PNTL Baku F-FDTL Ne’e Komportamentu Individuál

DILI, (ANTIL) – Ministru Interior, Longuinhos Monteiro informa, membru Polísia Nasionál Timor-Leste (PNTL) baku membru FALINTIL-Forsa Defeza Timor-Leste (F-FDTL) ne’e komportamentu individuál, la’os reprezenta instituisaun.

Longuinhos hato’o kestaun ne’e ba jornalista sira iha Palásiu Prezidénsia Repúblika, Bairu-Pité, Dili, Kuarta (24/8), hafoin ramata inkontru ho Prezidenti Repúblika, Taur Matan Ruak.

Kestaun ida ne’e, nia haktuir, Prezidenti Repúblika mós levanta iha inkontru laran no sujere atu rezolve lalais problema refere.

Longuinhos dehan, Komandante PNTL no F-FDTL maka tenki rigorozu liu-tan foti desizaun ba membru sira ne’ebé komete krime infrasoens. “Orsida kedas ha’u sei bolu Komandante Jerál PNTL”, nia tenik.

Tanbasá kazu ne’e akontese, eis Komandante Jerál PNTL afirma, ne’e vítima ho suspeitu maka tenki hatán sira nia kazu tanba nia lá reprezenta komportamentu membru forsa no defeza hirak ne’e iha públiku.

Antes ne’e, Majór Jenerál Lere Anan Timur hatete membru PNTL baku membru F-FDTL ne’e hamutuk dala 20 ona. Nia rasik konfuzaun tanbasá hahalok ida ne’e tenki monu ba ninia membru sira. (jornalista: Xisto Freitas; editora: Rita Almeida)

Foto: Ministru Interior, Longuinhos Monteiro halo intervista ho jornalista sira iha Palasiu Prezidensial, Kuarta, (24/8). Foto ANTIL

Estabilidade Politika Importante Atu Salva Valór Istóriku

DILI, (ANTIL) – Referendu ho rezultadu ukun rasik-án nu’udar opsaun ida importante hodi refleta mak kontinua asegura obra istóriku ne’ebé maioria povo deside liu-hosi luta naruk durante tinan 24 nia laran.

”Responsabilidade ema hotu nian, polítiku sira nian atu kontinua asegura, salva guarda ba valór istóriku ida ne’e ho koidadu ba dezenvolvimentu nasaun nian ba oin mak estabilidade polítika, defesa, seguransa, bo’a governasaun, justisa, demokrasia”, Prezidenti Parlamentu Nasionál, Aderito Hugo da Costa ba jornalista sira iha Sentru Konvensaun Dili, Kuarta, (24/8).

Hirak ne’e hanesan prinsípiu fundamentál ida ne’ebé prense iha konstituisaun. ”Ema balun dehan luta ba ukun rasik-án hanesan mehi de’it, maibé ikus mai komunidade internasionál rekoñese luta no direitu povu nian hodi define rasik futuru”, Hugo afirma.

Progresu hatudu hela, mundu rekoñese prinsípiu fundamentál tolu ne’ebé a’as mak demokrasia, justisa no direitus umanus. Pontus ne’e, tuir nia haree, Timor-Leste ho orgullu ko’alia iha rejionál no mundu. Tanba, harii nasaun ho prinsípiu hirak ne’e.

Rezultadu referendu ne’ebé fó sai iha loron 6 fulan-Setembru 1999 mak vota ba autonomia 4,591,563 votante ho pursentu 39.34. Vota ba ukun rasik-án ho votante 7,080,998 ho pursentu 60.00. Validade votus 11,672,561 ho pursentu 99.05. Votus invalidu no nulu 112,474 ho pursentu 0.95. Total votante 11,785,035 ho pursentu 100. Votante ne’ebé rejistu 12,392.040 ho pursentu 95.1. (jornalista: Rita Almeida)

Foto: Prezidenti Parlamentu Nasionál, Aderito Hugo da Costa ba jornalista sira iha Sentru Konvensaun Dili, Kuarta, (24/8). Foto ANTIL

L-7 LAKOHI KRIZI MOSU FILA FALI

Eis gerileiru komandante Falintil rejiaun III, Cornelio Gama alias L-7  hatete, oknum Falintil – Forsa Defesa Timor Leste (F-FDTL) ho Polisia Nasional Timor Leste (PNTL) ba asalta nia rezidensia iha semana ne’e, nia parte husu atu eduka forsa sira ho professional para labele mosu tan krizi.

“Krizi sira ne’e labele mosu tenke eduka ita nia forsa sira ne’e para sai diak, se la’e aban bainrua mosu tan konflitu, Xanana ukun krizi, Ramos Horta novel de paz ukun krizi, Taur ukun krizi aban bainrua ukun fila fali diak ka lae,” dehan, L-7 ba Jornalista sira iha Bidau Mota Klaran, Tersa (23/03/2016).

L -7 reforsa liutan sala ne’e kontinua mosu tamba Veteranus deit mak halo sala hodi hatauk povu.

“Sala sira ne’e se mak halo veteranus sira deit, sira fila laran seidauk halo buat ida, veteranus deit mak halo sala, halo sala, hatauk povu tun sae,” L-7 dehan.

Tamba ne’e, L-7 afirma sei aban bainrua jerasaun foun sira mak ukun diak ka lae, sei ukun diak tenke hadomi imi nia povu, hakuak ema hotu, labele ho emosaun – emosaun deit nasaun sei la ba oin, rai Timor kikuan ema bele ukun fali Timor.

“Ita mos bele hamutuk  fali ho nasaun seluk atu estraga ita nia nasaun mos iha, mais ami FALINTIL ami lakohi uluk ha’u dehan kedas kartus ida ema labele hasa’i, ami mate, ami nia óan, be óan iha ami intrega poder, historia ba sira nasaun imi nian nasaun ne’e lulik, tamba maromak mak fó la’os ema seluk mak fó,” L-7 hatete.

Tamba ne’e, L-7 reforsa liutan labele mosu tan asaltu-asaltu,PNTL- FDTL tenke respeitu povu, sei kaer labele tuku baku, kaer lori ba kadeia, sé baku, tuku, tebe ne’e violensia ona, depois sira mak los fali.

Nune’e L-7, husu tenke halo los lei ne’ebe mak vigora iha Timor Leste, sei polisia halo’o kirmi se mak ba kaer sira?, entaun labele mosu tan buat sira ne’e tenke haree didiak ba lei sira ne’e.

“Ha’u husu ba nivel nasional loro sa’e, loro monu, tasi feto, tasi mane husi Jaco to Oekusi liu-liu ba F-FDTL ho PNTL tenke ho nia pozisaun professional hadomi ó nia povu hanesan o nia fén ho óan,” L-7 hatete.

“Hau respeitu Nasaun Republika Demokratika Timor Leste (RDTL) tamba ha’u rasik kontribui hodi liberta nasaun ida ne’e, iha tinan 24 nia laran,” L-7 afirma.

L-7 hatuir deskonfia dehan Mauk Moruk subar hela iha rejidensia entaun realidade katak Polisia Nasional Timor Leste (PNTL) no Falintil-Forsa Defeza Timor Leste (F-FDTL) mak oho Mauk Moruk ne’e nusa mak sei deskonfia nia moris fali entaun signifika katak saudozu sira mate sei moris hotu.

“Lolos membru sira ne’ebe mak asaltu ba ha’u nia rejidensia tenke respeitu, tamba hau mós jeneral ba funu libertasaun ida ne’e, uluk sei iha ai laran ne’e asalta militar Indonesia atu hadau kilat hodi funu hasoru Indonesia to’o ukun rasik a’an,” L-7 hatuir.

Tamba ne’e, L-7 senti tristi iha komerasaun loron Falintil 20 agostu ba dala 41 ne’e lolos ne’e sidadun hotu-hotu tenke orgullu hodi ba partisipa ba loron falintil ne’e laos forsa sira lori fali kilat bót hodi asalta rejidensia.

“Forsa sira ne’e lori kilat metrallador lori ba se ba ha’u nia oan no bei oan sira, iha lei la hakerek tok hanesan ne’e kuandu iha lei lolos ne’e se kilat ba ema ida ne’e krimi, la iha buat ida tanba ita hotu iha justisa nia okos,” L- 7 dehan.

L-7 haktuir liutan, ho akuzasaun falsu ne’e ladun diak ida wainhira públiku hotu hatene ona katak Mauk Moruk ne’e mate tiha ona nusa mak sei deskonfia moris fali, Mauk Moruk ne’e bele moris fila fali ne’e bosok ona.

“Uluk ami iha ailaran ne’e povu ne’e ami tane ás hanesan osan mean, ba membru F-FDTL no PNTL tenke respeitu povu tanba forsa sira mak lutu ba nasaun ida ne’e la’os atu asaltu povu ne’e krime bot,”. L-7 sublina.

L-7 la fo sala ba Xefe Estadu Maior Jeneral FALINTIL-Forsa Defeza Timor Leste (F-FDTL), Lere Anan Timur, tamba membru sira ne’ebe mak ba asalta nia rejidensia hodi husu deskulpa ne’e komandu mak organiza ne’e tenke responsabilidade ba Komandante ne’ebe mak orienta.

Konaba kazu ne’e,  L-7 hatete nia parte sei la hato’o kesia maibe nia oan ho be oan sira ne’ebe mak oknum sira lori kilat ameasa no mos defama mak sei hato’o keisa ne’e hodi prosesa kontinua ba Tribunal.

Eis gerileriu Komandante Falintil Rejiaun III, Cornelio Gama alias L-7  mensagen ba Timor Leste liu-liu ba instituisaun Falintil-Forsa Defeza Timor Leste (F-FDTL) no Polisia Nasional Timor Leste (PNTL) tenke prevene violensia hasoru povu ki’ik ne’ebe mak sei moris terus no susar hela. Eus

Jornal Nacional

AUTOR RAMA AMBON MAIORIA HO MOTORIZADA – JUVENTUDI 19 MAKA SAI ONA VÍTIMA

Jestor Sistema Atensaun no Responde Sedu (AtReS), Organizasaun Não Govermental (ONG) Belun, Marilia da Costa informa katak, tuir informasaun ne’ebé maka organizasaun ne’e rekoella husi rede principal sira iha terrenu rejista katak, autores operasaun hana ema ho rama ambon iha kapital Díli ne’e maioria autór sira ho motorizada (uza motorizada).

No númeru ne’ebé BELUN rejista hahú husi fulan Janeiru to’o Agostu tinan ida ne’e hamtuk na’in 19 mak sai ona vítima ka ema hana.

“Bazeia ba dadus ne’ebé ami hetan iha terrenu liu husi sistema AtReS rejista katak autór sira ne’ebé maka involve-an iha asalta rama ambon ne’e barak liu maka uza motorizada 1 ho ema na’in 2 mak sa’e no uza kapasete metin,” informa Marilia da Costa ba jornalista sira liu husi konferensia imprensa ne’ebé realiza iha edifísiu BELUN, Farol-Díli, Tersa (23/08/2016).

Nia hatutan tan katak, insidenti violénsia asaltu fíziku uza rama ambon ne’ebé akontese iha capital Díli ne’e, iha suku sira ne’ebé mak durante ne’e sai risku ba konflitu.

“Bazeia ba rezultadu monitorizasaun ONG BELUN liu husi sistema Atensaun no Responde Sedu (AtReS), rejista katak, insidenti violénsia asaltu fíziku uza rama ambon akontese liu-liu iha suku Comoro no Bairo Pite. I insidenti ne’e rezulta ona joven na’in 2 mate iha fatin no joven na’in 15 hetan kanek grave. Ami identifika ona katak vítima joven na’in 18 no vítima labarik estudante ne’e nain 1,” Marilia da Costa fundamenta.

Nia esplika katak husi númeru ne’e, insidente aas liu maka rejista iha fulan Fevereiru ho total insidenti 7, insidenti 5 akontese iha fulan Juñu, 3 iha fulan Jullu, 2 iha fulan Abríl, 1 iha fulan Janeiru no 1 fali mós iha fulan Marsu, enkuantu iha fulan Maiu la iha insidente ruma liga ba asalta rama ambon.

“Husi insidente 19 ne’e ami identifika mós katak iha insidenti 14 mak akontese iha tempu kalan mais ou menus husi tuku 19:00 kalan to’o tuku 03.00 dadeer madrugada no insidenti 5 maka akontese iha tempu loron mais ou menus  iha tuku 16:00 ka 17:00 lokraik,” dehan Jestor sistema AtReS ONG Belun.

Nia informa katak, sistema AtReS mós rejista katak maioria asalta fíziku uza rama ambon ne’e akontese iha dalan públiku hamutuk insidenti 12 (maioria iha fatin nakukun), iha uma privadu liu-liu iha varanda iha insidenti 6 no insidenti 1 akontese iha Igreja Aimutin ninian.

“Tuir dadus tuir dadus ne’ebé ami iha nota katak insidenti 15 maka la detekta autór, nune’e konsidera hanesan ema deskoñesidu, enkuantu insidenti 2 deskonfia involve membru eis-grupu arte marsiál, 1 involve estudante no 1 seluk husi viziñu sira,” tenik Marilia da Costa.

Nia esklarese katak, insidenti 15 ne’ebé involve ema deskoñesidu Belun deskonfia iha ligasaun ho membru eis-grupu arte marsiál, tanba maioria vítima sira ne’ebé hetan asalta ne’e membru eis-grupu arte marsiál.

Nia esplika, insidente violénsia asaltu fíziku uza rama ambon ne’e baibain autor sira ne’e sai ho motor ida tuur iha kotuk maka hana ba tarjetu ho distánsia besik kuaze metru 5 to’o 7 hafoin sira esforsu halai lakon.

“Tuir ami nia dadus monitorizasaun, iha insidenti 13 mak autór sira uza motorizada no husi númeru ne’e insidenti 9 uza motorizada ho marka Yamaha Vixion no insidenti 4 uza motorizada maibé la konsege detekta marka husi motorizada,” dehan Marilia da Costa.

Nia relata katak, insidenti 6 maka asalta husi ema ida ba ema ida, grupu asalta malu no ida seluk labarik estudante halimar ho rama ambon mak derepenti rama oan semo sai kona labarik ida seluk nune’e hamosu kauza kanek todan iha Aldeia Lisbutak, Suku Bairo-Pite ninian.

“To’o agora ami seidauk hatene loloos motivu husi ema deskoñesidu uza rama ambon no tanba saida? Maibé iha ona indikasaun balun katak iha insidenti hirak ne’e ligasaun ho eis grupu arte marsiais. Nune’e durante ne’e PNTL kaptura ona suspeitu balun no liu husi desizaun Tribunal Distritál Díli detein ona autór nain 9 iha prizaun preventiva, maibé komunidade kapitál Díli nafatin ta’uk no preokupa tebes ba sira no sira nia família, kuandu la’o kalan tanba asalta rama ambon ne’e sempre mosu no seidauk iha estratéjia preventiva husi órgaun kompetente ba karakterístika violénsia hanesan ne’e,” tenik Marilia da Costa.

Iha okaziaun ne’e, Marilia da Costa informa katak, BELUN rekomenda ba Polisia Nasional Timor Lorosa’e (PNTL) tenki aumenta tan volume patrullamentu ho regular iha tempu kalan, tanba asaun violénsia ne’e sempre akontese iha tempu kalan.

Jestor AtReS ne’e mós husu ba Ministériu Públiku (MP) atu prosesa lalais kazu sira ne’ebé relasaun ho rama ambon tuir lei ne’ebé vigora iha Timor-Leste (TL).

“Ami husu mós ba Ministériu Públiku atu prosesa lalais kazu rama ambon tuir lei ne’ebé vigora iha Timor-Leste (TL) liu-liu sira ne’ebé rezulta ona joven balun mate, atu fó lisaun importante ba komunidade TL tomak, no Ministériu Óbras Públikas, Transporte no Komunikasaun (MOPTK) mós tenki monta CCTV iha fatin públiku sira iha kapitál Díli, atu evita no detekta autór rama ambon sira,” dehan Jestor AtReS Marilia da Costa.

Alénde ne’e, nia mós husu MOPTK mós tenki monta ahi iha fatin ne’ebé maka identifikadu nakukun iha kapital Díli, atu nune’e bele prevene violensia husi ema deskoñesidu sira ne’ebé gosta halo asaun violensia.

Nia mós husu ba komunidade sira no Konsellu Suku sira tenki koopera ho Ofisiál Polísia Suku (OPS), atu fó informasaun konabá joven ruma ne’ebé kaer rama ambon ruma ka autór ba kazu rama ambon ninian.ves

Jornal Nacional

POLISIA PRENDE MAKINA PRODUZ OSAN FALSU

DILI - Polísia Nasionál Timor-Leste (PNTL) prende ona mákina  foto copy ne’ebé maka uza ba scan osan falsu ho suspeitu nain tolu aprejenta ba Ministeriu Públiku (MP) munisipiu Baucau nian.

“Kazu ne’e ita nia polísia atu no ita prende mákina  foto Copy ho suspeitu nain tolu ita aprezenta ona ba Ministeriu Públiku Baucau nian,” Komandante Jerál PNTL Komisáriu Julio da Costa Hornay ba Jornalista iha Kuartel Jerál  PNTL, Kaikoli, Segunda (22/8).

Nia esplika, agora dadaun suspeitu nain tolu ne’e hetan hela Termu Identidade Rezidensia (TIR) nune’e bele hein nia prosesu kontinuasaun ba kazu refere.

“Ita nia polísia sei buka tan evidensia balun hodi bele haforsa tan evidensia ne’ebé maka iha ona,” dehan Julio.

Nia hatutan, alienede mákina  polísia sita mós osan ho montante $ 20 tahan hitu ida henesan ne’e, no intrega hotu ona ba iha MP Baucau nian hanesan evidensia, mais hotu-hotu hatene katak produs osan falsu ne’e krimi, ba Tríbunal maka bele foti desijaun.

PD La Autoriza

Entretantu hatan ba lamentasaun sira ne’ebé mósu katak, Partidu Demokratiku (PD), nian membru sira produs osan falsu iha Sede Partidu nian iha Suku Luro, Munisipiu Lautem ne’e, Deputadu Paulino Monteiro hosi  Bankada PD rasik konsidera katak Produsaun osan falsu ne’e krime maibé  ba sira nia membru mak halo tan produs osan ne’e sira sidauk halo konfirmasaun.

Tuir Deputadu Paulino Monteiro katak, hahalok ne’e krime maibé  karik dehan, membru PD ne’e la’ós  partidu mak haruka no Partidu rasik durante ne’e sidauk haki’ak ema ruma atu halo krime ba rai ida ne’e, mais sekuandu iha individu ruma mak sikat hotu iha neba tenke halo ivestigasaun hodi heta ema ne’e atu ba hatan tuir lei.

“Ami to’o agora sidauk iha konfirmasaun ida katak, membru PD ruma ka ema ruma mak produs osan falsu, ami hanoin se hetan ema ruma ho evidensia fórte ne’e krime tenke hato ba Polisia par halo investigasaun ida klean oinsá bele hatan iha lei nia oin,”dehan Deputadu Paulino Monteiro iha PN, Segunda (22/08).

Nune’e nia dehan, Partidu Demokratika rasik sidauk hatan atu ema ruma produs osan falsu iha sede partidu nian tanba ne’e kontra lei, maibé  mós karik ema individu ruma mak halai ba tan iha neba par halo ida ne’e tenke kaer tiha tanba la’ós  PD mak bolu no PD rasik nunka bolu, nunka haki’ak no nunka tau ema kriminozu ida atu halo estraga PD nia naran fóer.

PD rasik mós to’o agora sidauk hatene lolo’os  sese mak halo atividade ne’e, liliu diskunfia tan halo iha sede partidu PD nian, tanba ne’e hein prosesu investigasaun karik PD nia ema individu ida mak halo tenke ba hatan individu ba aktu ne’ebé nia rasik halo tanba la’ós Partidu makharuka.

Entertantu antes ne’e Deputadu Osorio Florindo hosi  Bankada Fretilin levanta ona iha Plenaria katak, Osan sira ne’e sirkula ne’e diskunfia uza mákina  hodi produs iha sede partidu politiku balun nian, depois fahe ba ema sira balun hetan $50 dolar, $20 dolar hodi ba iha Manu-futun no sosa ema nia sasan to’o ikus ema deteta konsege osan sira ne’e fó fila fali ba ema nain no Polisia Nasionál Timor Leste (PNTL) kaptura oan ema balun tanba hetan keiza.

“Ha’u  Preokupa Dala barak kazu sira mósu nune’e Polisia lori mai dala ruma dehan persiza evidensia, maibé  besik ona eleisaun, eleisaun barak lahalimar tanba ne’e hahalok sira nune’e tenke halo desizaun fórte, osan falsu ne’ebé halo iha los sede partidu ne’e ha’u  lahatene ne’e ita dehan individu ka partidu, tanba ne’e Polisia tenke halo investigasaun klean ba aktu ne’e hodi labele halo beik povu no labele espalla iha Timor Laran,” levanta Deputadu Osorio Florindo iha Plenaria Parlamentu Nasionál, Kuarta (17/08).

Antes ne’e mós Administradór Postu Luro, Delfin Marques hatete, akontesimentu ne’e los duni mósu iha Luro tanba suspeitu sira mós loke Rental ida hodi aproveita produs osan falsu ne’e, maibé  osan ne’e oras ne’e sirkula ona iha Munisipiu Lautem tanba balun suspeitu sira hodi ba sosa sasan iha kios, ba joga karta no halo tan atividade seluk.

Nia dehan, aktu ne’e vitima sira mak infórma Polisia hodi konsege kaptura ona suspeitu labarik nain hat hodi ba iha Munisipiu Baucau atu halo kontinua prosesu tanba ne’e fiar katak prosesu ne’e tenke halo investigasaun klean hodi hatene motive ne’e, par ba oin bele prevene atu labele akontese aktividade krime sira hanesan ne’e iha rai laran.(way/rio)

Timor Post

XANANA HASORU WIRANTO

JAKARTA - Ministru Koordenador Polítika, Justisa no Seguransa, Wiranto hasoru malu ho Ministru Planeamentu i Investimentu Estratéjiku, Xanana Gusmão. Sorumutu durante oras rua ho balu ne’e ko’alia liu kona-ba memória pasadu.

Líder na’in rua ne’ebé iha tempu ukupasaun Indonézia iha Timor Leste buka malu hanesan inimigu ne’e, hasoru malu hafoin iha Timor Leste selebrasaun loron Forsa Armada Libertasaun Timor Leste (FALINTIL), ba-dala 41 ne’ebé monu iha loron Sábadu (20/08/2016).

"Ne’e ha’u nia belun uluk, hasoru malu la’ós foin ba dala ida ne’e, antes ne’e ami sempre hasoru malu. Nostalgia de’it," haktuir Wiranto ba Jornalista iha Restorante Bunga Rampai, Jakarta, Domingu (21/8/2016), hanesan Timor Post sita hosi TribunNews.com.

Wiranto haktuir, sorumutu ne’e marka prezensa mos hosi eis Ministru Justisa Indonézia nian, Muladi.

Sira nain tolu ko’alia barak liu kona-ba istória pasadu, iha ne’ebé Wiranto nu’udarPaglimaTentara Nasional Indonézia (TNI), no Xanana Gusmão nu’udar Komandante FALINTIL.

"Agora ami hasoru malu hanesan ministru hosi nasaun rua la hanesan," Wiranto komenta.

Entretantu, Wiranto mos haktuir katak, iha sorumutu ne’e ko’alia mos kona-ba liña fronteira entre Timor Leste ho Indonézia, no liña fronteira entre Timor Leste, Indonézia no Austrália, ne’ebé iha semana ne’e hahú diskuti iha Tribunal Internasional Den Haag, Olanda.

"Sim, ida ne’e mos ami ko’alia liu," haktuirWiranto.(*/cao)

Timor Post

ALTERA LEI PENSAUN VITALISIA, PN VS PR

Jornal Nacional, editorial

Deputado sira Parlamentu Nasional foin planeia atu halo revizaun ba lei Pensaun Vitalisia nebe durante nee sai preokupasaun publiku maibe Presidente Republika antisipa kedas ho deklarasaun katak nia parte sei la promulga lei  nebe Parlamentu Nasional atu halo revizaun nee.

Lei pensaun vitalisia nebe dadaun nee lao katak eistitular sira, li-liu eis Presidente Republika, eis Presidente Parlamentu Nasional, eis Primeiru Ministru, eis membru governu  no eis membru Parlamentu Nasional simu pensaun hanesan fali ho Presidente Republika,  Presidente PN, membru parlamentu no membru governu sira nebe sei ativu.

Xefi estadu halo deklarasaun antisipada katak nia sei la promulga lei pensaun vitalisia nebe PN halo revizaun nee tamba hakarak hamos tiha lei pensaun vitalisia, lalika iha pensaun vitalisia ba eis titulare sira.

Atu labele iha lei pensaun vitalisia ukun nain sira, li-liu Presidente Republika, Presidente PN, Primeiru Ministru ho membru governu sira no membru Parlamentu Nasional sira simu salariu boot kedas atu nunee bele reserva wainhira mandatu hotu.

Intensaun atu laiha pensaun vitalisia nee diak maibe kestaun mak dignidade ukun nain sira. eis Presidente Republika, eis Presidente Parlamento no eis Primeiru Ministru susteta moris ho loke kios, faan obralan ka etc.

Publiku konkorda iha pensaun ba eis titualr sira nee maibe labele simu pensaun 100% hanesan fali titular ativu, 25- 50 % nee suficiente atu bele sustetan restu vida nebe iha, pensaun vitalisia nee nudar rekoinesementu ba kontribuisaun nebe sira halo ba rai ida nee, ezeptu koruptor.  “Prezidente nia hakarak halakon pensaun vitalisia ne’e Prezidente nia hakarak, maibe ami  mos iha posizaun ida depois diskusaun maka bele foin hatene halakon ka lae,” Duarte Nunes, Vise Presidente PN.

Agora lei pensaun vitalisia nee Parlamentu nasional halo revizaun mak Presidente Republika lakohi promulga nee direitu Presidente Republika nian nudar orgaun soberanu ida maibe lei reve tiha ona mak la promulga signifika lei antrior sei vigora nafatin.

Ne’ebe hakarak lakohi ejiji PN halo revizaun, sujestaun karik pocento nee kiik, labele 100% maibe se la promulga mak laos ona kulpa deputado sira nia maibe kulpa ba fali Presidente Repbulika tamba la promulga hodi nunee eis titular sira kontinua simu pensaun 100% hanesan salariu wainhira sei ativu.

Agora ida nebe mak diak liu?, promulga ka la promulga?, hakarak ka lakohi tenki promulga. Se lae ema bele dehan la promulga para Presidente Republika mos atu hetan eis titular simu osan nafatin.

Lei pensaun vitalisia nee Primeiru Governu konstitusional mak harii, ita tempo nebe Presidente Republika, Primeiru Ministru simu salariu abaixo mil dolares,  deputado sira sei simu salariu 450 kada fulan maibe depois de governu Aliansa Maioria Parlamentar ukun, salariu sae makaas, Presidente Republika simu 5000 USD, Presidente PN 450, Primeiru Ministru simu 4000 USD, deputadu sira nebe lidera komisaun 3000 USD ho membru governu 2500 USD.

Ne’ebe lei nee la altera mak eis titular no titular sira simu salariu hanesan deit, lahalo ona servisu mos simu osan hanesan ho ema nebe halo servisu mate an los. Ne’ebe importante mak PN hakarak duni halo alterasaun. *

REVIZAUN LPV LIU HUSI PLENARIA, PN SEI LA HAKRUUK BA PR TAUR NIA VONTADE

Atu halo revizaun ba lei pensaun vitalisia (LPV) sei liu husi plenaria, tanba ne’e, desizaun Parlamentu Nasional sei la hakru’uk ba vontade Prezidenti Republika (PR) Taur Matan Ruak nian.

Lia hirak ne’e hato’o husi Vise Prezidenti PN, Duarte Nunes, iha uma fukun PN, Tersa (23/08/2016), hodi  fo resposta ba deklarasaun Prezidente Republika Taur Matan Ruak,  ne’ebe dehan, PN lakohi halakon Pensaun vitalisia maka nia prontu sai husi Prezidente Republika.

“Prezidente Republika Taur Matan Ruak atu sai husi Prezidente ne’e nia direitu, labele Prezidente ameasa  rezigna an ne’ebe Parlamentu Nasional mos atu  halo tuir deit.

 Parlamentu Nasional iha komisaun ida ne’ebe hare ona kona ba lei pensaun vitalisa, tama fali resesu deputadu sira atu halo diskusaun ona,” hateten Duarte Nunes.

Bainhira husu atu halakon pensaun vitalisia, tuir Vise PN Duarte katak, ne’e laos Prezidente Republika nia kestaun, maibe Parlamentu Nasional maka  sei hare lei ne’e.

“Prezidente nia hakarak halakon pensaun vitalisia ne’e Prezidente nia hakarak, maibe ami  mos iha posizaun ida depois diskusaun maka bele foin hatetne halakon ka lae,” dehan Vise PN Duarte.

Atual deputado bankada CNRT ne’e sublinha katak, se lei ne’e Parlamentu Nasional aprova lori ba maka  dehan inkontitusional signifika tenke hare fila fali artigu ida ne’ebe ke inkonstitusional, no haruka ba Tribunal hodi hare fila fali.

Maibe  lainkonstitusional PR Taur hakarak veta politika regra maka konfirma votu ou la konfirma.

Iha fatin hanesan membru PN husi bankada CNRT, Arão Noe afirma, lei pensaun vitalisia ne’e iha hela ona desde tinan 2006, agora atu revoga lei ida ne’e presija aktu politika ida para atu revoga.

“Entaun tenke halo lei ida fali para hodi revoga lei ida seluk, saida maka akontese PN halo alterasaun ba lei nee neebe tuir ejijensia komunidade no sosiadade sivil sira. Maibe  agora, tanba razaun ida ne’e Prezidente Republika hakarak rezigna an ne’e desizaun politika Prezidente nian, PN laiha buat ida ba desizaun Prezidente nian, tanba Prezidente ne’e orgaun soberanu ida, separasaun poderes ida-idak hala’o nia knar,  PN halo nian, Prezidente halo nian,” dehan Arão Noe.

Nia dehan, lei ida iha tiha ona, agora halo alterasaun para muda lei ne’e, se Prezidente Republika veta lei ne’e, lei anterior bale nafatain. Tanba ne’e nia laiha konsekuensia ida, nia konsekuensia maka lei anterior ne’e bale nafatin 100%.

“Se ita hakarak redus ne’e maka diak liu promulga alterasaun ne’ebe PN halo, hodi redus salariu ne’ebe mak eis titularis sira hetan, se Prezidente lakoi promulga konserteza lei anterior vigora nafatin,” dehan deputadu Arão.

Prezidente Republika Taur Matan Ruak dehan tiha ona katak, nia prontu atu sai husi Prezidente Republika, kuandu Parlamentu Nasional lakoi hamos total pensaun vitalisia.mia

Jornal Nacional

L-7 TRISTE OKNUM F-FDTL-PNTL ASALTA NIA REZIDENSIA • LERE: HASAI HUSI F-FDTL

Eis Komandante Gerileriu Rejiaun 3, Veteranu, Cornelio Gama (L-7), senti triste tanba nia rezidensia iha Fatuhada-Dili, hetan asaltu husi oknum Falintil-Forsa Defeza Timor Leste (F-FDTL) ho Polisia Nasional Timor Leste (PNTL) iha komemorasaun loron FALINTIL ba dala 41 iha Sabadu (20/8/2016) liu ba.

Motivu no rajaun saida mak oknum Polisia ho F-FDTL sira ba asalta veteranu L-7 nia rezidensia ne’e rasik to’o agora seidauk klaru, tanba sei iha prosesu investigasaun nia laran.

Veteranu Cornelio Gama L-7, dehan, aktu husi membru PNTL ho F-FDTL ba serku nia uma ne’e krimi ona sa tan se kilat ba nia oan feto sira ne’e, tenki lori ba Tribunal, tanba sa mak iha loron istoriku ne’e sira ba fali serku nia uma.

“Ha’u la kompriende tanba saida maka sira ba fali serku ha’u nia uma? ha’u mos ema ne’ebe maka funda nasaun ne’e, ha’u la hanoin atu estraga fali ha’u nia nasaun ne’ebe maka uluk ami Falintil sira harii, ha’u Triste tebes ba ida ne’e, no ha’u nia oan feto sira ne’ebe sai vitima atu lori kazu ne’e ba tribunal,”deklara L-7 ba Jornalista iha Bidau mota klaran, Domingu (21/08/2016).

L-7 hatutan, kronolojia akontesimentu ne’e katak, forsa ho PNTL ba husu sira hatene loron ida ohin ka lae? Sira hatan sim hatene, nusa mak kanta fali maibe nia oan feto ki’ik nia ferik oan hatan la’os sira mak kanta, maibe labarik sira maka halimar.

Maibe,  forsa sira ne’e dehan “imi subar ema iha ne’e kamiza kinur ida”, entaun labarik sira loke hotu odamatan no janela sira ne’e hodi forsa sira tama ba buka, sira la tama no hatete lia fuan at barak ba nia oan sira, dehan mos imi sira ne’e mak la fiar forsa.

“Ami mos Falintil imi koalia fali lia fuan barak hanesan ne’e, no sira dehan tan ba ha’u nia oan feto katak, labele koalia barak no se tan kilat ba ha’u nia oan feto, no sira hakiduk ba kotuk koalia tan katak sira ne’e maka subar hela ‘Mauk Moruk’ iha ne’e, tanba ne’e mak ha’u nia oan dehan Mauk Moruk mate ona imi mai husu fali tan iha ne’e,” L-7 dehan.

Tanba ne’e, L-7 konsidera aktu ne’e defamasaun no krimi ona sira sei lori ba Tribunal, tanba sira ba hala’o serku ba uma ne’e mos laiha mandadu ruma husi Tribunal.

Hasai husi F-FDTL

Hatan ba kestaun ne’e, Chefe Estadu Maior Jeneral Falintil-Forsa Defesa Timor Leste (F-FDTL), Major Jeneral Lere Anan Timur afirma katak, kona ba asalto ne’e, desizaun komandu nian ba autor sira ne’e primeiru tenke husu deskulpa,  segundu hasai husi instituisaun F-FDTL.

“Desizaun mak ne’e ó ba husu deskulpa, se ó la koeñese husu deskulpa ba sira i ó tenke konsidera fo ondra ba FALINTIL katuas sira ne’ebe ohin loron halo ó sai forsa defesa. Ó ha’u haruka ba uma, ha’u haruka ba uma tamba ó la’os ligasaun ho FALINTIL dala ruma ó ne’e independente ida mak ó mai tama FALINTIL,”afirma, Lere Anan Timur ba Jornalista iha ninia knar fatin, Kuartel Jeneral F-FDTL, Fatuhada – Dili, Segunda (22/08/2016).

Tamba ne’e, Lere alerta ba jerasaun foun sira hotu ne’ebe iha forsa armada keta haluha katak FALINTIL mak klamar instituisaun F-FDTL, tamba laiha FALINTIL F-FDTL mos laiha.

“Ha’u fo hatene ba joven sira hotu FALINTIL mak imi nia klamar, FALINTIL laiha, imi mos laiha, ohin dalaruma imi vadiu tun sae, komete krimi tun sae ba kaer imi ba kadeia, imi mai iha ne’e para ami eduka imi sai ema lolos no sai sidadaun lolos,”hatutan Lere.

Lere haktuir  katak, sé autor sira ne’e koalia duni liafaun ba familia L-7 nian katak, se mak haruka imi ba funu balun liman tohar, balun ain tohar, balun mate, ida ne’e moral laiha para soldadu koalia sai liafuan sira hanesan ne’e.

Komisariu PNTL orienta investiga

Entretantu iha fatin ketak, Komandante Jeral PNTL, Komisariu Julio da Costa Hornay hatete, wainhira ninia parte rona membru PNTL ho F-FDTL asalta guerilheiro L-7 ninia uma, ninia parte orienta kedas ninia membru sira hodi justifika.

Nia hatutan katak, kazu ne’e detallu komandu fo ona orientasaun ba komandante polisia munsispiu Dili hala’o investigasaun profunda, no husu mos ba familia atu hato’o keixa hodi bele hatene lolos, tamba sa sira ba iha ne’eba, ba halo saida.

“Kazu ne’e detallu, ohin ha’u orienta ona komandante distritu dili, i iha posiblidade familia hato’o keixa mai para ita haree los ka lae, akontese iha ne’ebe, tamba saida mak sira ba iha ne’ebá, ba halo saida,” hatete, Julio Hornay.

Tuir informasaun ne’ebe mak JN-Diario asesu iha terenu akontesimentu ne’e iha loron Sabadu (20/08/2016), no autor sira husi instituisaun F-FDTL nian husi Componente Terestre no autor husi parte PNTL seida’uk hatene ema na’in hira tamba sei iha prosesu investigasaun. Eus

Jornal Nacional

Membru F-FDTL halo atake bá rezidensia Komandante Falintil L7 no oan Kiak nia

Komunikado da Imprensa

Introdusaun

Konstitusaun RDTL, artigu 30 kona-bá Diretu bá Liberdade, Seguransa no integridade ema ida-idak nian alinea 1 kona-bá ema hotu iha liberdade bá segurança no integridade bá nia an rasik no alínea 4 ema ida labele hetan tratamento aat ne,ebé la,os umanu eh degradente.

Artigu 37 labele viola uma no korespondésia alínea 2 kona-bá atu tama karik ema ruma nia uma, tur fatin latuir uma nain nia hakarak bele halo deit ho orden hakerek husi autoridade judicial ne,ebé mak iha kbit tuir kazu no fórma ne,ebé hakerek iha lei. konvensaun internasionál kona-bá   halakon fórma diskrimasaun hotu-hotu hasoru feto kona-bá violência hasoru feto no konvensaun internasnial diretu labárik nian.

Iha dia 20 de Agustu 2016 dader, maijamenus tuku 10 dader membru F-FDTL ne,ebé halo nia knar hodi fó seguransa bá festa bo,ot komemorasaun loron Falintil nian ne,ebé realiza iha Quartel Geral F-FFDT Fatuhada Dili. Durante membru  F-FDTL sira fó seguransa bá loron bo,ot ne,e derepente deit membru F-FDTL sira tama ho fórsadamente mai iha rezidencia Komandante L7 no Oan Kiak nian ho armas kompletu hanesan Kilat bo,ot no Kilat matraidór, iha atake ne,e membru F-FDTL hasai liafuan sira ladun merese bá ita nia veteranus sira no família sira mak hanesan, Milisia no traidor.

Durante iha atake ne,e membru F-FDTL ne,e mos halo insulta no dehan imi nia família mak lagosta fórsa F-FDTL, nune,e sira iha rezidencia ne,e hatan hasoru membru F-FDTL refere no dehan, ami nia família halo funu no kuaze mate hotu iha ailaran no bálun liman fuan kotu hodi defende farda ne,ebé mak ohin ita bo,ot hatasi no defende indepedensia Timor-Leste nian, nune,e membru F-FDTL refere hatan dehan se mak haruka imi nia família halo funu.

No durante iha hakilar malu ne,e membru F-FDTL mos halo amesa bá inan feton  no labárik kiik koan sira, labarik kiik sira sinte trauma tambá membru F-FDTL sira lori kilat, no bása mos inan feton sira ne,ebé durante kolia hasoru malu ho membru F-FDTL sira.  

 Asosiasaun HAK konsidera asaun ne,e nudar parte ida husi violasaun diretus Umanus sidadaun sira, bá liberdade movimentu, liberdade bá segurança no diretu bá privasidade.

HAK mos konsidera hahalok ne,ebé membru F-FDTL sira halo ne,e hanesan hahalok bándalismu no premanismu sira nia no ne,e la valoriza ita nia funu nain, veteranu sira nia luta bá libertasaun durante tinan 24 no lia fuan sira ne,ebé lamerese hasoru sira, so ema oportunista sira mak bele hasai liafuan sira hanesan ne,e bá ita nia aman veteranu sira.

Nue,e HAK Ezizi:

Husu bá kamando F-FDTL atu halo investigasaun klean bá membru F-FDTL sira ne,ebé mak halo atake bá rezidencia Veteranus L7 no Oan Kiak nian iha dia 20 de Agustu 2016, hodi halo insulta no amesa bá  labárik no feto sira, no hasai lifuan sira ne,ebé lamerese bá ita nia funu nain sira.

Husu bá komando  F-FDTL atu halo suspensaun bá membru ne,ebé mak tama rezidencia veteranus L7 no Oan Kiak nian, ne,bé laiha konesementu husi parte komando F-FDTL, tambá ne,e ami konsidera hanesan hahalok brutalismo no bándalismu no hahalok ne,e nudar aktus in moral no bele hafóer istitusaun F-FDTL ne,ebé ema bárak sosa ho ran no ruin.

Husu bá membru F-FDTL ne,ebé halo atake no hasai lifuan sira ne,ebé  lamerese bá ita nia veterasnu sira, atu husu deskulpa emidiata mente bá veteranus sira ingeral no spesifiku bá família veteranus L7 no Oan Kiak nian, tambá liafuan ne,ebé hatete se mak haruka imi nia família halo funu ne,e nudar traisaun ida bá ita nia veteranus sira ne,ebé durante halo funu hodi Defende ukun rasik an.

 Husu bá PDHJ atu halo investigasaun bá membru F-FDTL ne,ebé halo atake bá rezidencia komandante L7 no oan Kian nian atu nune,e bele prosesa tuir lei ne,ebé mak vigor iha nasaun RDTL.

Husu ba Ministeru Publiku atu investiga no prosesa membru F-FDTL ne,ebé halo atake ba rezidencia komandante L7 no Oan Kiak nian, tuir lei ne,ebé vigor iha nasaun Timor-Leste.

Dili, 24 de Agustu 2016.

Honorio de Almeida

Coordendor Advocasia

Asosiasaun HAK

+670 77345564  - onoriosoaresalemeida@yahoo.com

Seidauk iha Indisius Terorizmu Ameasa TL

DILI, (ANTIL) - Ministru Interior, Longuinhos Monteiro hateten to´o ohin loron seidauk iha indisius terorizmu ameasa Timor-Leste (TL).

“Tanba iha kooperasaun ne’ebé di’ak entre nasaun viziñu Indonézia no Austrália, ita konsege troka informasaun kona-ba serbisu relevante para ita halo prevensaun másimu iha ita nia sistema tantu iha imigrasaun no tantu iha fronteira,” Monteiro dehan ba jornalista sira iha Palásiu Prezidénsia Repúblika, Bairu-Pite, Dili, Kuarta (24/8), hafoin nia ho Ministru Defeza, Cirilo Cristovão, sorumutu ho Prezidenti Repúblika, Taur Matan Ruak.

Nia haktuir sorumutu xefe estadu ko’alia kona-ba situasaun seguransa no defeza iha rai laran no informa mós evolusaum komportamentu ema ninian, estatístika kriminál, situasaun rodoviária no imigrasaun.

“Prezidenti fó nafatin korajen ba instituisaun rua atu halo serbisu nafatin ba oin para bele kontrola iha aspeitu jerál kestaun defeza ho seguransa estadu ninian,” informa eis Komandante Jerál PNTL ne´e. - Jornalista: Xisto Freitas / Editor: Gantry Meilana

Foto: Longuinhos Monteiro hetan entrevista hosi jornalista sira iha Palásiu Prezidensia Republika. Foto ANTIL/Xisto Freitas

Lere Seidauk Toma Desizaun Ba Kazu Asalta Rezidénsia L7

DILI, (ANTIL) – Majór Jenerál FALINTIL-Forsa Defesa Timor-Leste (F-FDTL), Lere Anan Timur hatete, nia seidauk bele toma desizaun ba membru F-FDTL ne’ebé asalta rezidénsia veteranu Cornélio Gama L7 iha Fatuhada, Dili, Sábadu (20/8), tanba seidauk simu evidénsia hosi parte rua.

“Ha’u hakarak rona parte família L7 no membru forsa armada ne’e,” Lere informa ba jornalista sira iha Palásiu Prezidensiál, Bairu-Pité, Dili, Kuarta (24/8), hafoin sorumutu ho Xefe Estadu, Taur Matan Ruak.

Nia esplika, oras ne´e sira sei halo hela investigasaun ba kazu refere para bele hatene lia-loos.

“Katuas L7 nia família mós bele sala no membru forsa armada ne’e mós bele sala, depende ba investigasaun maka ita foin hatene sé maka sala loloos”, nia afirma.

Maske nune’e, nia dehan, membru forsa armada ida lá fó konsiderasaun ba veteranu ida no laiha konsiderasaun ba rezidénsia privadu ema ida ninian, sei hetan sansaun hosi instituisaun ne’ebé nia (membru F-FDTL) serbisu ba.

Majór Jenerál esklarese nia identitika ona membru forsa armada ne’ebé tama iha rezidénsia hodi insulta família L7. - jornalista: Xisto Freitas; editora: Rita Almeida

Foto: Majór Jenerál FALINTIL-Forsa Defesa Timor-Leste (F-FDTL), Lere Anan Timur . Foto ANTIL

Forsas Komete Krimi, Lori ba Tribunal

DILI, (ANTIL) - Majór Jenerál, Lere Anan Timorsei aplika regulamentu instituisaun ba membru F-FDTL ne’ebe komete krimi sei lori nia kazu ba iha tribunal.

”Tribunál maka sei tesi lia,” Lere tenik ba jornalista sira iha Palásiu Prezidensiál, Bairu-Pité, Dili, hafoin ramata inkontru ho Xefi Estadu Taur Matan Ruak.

Responde ba problema ne’ebe mosu entre membru F-FDTL no Polísia Nasionál Timor-Leste (PNTL), nia informa, instituisaun rua ne’e  sei halo paktu konjunta ba kazu baku malu entre membru F-FDTL no membru PNTL.

Paktu konjunta ne´e ho objetivu atu halo investigasaun ba membru hosi instituisaun rua ne’ebé maka komete sala.

“Presiza esforsu hosi komandu rua ne’e. Primeiru tenki hatene katak tanbasá problema ne’e mosu beibeik,” nia informa.

Nia haktuir membru PNTL baku membru F-FDTL ne’e hamutuk dala 20 ona, inklui kazu baku membru F-FDTL iha Munusípiu Bobonaro no Covalima, foin lalais ne´e. Tanba ne’e, nia dehan, nia mós buka hanoin hodi estuda, nune’e mós komandu PNTL kona-ba kazu refere.

“Tanbasá maka oknum PNTL baku membru F-FDTL hamutuk 20 ona maibé membru F-FDTL lá responde beibeik? Ita halo análiza sujetiva de’it maibé seidauk iha lójika katak tanba motivu ida ne’e,” nia esklarese.

Nia deskonfia katak kazu sira ne’e akontese tanba relasiona ho grupu Polísia Nasionalista no grupu Eis Polísia ne’ebé akontese iha tinan 2003-2004, repete hikas hodi provoka situasaun.

“Ne’e ha’u nia análiza sujetiva de’it,” Lere informa. - Jornalista: Xisto Freitas / Editor: Gantry Meilana

Foto: Lere Anan Timur

Aspetu Tolu Importante iha Edukasaun Pesoál

DILI, (ANTIL) – Reitór Universidade Nasionál Timor Lorosa’e (UNTL), Francisco Miguel Martins hatete, aspetu tolu hanesan kognitivu, psikomotoriku no afetivu importante iha edukasaun no formasaun pesoál estudante nian.

”Ita eduka ema la’os matenek iha kakutak de’it. Eduka mós ema sai di’ak no serve ba nasaun ida ne’e,” Reitór UNTL iha salaun Komisaun Nasionál ba Eleisaun ba ANTIL hafoin sorumutu ho dosente no funsionáriu UNTL, Tersa, (23/8).

Reitór hatutan, bainhira sai matenek presiza haraik-án, iha atitude di’ak no hatene respeita. Labele foti no loko-án, maibé iha kognitivu, psikomotoriku no afetivu.

Nia esplika, kognitivu katak matenek ho hanoin no iha abilidade. Afetivu maka ema matenek, maibé haraik-án tanba ne’e afetivu ita tenke kuda no psikomotoriku katak matenek ne’ebé bele implementa ho kreatividade, antusiasmu inovadora no ativa.

Tuir nia, aspetu tolu ne’e ita bele kuda hotu iha edukasaun iha ensinu aprendizajen, tanba ne’e bainhira husu kona-ba nia mensajen ba estudante no foinsa’e sira nia fó lia menon katak joven nu’udar futuru nasaun nian, tanba ne’e juventude tenke haki’ak no prepara-án hodi simu estafeta lideransa ba futuru.

”Joven sira lakohi haki’ak-án ho didi’ak ho boas maneiras sei labele hetan buat di’ak iha futuru. Tanba ne’e, juventude presiza haki’ak no prepara án tuir prosesu formál no edukativu ne’ebé mak iha,” reitór UNTL fó lia menon.

Tanba ne’e, reitór hateten, buat tolu ne’e importante no tenke iha kedas hotu labele iha de’it ida, tanba ne’e matenek tenke iha respeitu no iha inovasaun no kreativu. (jornalista: Rafy Belo; editora: Rita Almeida)

Foto: Reitór UNTL, Francisco Miguel Martins.

Federasaun Atletizmu Bandu Atleta Halimar Facebook

DILI, (ANTIL) . Federasaun Atletizmu Timor-Leste sei bandu nia atleta sira halimar Facebook (FB) tanba estraga saúde.

“Buat ida Facebook ne’e estraga tiha labarik sira. Ami buka dalan ona oinsá prevene atleta sira asesu FB to’o iha kalan boot (12 kalan),” Prezidenti Federasaun Atletizmu Timor-Leste, Afrânio Xavier Amaral ba ANTIL iha nia kna’ar fatin, foin lalais ne’e.

Tuir nia katak toba tarde bele hamenus ran (hemoglobin). Nia esplika katak atleta ida nia kualidade ran ne’e tún ba iha 12 mai kraik ne’e lá serve sai atleta.

“Sé imi (atletas) asesu FB to’o iha 12 oras kalan, sei hasai imi nia forsa ba hotu iha ne’ebá. Entaun, sei fó impaktu maka’as mós ba iha oráriu treinu,” Afrânio esklarese.

Oras ne’e, nia haktuir, atleta sira hela iha ida-idak nia uma. Tanba ne’e, nia sujere ba Governu liu-liu Sekretaria Estadu Juventude no Desportu (SEJD) kria kondisaun (hari’i karantina) ba atleta sira para fasilmente kontrola atleta sira nia saúde.

“SEJD hanoin ona kria polítika ida atu oinsá fasilita atleta sira dook hosi Dili tanba Dili nakonu tiha ona hosi poluzaun (karbon monoksida),” Afrânio dehan. - Jornalista: Xisto Freitas / Editor: Gantry Meilana

Foto: Prezidenti Federasaun Atletizmu Timor-Leste, Afrânio Xavier Amaral, treinadór no atleta sira ko´alia ba jornalista sira liu-hosi konferénsia ba imprensa, foin lalais ne´e. Foto ANTIL/Xisto Freitas

Federasaun Atletizmu Preukupa Orsamentu Ba Dili Marathon Internasional

DILI (ANTIL) - Federasaun Atletizmu Timor-Leste preukupa ho orsamentu atu halo preparasaun ba Dili Marathon Internasionál , ne’ebé atu realiza iha Dili, 9 Outubru tinan ne’e.

Lamentasuan ne’e tanba to’o ohin-loron governu liu-hosi Sekretaria Estadu Juventude no Desportu seidauk aloka  orsamentu ba preparasaun  ba Federasaun Atletizmu.

“Ida-ne’e impaktu boot no trava buat barak. Governu duni tempu atu ezekuta de’it osan, maibé kualidade sei lá garante,” Prezidenti Federasaun Atletizmu Timor-Leste, Afrânio Xavier Amaral dehan ba ANTIL iha sede Federasaun Atletizmu, Jináziu Dili, foin lalais ne’e.

Tuir nia hanoin, Dili Marathon Internasionál ne’e hanesan Governu nia eventu permanente. Tan ne’e, tenki koloka osan ba eventu refere tinan lima nian kedas, atutinan-tinan lalika ulun moras.

“Ida-ne’e maka fó impaktu boot ba dezenvolvimentu desportu nasionál. Tanba ne’e, hakarak ka lakohi, Governu tenki kria polítika di’ak ida. Nune’e ita labele problema tan ho tempu no orsamentu,” Afrânio informa.

Atu hasa´e atleta sira nia prestasaun, nia hatutan,  governu tenki kria programa sistemátiku,  inklui apoiu nutrisaun ne’ebé maka di’ak.

“Sé sira (atletas) lor-loron treinu, maibé hahan lá di’ak, bele dezastre ba sira-nia saúde,” Afrânio dehan. (Jornalista: Xisto Freitas)

Foto: Afrânio Xavier Amaral