Fretilin Lakon tan Figura Diak Ida

DILI - Ali Bin Hamud Alkatiri neebe fila hikas ba Aman Maromak nia kadunan santu iha loron 15 Fulan Setemburu 2017 iha Hospital Nasional Guido Valadares (HNGV) oras 11.45 Timor-Leste, laos deit lori tristeza ba familia matebian mesak. Maibe lori mos tristeza boot ba Partidu Fretilin tanba matebian mos nuudar figura Fretilin diak ida.

Tuir Deputadu David Mandati Dias Ximenes husi Bankada Fretilin katak, familia boot Fretilin mos lakon figura diak ida, tanba desde iha matebian ninia sekuensia vida da luta primeiru momentu kedas nia adere ba Fretilin.

"Hau konese nia (red Ali) kleur kuandu nia sei joga iha Akademika Ponta Eskuerda, depois nia tun mai husi ai-laran ami sei lao hamutuk, ami sei koalia barak ba malu. Matebia nia konselu mak ida nee, ita nia maluk barak mate ona ita tenki halo luta ho ulun-fatuk labele halo ho fuan ho nervus deit. Ho ulun-fatuk hodi fungsiona didiak hodi poupa ema restu neebe sei moris,” David haktuir matebia nia lia-fuan ba Jornalista sira iha Comite Central Fretili (CCF) Comoro, Sabadu (16/9/2017).

Deputadu nee realsa liutan katak, nia kuinese diak liu matebian Ali nia privadu hanesan ema neebe simples, lakoalia barak koalia uainhira iha hanesan subtansi nia sente katak los diak, enkonsonasi ho situasaun foin nia kolia, nia kolia halimar mos mais ho temperadu.

Diferensa Ideias, PN Suspende Votasaun Projetu Delibresaun Liberasaun No 5/Iv

DILI - Durante loron 2 Parlamentu Nasional (PN) lakonsegue halao votasaun ba projetu de liberasaun no 5/IV (1) ba komisaun revizaun do rejimentu Parlamentu Nasional, tanba diferensa ideias entre partidu opozisaun ho koligasaun.

Iha plenaria diskusaun ba votasaun projetu deliberasaun no 5/IV halao durante loron 2 hanesan plenaria segunda halao diskusaun lubuk ida, lakonsege vota adia Tersa nee, maibe iha plenaria nafatin halo diskusaun, iha diskusaun mai ho diferensa ideias husi opozisaun husu atu suspende fali, no koligasaun hakarak halao votasaun.

Tanba nee iha diskusaun nee opozisaun husu retira husi lista husi projteu deliberasaun nee, ho nunee PN halo suspende ba votasaun projetu de liberasaun no 5/IV (1) ba komisaun revizaun do rejimentu Parlamentu Nasional.

Iha sesaun plenaria Parlamentu nasional, Prezidente PN Aniceto Guteres hatete, votasaun projetu deliberasaun ba komisaun rejimentu parlamentu nasional nee diskusaun halo ona, maibe adia too ohin.

Arao: Tuir Los Laiha Ona Fatin Ba Insidensia Parlamentar

DILI – Oras nee VII governu forma husi Partidu Fretilin no PD, maibe atu iha tan insidensia parlamentar, tuir los labele ona, tanba akordu koligasaun forma ona governu.

Informa Xefi Bankada CNRT Arao Noe katak, sira bankada CNRT nia pozisaun nee mai reprezenta partidu, tanba nee sira mai lahalo politika ida-idak nian. Tanba politika halao bazeia ba komferensia katak halo knar hanesan opozisaun.

"Se karik Fretilin husu CNRT atu iha insidensia parlamentar Arao hatete, hau hanoin insidensia parlamentar tuir los laiha ona fatin, tanba iha ona akordu partidu 2 halo koligasaun forma governu. Insidensial nee akontese kuandu governu nee forma minoriataria, depois husu partidu ida ka rua halao akordu katak apoiu hau nia programa,” katak Arao ba STL Tersa (19/09/2017) iha PN.

Nia hatete, maibe haree ba agora nee iha ona partidu Fretilin ho PD asina akordu halo ona neebe governu mos iha ona, nee bele garante ona governativa ba tinan 5. Presiza kalae, depende negosiasaun entre lider partidu sira, maibe CNRT nia poziosaun desde komferensia mak opozisaun.

Hasoru Alkatiri, Naimori Prontu Servisu Hamutuk

DILI – Konseleiru Partidu Khunto Jose Naimori hasoru malu ho Primeiru Ministru Mari Alkatiri, hodi koalia konaba kolaborasaun servisu hamutuk entre partidu rua nee iha futuru.

Enkontru neebe halao iha palasiu Nobre Lahane, Tersa (19/9/2017), Konseleiru Partidu Khunto Jose Naimori akompania husi membru partidu Khunto nain ida ho eskoltu nai rua, too iha Palasiu Nobre Lahane tuku 12:12 OTL, ho kareta prado marka 23.378

Hafoin remata hasoru malu ho Primeiru Ministru Mari Alkatiri, Naimori hateten, sira prontu kolabora servisu hamutuk ho se deit, atu nunee nasaun bele lao ba oin ho diak.

"Ita hotu hotu tenke kria estabilidade no ita hotu hotu prontu atu servisu hamutuk iha Timor laran, para nunee nasaun nee bele lao ba oin,” dehan Naimori, bainhira remata hasoru malu ho PM Mari Alkatiri, iha Palasiu Nobre, Lahane, Dili, Tersa (19/09/2017).