho Australia oras nee iha hela prosesu nia laran, maske Australia rasik laran todan tanba nee hakarak ka lakohi TL tenke obriga Australia atu kumpri.

Deklarasaun nee fo sai husi Eis Primeiru Ministru, Mari Alkatiri, ba STL iha Hotel Timor, Tersa (10/05/2016).

Australia laiha tan dalan seluk sira tenke perpara sira nia komisariu atu ba iha konsiliasaun  obrigatoriu mais desijaun neebe mai husi komisariu sira nee la vinkula signifika katak sira bele la kumpri nafatin, tanba nee ita tenke servisu nafatin hodi halo presaun nafatin para obriga Australia para atu kumpri,” dehan Alkatiri.

Nia hatutan TL iha posibilidade boot atu manan Australia maibe se la obriga Australia maka Australia sei la kumpri nafatin, tanba nee TL kontinua fo presaun nafatin. Laos nee deit Mari Alkatiri mos hatete vantajen ba TL boot tebes wainhira TL manan Australia iha negosiasaun fronteira maritime, no ba oin tenke fanun fila fali komuniade internasional hosi luta mos ba TL nia direitu.

Iha fatin hanesan Responsavel Movimentu Kontra Okupasaun Tasi Timor (MKOTT), Juvinal Dias, hatete bajea ba prinsipiu no direitu internasional TL iha direitu tomak no boot liu atu hetan area Tasi Timor neebe mak durante nee Australia okupa.

Nunee mos Observador Politika, Joaozito Viana, hatete TL iha ninia direitu tomak atu ezije konaba Fronteira Maritima. Informasaun kompletu iha STL Jornal no STL Web, edisaun Kuarta (11/5/2016). Thomas Sanches/Joao Anibal

Suara Timor Lorosae

CNRT Husu PM Rui Tenki Uza Kompetensia Demite Membru Governu

DILI - Reprezentante povu husi Bankada CNRT iha uma fukun Parlamentu Nasional (PN) husu Primeiru Ministru (PM) Rui Maria de Araujo, atu uza Kompetensia hodi dimite membru governu neebe mai husi eis Bloku Koligasaun hanesan Partidu Demokratiku (PD).

 Tuir Deputada Bankada CNRT Maria Rosa De Camara “ Bisoi” liu husi sesaun Plenaria Tersa (10/05/2016) iha PN husu Sekretaria estadu Asuntu Parlamentar, atu fo hatene ba Primeiru Ministru zere kompetensia hodi hasai Membru governu neebe mai husi Eis Bloku Koligasaun.

Ita agora fulan Maiu ona, hau husu ba sekretaria Estadu, Primeiru Ministru wainhira mak zere kompetensia hodi hasai Ministeru sira neebe mak mai husi bloku koligasaun sai, hodi tau fali Ministru foun,” dehan Bisoi.

Nia hatete mandatu nee hela deit ona fulan sanulu resin hat, Primeiru Ministru too agora seidauk kumpri ninia dever atu eskliu ou hatama ministru foun, tan nee husu tempu badak hasai nune kumpri dever iha governasaun.

Hatan ba Preokupasaun nee Prezidente Partidu Demokratiku Adriano Nacimento hatete Karta neebe mak CNRT haruka hili opsaun rua independete ou lori partidu rezigna Aan, tan nee PD hili Indepdente hodi kontinua iha governu.

Nunee mos PM Rui Maria de Araujo, hatete nia sei la responde ba deklarasaun neebe fo sai iha telvijaun no too oras nee mos nia rasik seidauk simu karta formal husi CNRT. Informasaun kompletu iha STL Jornal no STL Web, edisaun Kuarta (11/5/2016). Timotio Gusmao

Suara Timor Lorosae

Jornalista TL Fiar Konsellu Imprensa Garante Imparsialidade

DILI - Jornalista Timor oan fiar estrutura Konsellu Imprensa neebe simu tomada de pose sei garantia Imparsialidade, Independente no rezolve problema neebe Jornalista sira hasoru maske konseilu nee foin hari.

Tuir Xefi Redasaun Jornal Nasional Diario Alves da Costa katak nudar Jornalista no mos xefi Redasaun Jornal Nasional Diario no Semanariu senti orgollu tamba Timor Leste iha ona konseilu Imprensa hanesan orgaun Independente no mahon ba jornalista Timor oan hotu.

Hau nudar Jornalista hau nia esperansa ba ita nia konseilu Imprensa sei halao servisu ho diak, sira neebe mak tur iha konseilu nee iha esperensia barak nune sei halao knar ho independente, inparsial,” dehan Alves ba STL Tersa (10/05/2016) iha Parlamentu Nasional hafoin Partisipa seremonia tomada depose KI.

Hatan kona ba KI sei Defende aktividade Jornalismu, Alves hatete institusaun konseilu Inprensa ninia knar mak denfede no garantia imparsilidade liberdade Imprensa no mos garantia jornalista ninia servisu no liberdade imprensa.

Nunee mos Repzentante Xefi Redasaun Jornal Independente Eugenio Pereira hatete estrutura konsellu Imprensa neebe mak simu ona tomada de pose hein katak komesa ba oin bele tau ajenda neebe importante hodi rejolve problema Jornalista sira nian. Informasaun kompletu iha STL Jornal no STL Web, edisaun Kuarta (11/5/2016). Timotio Gusmao

Suara Timor Lorosae