Media Timor-Leste Entre Edukador no Provokador ????

Renato da Costa, opiniaun

Radio Liberdade Online - Opiniaun ne'e ninia kontiudu tomak responsavel husi hakerek nain no instituisaun. Redasaun fo espasu menu ne'e hodi ejerse ema no instituisoens nia hanoin no ideias konaba asuntu ruma ba prosesu dezenvolvimentu Timor-Leste.

Iha situasaun ida nebe ohin loron mundu hasoru liu liu sirkulasaun informasaun nebe maka afeta tiha ona ba  civilizasaun moris loron loron  ema idak idak nian hamosu tiha ona  istilus foun nebe kunhesidus ho naran  The Age of Media Society. Signifika katak media laos ona sai instrumento komplementar mais media sai tiha ona símbolu  civilizasaun ba formasaun personalidade kada ema idak idak. Situasaun refere transforma tiha ona media nudar instrumentu ida hodi bele  satisfa ba nesessidades  públiku hodi hetan informasoens. Konstelasaun ba aktus hanesan ne’e, media laos ona sai deit ajente hodi transforma informasaun maibe sai tiha ona mos institusoens  sosiais iha sosiadade nia let nudar pilares de kontrolu ba kualker aktus nebe maka publiku merese atu hatene.

Ba paises nebe foin hetan nia ukun rasik an iha dekada modernu hanesan Timor -Leste, dezenvolvimentu iha area sirkulasaun informasaun nebe fo sai husi media hetan espasu bo’ot tebes. Mudansas  nebe maka mais signifikadu maka kona ba liberdade de ekspresaun nudar ai ring husi  demokrasia. Maibe iha sorin seluk, media nebe buras tebes moris iha Timor -Leste, husik hela mos referensias balun nebe ita hotu presiza toma atensaun ba tipu nutisias sira ne’e. Hodi nune’e  prezensa husi media sira ne’e laos atu hatudu deit sinal pozitivu katak demokrasia moris buras duni iha Timor- Leste.  Mais, infelizmente, prezensa media sira hirak ne’e ajuda duni sosiadade hodi hetan informasaun nebe adekuadu hodi hatene entre verdadeiru no falsa husi akontesimentu sira nebe maka publika sai husi media sira.

Iha parte seluk, media laos deit ona sai  ferramenta hodi komunika informasaun ba publiku nebe passiva, maibe media ativamente konstrui informasaun refere sai nutisias nudar rede de alarma ba publiku. Signifika  katak  fatos nebe fo sai iha nutisias  tengkiser testadu antes atu hatoo ba publiku. Prosesu ne’e normamelmente media halao hodi  konstrui  realidade nebe maka iha.  Ba situasaun normal nebe maka akontese iha fatin fatin,  kualker analiza kona ba esistensia media sempre konsideradu nudar variável determinante. Katak,  informasaun husi media iha ninia pozisaun nebe propriu nudar  instituisaun ou ajente nebe sai ator  desezivo ba mudansas sósio-kultural no polítika.

Esperensia furak nebe ita hetan iha nia sosiadade nia let, desde inisiu ba prosesu tomak konstrusaun estadu ida ne’e, media asumi papel importante tebes  hodi transmiti informasaun ba públiku. Liuhusi media kada individual,grupu, instituisaun estadu, grupu sosiadade sivil inklui partidu politikus sira dezenvolve sira nia persepsaun ba parte seluk. Nune’e mos, nudar instrumentu hodi hato’o informasaoens ou  idéias balun, media mos sai  instituisoens nebe funsiona hodi kria ou hamosu opiniaun públika, no sai mos forsa eksternal hodi fo presaun ba  idéias nebe tengki hetan aseitasaun husi parte seluk.

Realidade ho tipu informasaun hanesan ne’e  ikus mai hamosu perguntas ba ita hotu katak, tebes duni ka ita nia media sira aplika ona servisu journalista nudar profisaun proprio iha kariera servisu journalismu nian? Ou keta halo informasaun hirak nebe maka fo sai husi media somente sai deit hanesan istoria badak ida nebe ita rasik la kumpriendi  hodi konta ba ita nia oan  atu sira bele dukur lalais???... Onestamente ita tengki rekunhese katak, ba situasaun atual iha Timor -Leste ohin loron, Papel media mais insubstituível tebes. Fenômeno nebe iha hatudu katak media sai tiha ona ponte de transformasaun informasaun husi elit politik sira ba mensagen nebe maka sira hakarak hato’o ba publiku. Maibe iha mos situasaun ida nebe DILEMATIKU ba publiku sira husi kuntiudu informasaun ne’e rasik kona ba ninia verdadeiru no mos natureza husi kualker informasoens nebe maka iha.

Iha movimentu ba atividade vida  polítika nebe maka oras ne’e ita infrenta lor loron, media nebe ita konsideradu nudar  quarto pilares ba kriasaun demokrasia nebe iha depois ezekutivo, judisial no legislative, dalaruma la funsiana ho efetivu. Pirante husi importansia media iha kriasaun vida demokrasi ne’e rasik, media mos asumi papel nudar kanais do edukativu ba transformasaun informasaun nebe maka fo sai ba publiku.

Husi sikun seluk,papel importante husi media tuir ema komunikasaun sira no media nain sira inklui mos ba ema sira nebe halao profisaun nudar ema journalista sira maka    oferese informasoens  edukativus, sai kanais entretenimento no ikus liu sai ajente ba kontrolu sosial. Maibe iha realidade ba situasaun ohin loron, media nia prezensa liu husi informasaun hirak nebe maka fo sai ba publiku lakon tiha ona ninia nuetralidade husi papel komum hirak nebe maka iha tuir teórika no pratika husi importansia media ne’e rasik. Hanesan selesaun ba  eventos ou topiku ba headline, se maka sai fontes informasaun, linguasem nebe maka fo sai ba publiku no informasoens nesisita nebe publiku presija atu hatene lakon iha dalan klaran.

Normalmente media iha nia apresentasaun ba informasoens nebe maka fo sai ba publiku, tenta atu fanun kunsiensia ba publiku liuhusi dadus relevantes nebe bele sai pontu de aranka ba publiku atu bele hatene situasaun atual ohin loron. Tamba media iha obrigasoens atu desempenha ninia funsoens hodi informa ba publiku ho reportajen nebe krítika, independênsia no profundidade ideas hodi hateten lialos. Mais, iha parte seluk tamba deit ejisensia merkadu, media adopta tiha ona politika pratika ho ninia lojika informasaun nebe maka fo sai somente nakonu ho espetakular, sensasional  no bele mos sai ajente  manipuladora tamba intereses balun.

Fenomenu ida ne’e ita hasoru  iha nutisias loron loron nebe apresenta ba ita maka palavra ajita malun, provoka malun, notísias, kalúnia nebe laiha liu valor boa edukasaun polítika ba publiku. Media sira sei prefere liu deklarasaun atakas husi parte A ba B. No aban fali mosu fali auto defeza husi Parte B ba deklarasaun parte A. Wainhira publiku hasoru karateristika nutisia hanesan ne’e, kuntiudu tomak husi nutisia ne’e rasik la apresenta pasadu husi atakas malun ne’e maibe publiku akompanha maka auto defeza husi parte idak idak ba situasaun ne’e.

Ironiku liu fali wainhira publiku hetan nutisias kona ba esistensia partidu politiku foun balun nebe ofisialmente deklaran an nudar partidu foun nebe hamrik atu kompete iha eleisaun. Nutisia kona ba partidu foun ne’e la iha kuntiudu edukativu tamba lakon sentidu hodi apresenta deit nutisias deklarasaun tamba sa maka partidu foun ne’e hamrik. Maibe, publiku nungka hare pasadu husi ema hirak nebe harii partidu ne’e iha nutisia ne’e rasik. Nutisias ho tipu hanesan ne’e kuntinua hamosu perguntas bo’ot ba eleitores sira. Situasaun hirak ne’e ita hasoru beibeik iha media sira ohin loron. Media prefere liu halo publikasaun ba deklarasaun husi liders balun nebe refere liu ba ninia deklarasaun politika hasoru ninia adversariu seluk. Kuntiudu tomak husi deklarasaun, media fo sai iha sira nia journal. Ironiku liu wainhira deklarasaun hirak ne’e la aplika no representa  regras no prosidementus servisu journalism wainhira tama ba nutisias.

Iha sikun seluk, profesionalismu servisu iha media sira sempre toma konsiderasaun masimu katak media asumi papel nebe mais importante tebes  hodi eduka publiku kona ba esistensia partidu politiku sira ne’e iha prosima eleisoens, Hodi nune’e publiku bele iha informasaun sufisiente husi partidu politikus sira ne’e no mos ninia ema sira nebe involve iha partidu ne’e rasik.

Klaru los katak atividade polítika ho servisu  media nudar partes rua nebe iha diferensias husi definisaun komum.Maibe, nain rua hanesan fen ho laen nebe presija malun tebes iha kualker situasaun.  Media, reqere ba  karaterístikas polítika prátika nebe rápido, no la ezizi ba profundidade ideas nebe  konsiste husi figuras antagonista no protagonista. Polítika mos presiza media nudar fatin ou kanais hodi jere ideas nebe maka iha ba publiku. Tamba ne’e sei laiha movimentu ou atividade partidu politiku ruma nebe la fo importansia ba prezensa media. Mosu perguntas ba ita wainhira publiku hasoru situasaun hanesan ne’e. Oinsa publiku bele hatene partidu ne’e ninia politika se iha deit maka provakasoens entre liders sira nebe fo sai husi media sira??. Oinsa atu publiku liu liu ninia eleitores sira hatene ho diak partidu hirak ne’e ninia vizaun no misaun se informasaun nebe iha tendesioza atakas pesoal ou lider seluk??? Nsst.

Maibe ou karik tamba deit dezenvolvimento  indústria  media iha Timor Leste, moris buras tebes ona ho ninia LEMA halais servisu hodi hetan informasaun atu hato’o ba publiku, maske informasaun ne’e prense rekejitus servisu journalism ka lae (who cares). Afinal ita hotu hatene katak, papel  media laos deit iha dever no direito hodi hato’o informasaun ba públiku ho karateristika nebe lais, mais tengki optimiza mos ninia funsaun nudar edukador no kontrolu sosial. Sentidu nudar edukador no kontrolu sosial ne’e maka  sai polemika bo’ot ba ita nia media sira iha kuntiudu nutisias nebe maka publiku akompanha lor loron. Tamba deit ezizensia komersiais, servisu journalismu lakon tiha ona ninia funsaun origin ba servisu  jornalístiku nian. Dominânsia aktus  komersiais labele ona halo media sira servisu ho nia profesionalismu tomak.

Konsekunesia husi era ida hanesan ne’e,  industria media lafo importansia ona ba kuntiudu husi nutisias ne’e rasik. Importante ba media sira oinsa pajina edisaun ohin nian bele nakonu ho informasaun, maske informasaun hirak ne’e ninia kualidade lahatudu servisu journalismu nian.

Ikus liu ita lakohi Media Timor Leste iha ninia nutisias lor loron hato’o ninia informasaun laos tamba ninia profisaun maibe tamba iha forsa eksternal seluk nudar agente konstrusaun. Se nune’e duni,  sinais negativu balun komesa lao dadaun ona katak realidade  servisu media la refleta ona   verdadeira ba informasaun nebe publiku espera atu hetan.

Karik Conselho  Imprensa nebe maka foin harii iha fulan hiral liu ba tengki ona ho seriedade tau matan  ba media sira hodi halao sira nia funsaun ho responsabilidade tomak hodi fornese informasaoens ba publiku ho kualidade.

Renato da Costa

Observador Media
renato_costa25@yahoo.com
77884674

STAE: Sosializa Prosesu Eleisaun Suku Ba Funsionariu STAE No Kordenador Projetu ba Distrito

Dili, Radioliberdadeonline - Sekretariadu tékniku administrasaun eleitorál (STAE) organiza enkontru hodi sosializa lei suku (no 9/2016) no mós fahe informasaun kona-ba ezbosu matadalan formasaun ne’ebé dezenvolve liu husi kooperasaun entre projetu USAID nian ba Distritu no STAE. Sorumutu ne’e hala’o iha salaun enkontru STAE nasionál Caicoli Dili (18/08/2016) ne’ebé partisipa husi koordenadór STAE munisípiu no funsionáriu STAE nasionál inklui partisipasaun husi koordenadór projetu ba distritu nian ne’ebé destaka iha munisípiu Baukau, Liquica, Kovalima, Ermera no mós Oecusse.

Sosializasaun lei ne’e krusiál ba funsionáriu STAE no mós koordenadór projetu ba distritu iha munisípiu sira atu bele hetan informasaun detalladu hodi bele integra rekursu hotu atu fó apoiu tékniku ba konsellu de suku sira hodi realiza eleisaun suku ne’ebé sei akontese iha loron 30 Setembru 2016.

Governu liuhusi Konsellu Ministru iha tersa feira semana ne’e (16/08) dekreta loron atu hala’o sorumutu Asembleia Aldeia nian no Konsellu Suku nian ho ninia objetivu mak atu konstitui meza eleitorál Suku sira nian no atu simu kandidatura ba Xefe Suku ne’ebé sei hala’o iha loron 15 fulan-Setembru. Sorumutu Asembleia Aldeia nian sira ne’ebé hala’o ho objetivu atu hili delegadu Aldeia nian sira ba Konsellu Suku, nune’e mós Xefe Aldeia sira no Xefe Suku sira sei hala’o iha loron 30 fulan-Setembru.

Depois de apuramentu ikus husi rezultadu eleisaun, Xefe Suku nian sei hala’o sorumutu iha loron 01 fulan-Outubru. Maibé Karik presiza eleisaun Xefe Suku sira nian ba volta daruak, maka sei hala’o iha loron 07 fulan-Outubru , ho apuramentu ikus husi rezultadu sira iha loron 18 fulan-Outubru. Ikusliu, sorumutu Konsellu Suku nian sira atu hili Lian-na’in sira ninian no reprezentante juventude  sira iha Konsellu Suku, marka ona ba loron 22 fulan-Outubru.

Forma eleisaun suku bazeia ba lei Nú 9/2016 sei hala’o eleisaun suku ho modu sufrájiu, diretu, sekretu, livre no pesoál.  Konsellu suku kompostu husi; xefe suku, xefe aldeia no delegadu no delegada ne’ebé sei hili husi komunidade iha nivel aldeia, enkuantu joven mane ida ho joven feto ida ho idade (17-30) no lia nain ho idade bo’ot liu iha suku ididak sei hi hili liu husi asembleia suku.

Diretór Jerál sekretariadu tékniku administrasaun eleitorál Sr.Acilino Manuel Branco rekoñese limitasaun ba tempu sai dezafiu maibé nia reforsa katak sei utiliza rekursu hotu atu fó apoiu ba eleisaun suku “Ita konvoka enkontru ne’e entre parte STAE no Projetu ba distritu atu nune’e bele entende didi’ak nia papél hodi fó apoiu ba eleisaun suku. Fase importante ida mak ita sei hala’o sosializasaun lei suku, publikasaun ba matéria eleisaun suku no mós formasaun ba formadór sira iha nivel nasionál hodi sira bele fó fali kapasitasaun ba konsellu suku sira atu organiza eleisaun”.

USAID nia Projetu Ba Distrito servisu hamutuk ho STAE hodi prodúz ona vídeo no poster kona-ba prosesu eleisaun tomak atu publika liu husi meius komunikasaun sosiál no mós espasu públiku hodi nune’e bele konxiensializa eleitór sira atu tuir votasaun no mós fó koñesimentu ba komunidade sira kandidata an no mós tuir eleisaun ho másimu.

Projetu Ba Distrito no STAE nia koordenadór, iha munisípiu lima (Baucau, Ermera, Liquisa, Covalima, Oecuse) , sei tun ba suku no aldeia hodi reforsa STAE atu fahe informasaun kona-ba, prosesu eleisaun suku atu nune’e ajuda konsellu suku sira kompriende lala’ok eleisaun ho nune’e bele organiza eleisaun suku iha nivel aldeia no suku iha Territóriu Timor-Leste.

Xefe Ekipa Projetu ba Distritu, Sra. Carolyn tanner,  hatutan knar importante ida husi projetu ba distritu nian mak ajuda órgaun eleitorál sira no mós Ministériu administrasaun estatál, atu implementa eleisaun suku “ami servisu hamutuk ho MAE no STAE atu ajuda implementa eleisaun suku no prátikamente ami servisu ho STAE atu hasae partisipasaun votante ho inkluzivu no mós hala’o publikasaun ba matéria eleisaun nune’e mós ami hala’o formasaun ba konsellu suku sira kona-ba estrutura konsellu suku foun no prosesu eleisaun, atu nune’e konsellu suku no mós eleitór sira bele kompriende prosesu eleisaun hodi partisipa ho másimu iha eleisaun suku”.

Konsellu suku iha kompeténsia ne’ebé bo’ot atu prezide konsellu suku, halo konsultasaun ho komunidade kona-ba dezenvolve no implementa planu dezenvolvimentu komunitáriu, halo mediasaun ba konflitu no mós promove kobransa reseita despeza suku. Relasiona ho kompeténsia ne’e, mak eleisaun suku importante ba populasaun iha aldeia no suku hotu atu bele tuir eleisaun iha loron 30 fulan Setembru 2016 iha suku 442 no aldeia 2,225 iha territóriu Timor-Leste laran tomak.

Rádio Liberdade, Dili