AKUZASAUN BARAK LA IHA PROVAS, DEFEZA HUSU ABSOLVE ARGUIDA EMILIA

Defeza husi arguida Emilia Pires, kompostu husi Rui Costa ho Jose Pedro Camões,  husu ba Tribunal Primeira Instansia atu absolve Arguida Emilia Pires, tanba defeza konsidera katak, akuzasaun barak husi Ministeriu Publiku (MP) la iha provas no la aprova.

Eis Ministra Finansas (MF), Emilia Pires, hetan akuzasaun husi MP tanba envolve iha kazu krime partisipasaun ekonomia do negosio, kona-ba prosesu konkursu publiku fornese kama ba Hospital Nacional Guido Valadares (HNGV) ne’ebe konsidera argiuda Emilia futu lia ho eis Vise Ministra Saude, Madalena Hanjam, foti fo projetu fornesimentu kama HNGV ba Macs Metalcraft Pty Lda husi Australia, ne’ebe ninia diretor maka arguida Emilia Pires nia laen.

Liu husi alegasaun final, Kinta (22/9/2016), iha Tribunal Distrital Dili (TTD), Rui Costa ho mos Jose Pedro Camões, esklarese katak,  akuzasaun husi MP ne’e barak la iha verdade no durante julgamentu ne’e testamunha barak nia deklarasaun la hanesan ho akuzasaun ne’ebe MP aprezenta.

Defeza mos husu absolve arguida husi alegasaun MP atu arguida selu deit indeminizasaun ho mos kustu judisiariu.  Maske nune’e, antes ne’e alegasaun husi MP konsidera arguida sira viola prosedementu no laos kategoria emerjensia hodi foti osan husi fundu audisional hodi halo ajudikasaun dereta ba kompania Macs Metal Crafts (arguida Emilia nia laen nia kompania). Tanba ne’e MP konsidera arguida sira provas duni viola ona artigu 174 konaba adminsitrasaun danoza no artigu 299 konaba partipasaun ekonomiku.

MP mos konsidera eis akuzasaun MP hatudu duni provas katak, tanba durante julgamentu ne’e liu husi testamunha sira nia deklarssaun  hatudu duni provas.

Audensia julgamentu ne’e prezidi husi juiz koletivu Jose Maria de Araujo, Francisca Cabral no Maria Solana Fernandes.  MP representa husi prokuradora Angelina Saldanha, Lidia Soares ho Jacinto Babo, tantu arguido Emilia Pires hetan asistensia legal husi advogadu privadu Jose Pedro Camões ho  advogado Rui Costa.

Arguida Madalena Hanjam hetan asistensia legal husi advogadu privadu Jose Guterres akompaña husi advogado husi Portugal nain rua. Audensia julgamentu ne’e adia fali ba loron 21 fulan Outubru 2016, tuku 11:30 Otl,  hodi rona fali deklarasaun ikus husi arguida Emilia.nia

Jornal Nacional

PV BELE HAMOSU EKONOMIA INSUSTENTAVEL

Wainhira Parlamentu Nasional (PN) la altera lei Pensaun Vitalisia (PV) ne’ebé agora dau-dauk ezisti iha Timor-Leste (TL) hatuun ba 50%, sei hamosu ekonomia insustentavel iha rai laran.

“Hori uluk kedas Partidu Sosial Demokrata (PSD) vota kontra lei Pensaun Vitalisia (PV). Ami la konkorda ho sistema PV ne’e bele hamosu buat ida ne’ebé halo ita nia ekonomia sai insustentavel,” hateten Prezidenti PSD, João Gonçalves liu husi konferensia imprensa ne’ebé hala’o iha sede PSD, Kolmera-Díli, Sábadu (24/09/2016).

João Gonçalves hatutan katak, PSD konkorda ba PV, maibé la’os individu ne’ebé ba tuur mandatu ida de’it hetan PV ne’e labele, tanba nasaun laiha ida maka halo hanesan ne’e. Ho razaun ba nasaun Australia ninian pelo menus individu ida halo mandatu dala tolu (3) maka foin bele hetan PV kuandu kompleta ona servisu tinan 12.

“Agora dadauk sistema ne’ebé maka ita iha, atual lei ne’e, ha’u bele dehan katak aban bainrua ita nia Orsamentu Jeral Estadu (OJE) selu PV no osan vitalisia ba dezenvolvimentu no hadia ita nia povu nia moris sei sai ho sistema atual, tanba ne’e tenke reve duni,” nia dehan.

Nia afirma, TL tenki komprende katak lei inan mós simu direitu internasionál públiku, ne’ebé TL defende buat ne’ebé maka prinsípiu direitu adkeridu katak ema ne’ebé adkeridu ona labele halakon ninia direitu ba PV.

“Tanba ne’e maka iha futuru lei PV labele kontinua hanesan ne’e, nune’e ita tenki modifika, maibé sira ne’ebé maka uluk hetan tiha ona ita atu dada sai fali direitu, ne’e la’os ita kontra de’it ita nia lei rasik maibé ita kontra direitu internasionál públiku, tanba ita simu tiha ona liu husi ita nia konstituisaun defende prinsípiu direitu adkeridus,” tenik João Gonçalves.

Nia salienta katak, pesoalmente hanesan eis titular iha Parlamentu Nasional (PN) maibé la simu PV, tanba agora dau-daun halo hela servisu seluk ba Estadu nu’udar Xefi Unidade Misaun ba Dezenvolvimentu Sub-Rejiaun Ekonómiku Integradu, nune’e to’o agora la simu PV.

Entretantu tuir eis Xefi Bankada UDT, Quiteria da Costa dehan, sira halo lei PV, tanba halo estudu komparativu iha rai liur iha nasaun 3 ou 4 foti sai referensia nasaun sira ninia konabá PV, iha ema ninia nasaun ne’e la 100%.

“Ha’u tama Komisaun Eventual (KE) ba halo lei Pensaun Vitalísia, ami maka hetan oportunidade iha Governu anterior vizita ba rai liur iha nasaun tolu ka hat para atu foti referensia nasaun sira ninian konaba Pensaun Vitalísia, depois de fila husi vizita ami hatama relatóriu katak lei Pensaun Vitalisia ne’e nasaun hotu iha, maibé 50% too 75% de’it, entaun ami hanoin katak povu Timor Leste ne’e sei moris iha kraik liu entaun nusa maka ita la hatama 50% de’it,” nia dehan.

Nia akresenta katak, depois relatóriu ne’e hatama kedas ba PN, maibé tanba iha momentu ne’ebá FRETILIN maioria liu, sira la halo diskusaun konabá relatóriu vizita iha rai liur ne’e, nune’e derepenti de’it rona katak aprova tiha ona lei Pensaun Vitalisia.ves

Jornal Nacional

PV TENKI HATUN BA 50% NO HALAKON DIREITU REGALIAS

Sosiedade Sivil ejize Parlamentu Nasional atu hatun Pensaun Vitalisia (PV) ba pursentu 50 no  halakon  kedas direitu  regalia hanesan, livre  hatama  sasan, ense  pulsa  gratuita no mina  ba  kareta, inklui sira seluk.

Reprezentativu  Programa  Officer  In  East  Timor  iha  Asia  Justice  and  Right’s  (AJAR),  Inocencio  de  Jesus  Xavier, apresia no louva  ba  inisitiva Parlamentu Nasional hodi loke diskusaun ba lei pensaun vitalisia.

 “Ami  ejize Parlamentu Nasional atu hatun direitu ne’e ba 50%  husi  sira  nia  salariu  no  hasa’i  hotu  sira  nia  direitu  regalia  sira  seluk,  liu  liu  ba  orgaun  soberania  sira, tamba  direitu  ida  ne’ebe  mak  sira  hetan  ne’e  konaba  direitu  salarial  ba  pensaun  ne’e  sira  iha  direitu, maibe  labele  direitu  absoluta  ida  100%,  agora  sai  de’it  10%, maibe  tenki  tun  ba  50% razoavel  atu  refleta  duni  realidade  sosiu  ekonomia  no  ita  nia  rendimentu  Estadu, ita  iha  problema  ne’e  mak  ita  hamosu  no komisaun  fiscal  ba  reforma  impostu ne’e,’’dehan reprezentativu  programa  officer  in  east  Timor  Asia  Justice  and  Right’s  AJAR  Inocencio  de  Jesus  Xavier  ba  JN-Diário  iha  nia  servisu  fatin  Farol, Sesta  (3/9).

Nia dehan, povu  moris  nafatin  iha  ekonomia  ida  ne’ebe  mak  tun  infrastrutura  baziku  ne’ebe  mak   halo  komprimisiu  liu  husi  MDG’s  nian   ne’ebe  hakotu   iha  2015  realidade  infra  estrutura  baziku  la  resolve, mortalidade  infantil, servisu  agua  evastamentu  nafatin   povu  sira  asesu  ba  eletrisidade  kontinua  ona, tamba  ne’e   tenki  hanoin  politika  poupansa  Estadu, Governu no  PN  ejiji  politika  popupansa  mas  na realidade  pratika  laos  politika  poupansa  ,tamba  orsamentu  ne’e  atu  fó  benefisiu  de’it  ba  eis  titulares  sira.

Tamba  ne’e  mak  lei  pensaun  vitalisia  ne’e  laiha  sentidu  ida  ne’ebe  mak  ladiak  iha  esbosu  lei  sira  mai  ho  proposta  lei  lista  uniku  ne’ebe  mai  husi  bankada  4  ,tamba  sira  mai  ho  interesida  consensus, nune’e  sira  hatur  60%  to’o  90%.

”Ami  ejize  nafatin  atu  hatun  pelu menus  ba  50%  husi  sira  nia  salariu  no  hasa’i  hotu  sira  nia  direitu  regalia  sira  seluk  liu  liu  ba  orgaun  soberania  sira  seluk, tamba  direitu  ida  ne’ebe  mak  sira  hetan  ne’e  konaba  direitu  salarial  ba  pensaun  ne’e  sira  iha  direitu, maibe  labele  direitu  absoluta  ida  100%  agora  sai  de’it  10% ,maibe  tenki  tun  ba  50% razoavel  atu  refleta  duni  realidade  sosiu  ekonomia  no  ita  nia  rendimentu  Estadu, ita  iha  problema  ne’e  mak  ita  hamosu  no komisaun  fiscal  ba  reforma  impostu ne’e,’’esplika Inocencio.

Tamba  ne’e  mak  nudar  sosiedade  sivil   husu  atu  labele  hamate  explorasaun  ida  husi  Estadu  no  lideransa  sira  ba  povu  no   sujere  husi  jeneralidade  no  mós  kestaun  balun  husi  sosiedade  nia  hare  katak, laos  atu  halakon  mas  pelemenus  bele  hasa’i  husi  metade  sai  50%.

Nia  dehan, tenki  determina  lolos, tamba  wanhira  deputadu  ou  deputada  ida, wanhira  mate  nia  oin  ho  nia  kaben  labele  simu  to’o  da  vida, tamba  povu  ne’e  hili  de’it  laos  sira  nia  fen  ho  oan  mós  tama  hotu  iha  lista  eleisaun nian, maibe  ne’e  hanesan  fundu  rekonesementu  de’it.

Aliende  kona  ba  sira  nia  kontribuisaun  mak, wanhira  sira  ho  idade  produtivu  hela  sira  labele  simu  ,maibe  tenki  determina  sé  tinan  60  mak  sira  bele  hetan  ,tamba  wanhira  sira  servisu  iha  instituisaun  seluk  ho  salariu  ne’ebe  mak  mai  hanesan  husi  Estadu  tenki  perde  lalais  salariu  ida  pensaun  ne’e.

“Ami  sujere  atu  hadia  iha  redasaun  ba  lei  ne’e  antisipa  ne’ebe  agora  ne’e  iha  espesialidade  husu  atu  hatun  60%  ba  50%  para  fó  justifikasaun  ida  ne’ebe lolos   atu  labele  fó  espasu  ba  partidu  politika  atu  koalia  iha  kampanhia  ba  eleisaun  2017,”dehan nia. Nune’e  mós  lei  pensaun  vitalisia  ne’e  labele  sai  kartus  musan  ba  p[artidu  foun  sira  no  mós  partidu  tuan  ne’ebe  tenki  hatudu vontade  debate  ho  fuan  ,laos  ho  lia  fuan  retorika  politika.

Iha parte seluk, diretur  La’o  Hamutuk  Juvinal  Dias hatete,  parlamentu  tenki  sensivel  ba  sosiu  sosial  ekonomiku, tamba  iha  tinan  barak  nia  laran  NGO  halo  advokasia  ho  estudante ho  grupu  komunitariu  sira  husu  ba  PN  atu  halo  alterasaun  ba  LPV  ne’e.

”Ami  sente  LPV  ne’e  mais  koruptu  no  la  fó  valor  ba  povu  kiak  sira  inkluindu  lei  ne’ebe  ba  ukun  nain  sira  de’it  ami  sosiedade  sivil  apresia  ho  sira  nia  hanoin  atu  halo  alterasaun, maibe  sira  mós  tenki  konsidera  alterasaun  ne’e  tenki  iha  baze  atu  promove  justisa  sosial  ekonomiku, laos  de’it  atu  hatan  ba  presaun  politika,’’dehan Juvinal.

Tuir Juvinal, hatun  ba  60%  ne’e  presiza  iha  kanklu  ekonomiku  ,laos  atu  hamenus  de’it  numeru  angka  katak, tamba  saida  make  tenki  hamenus,oinsa  hamenus, osan  sira ne’e  mai  hsui  ne’ebe, kontribuisaun  deputadus sira iha  PN  agora  ne’e  oinsa, sira  simu  to’o bainhira, tinan  no  durasaun  tempu  ne’e hira.

Nia dehan, alterasaun  ho  kontiudu  hotu  hotu  presiza  fó  konsultasaun  iha  públiku  no  povu, tamba  atu  muda  LPV  laos  inisiativu  husi  parlamentu  ne’e  husi  povu  ninia  presaun, maske  membru  parlamentu  sira  iha  poder  atu  halo  lei   sira  iha  obrigasaun  moral  atu  konsulta  povu  katak, saida  mak  povu  nia  hakarak.Tos 

Jornal Nacional

TL AMBISAUN TAMA ASEAN BELE FO AMEASA BA POVU

Sosiedade sivil  husu ba Governu Timor  Leste (TL)  labele  ambisiozu no tama urjentemente ba Association of South East Asia Nations (ASEAN), tamba Timor Leste seidauk  preparadu  didiak  iha  area  infraestrutura  no  ekonomia,  nune’e  iha  futuru  sei  fó  ameasa  ba  povu  Timor  Leste.

“Ba ami sosiedade sivil nia  pontu de vista, laos urjente Timor Leste adere  lalais ba ASEAN, tamba ASEAN nia prinsipiu  ne’e  ho  pilar  3  husi  objetivu  ne’e  fó  ameasa  ba  povu  Timor  Leste, ASEAN  seidauk  mai  de’it  traballadores  imigrantes  ne’e  domina  tiha  ona Timor  hanesan  Indonesia  ho  China  no  nasaun  sira  seluk hodi fa’an sasan  hirak  ne’ebe  mak   negosiantes  Timor  oan  mós  bele  fa’an,’’dehan reprezentativu  programa  officer  in  east  Timor  Asia  Justice  and  Right’s  (AJAR), Inocencio  de  Jesus  Xavier  ba  JN-Diário  iha  nia  servisu  fatin  Farol,  Sesta  (23/9).

Nia informa, satan Timor Leste tama nudar  komunidade, kultura, ekonomia  ida  ne’e  ema  sei  mai  de’it, tamba  Timor  labele  halo  novu  intereferensia  ba  sira,  nune’e  bele  fó  ameasa  bo’ot  ba  Timor  Leste  nia  soberania,  liu  liu  ekonomia.

Nia hatutan Timor  Leste  seidauk  prepara  diak,  liu  liu  restaurante, hotel, warung  kikuan  sei  la  folin, tamba  Timor  nia  kapasidade  iha  atendementu  seidauk  diak, kualidade  abilidade  ‘ketrampilan’ ladun  diak,  nune’e  ema  sei  hili  China  no  Indonesia  do  que  Timor  oan  no  orsamentu  hirak  ne’e  sei  investe  hotu  ba  rai  liur.

Aliende  kona  bá  kultura  mós  sei  sai  ameasadu  no  idantidade  mós  sei  lakon, tamba  ne’e  mak  Timor  Leste  tenki  haree  didiak  antes  Timor  atu  sadere  ba  ASEAN.

“Ami  haree, kestaun  direitus  humanus  importante  mós, tamba  sé  ita  tama  ASEAN  kestaun  direitus  humanus  ne’e  oinsa, tamba  ita  iha  problema  ho  Indonesia  ninia  situasaun  pasadu,  sé  ita  tama situasaun  violasaun  direitus  humanus  ba ne’ebe, tamba  ne’e  ami  husu  ba  Governu  liu  husi  Ministru  ho  nia  vise  negosiu  estranjeirus  halo  tan  servisu  lai, laos  urjente  lori Timor  Leste  atu  tama  lalais  ba  ASEAN,’’nia  hatete.

Nia dehan  Timor  Leste  sei  iha  problema  infrastrutura, ekonomia no emprezariu  sira  agora  sei  hakdasak  hela, kaer  projetu  mós  deve  tun  no  deve  sa’e  hela,  menus  capital, rekursus  humanus, tanba ne’e barak  liu  sei  uza   engenheiru  estranjeirus  nian.

Tuir nia, nasaun  sira  ne’ebe  mak  involve  iha  membru  ASEAN  ne’e  mak  agora  nia  embaxada  iha  Timor  nune’e  diak  liu  Timor  Leste  hadia  nia  politika  bilateral  ho  multilateral  no  implementa  desentralizasaun  hodi  sai  sasukat  ida  nune’e  to’o  ikus  mak  Timor  bele  tama  ba  ASEAN.

Iha  parte  seluk,  diretur   Organizasaun  Naun  Govermentais La’o  Hamutuk  Juvinal  Dias sekunda, Timor  Leste  atu  sai  membru  ASEAN  ou  lae  ne’e  laos  kestaun  bo’ot  ida  ba  povu  Timor, maibe  povu  Timor  nia  preukupasaun  mak  ninia  produtividade  ekonomiku  iha  rai  laran.

Nia dehan, sai  membru  ASEAN  agora, maibe  ekonomikamente  la  preparadu  ne’e  laiha  valor  ba  Timor, tamba  ne’e  Estadu  tenki  hanoin  laos  hakarak  sai  membru  ASEAN  mak  sai  tarjetu, maibe  hanoin  halo  povu  Timor  ne’e   hetan  benefisiu  husi  politika  Estadu.

Tuir  nia, importante  mak  povu  tenki  moris  ho  be’e  mós, tenki  iha  kampu  de  traballu  ho  industria  ki’ik  balun  ne’ebe  uza  materia  prima  husi  povu, ajuda  povu  nia  asesu  ba edukasaun  no  hadia  kualidade  edukasaun  no saude, halo  povu  hakmatek  inkluindu  halo  povu  nia  futuru  sai  diak  liu no  Estadu  iha  obrigasaun  atu  kontrola  orsamentu  Estadu  tinan  tinan.

Nia haktuir, kona ba  atu  sai  membru  ASEAN, haree  ba  tempu  de’it  sé  nasaun  sira  la  konkorda  lalika  preukupa , tamba  nasaun  ne’e  laos  ejiji  atu  ba  membru  ASEAN, maibe  atu  servi  povu  Timor  Leste  ne’e.

Nia esplika, desvantajen  Timor  tama  ASEAN  iha  kauza  ida  katak, nasaun  sira  ne’ebe  mak  sai  membru  tenki  adopta  merkadu  livre, maibe dala  barak  hafraku  Governu  no Estadu  rasik  atu  proteze  nia  produsaun  rai  laran.

Aliende  ne’e, Estadu  lakon  osan, tamba  iha  insensaun  ba  produtu  impor  sira  seluk  liu  liu  ne’ebe  mai  nasaun  ASEAN,  nune’e  ho  situasaun  hirak  ne’e  setor  privadu  sira  dala  barak  bele  hetan  profit, maibe  povu  lakon  ne’ebe  Estadu  tenki  hanoin.

Nia dehan tan iha nia vantagen rasik ba Timor Leste katak, bele haforsa dezenvolvimentu ekonomia Timor Leste, maibe ne’e mos se Timor  hatene  dezenvolve  nia  an, se lahatene  Timor  Leste  mak  sei  sai  merkadu  ba sira.Tos

Jornal Nacional

PARTISIPA ABERTURA UNGA IHA NOVA IORKE, PM RUI APELA BA MUNDU SERVISU HAMUTUK HARII PAZ

Primeiru-Ministru, Dr. Rui Maria de Araújo, akompaiña husi Ministru Planeamentu no Investimentu Estratéjiku, Ministru Negósius Estranjeirus no Kooperasaun, Embaixadora Timor-Leste (TL) nian ba Nasoens Unidas, Milena Pires, ba partisipa iha abertura UNGA (United Nations General Assembly) ba dala 71, iha Quartel General ONU nian, Nova Iorke (20/09).

“The Sustainable Development Goals: A Universal push to transform our world,” mak sai hanesan tema ba UNGA tinan ida ne’e. Serimonia ba UNGA 2016 hahú ho knananuk klásiku husi artista Italiano, Andrea Bocelli, no tuir kedas ho diskursu abertura husi Sekretáriu General ONU nian, Ban Ki-moon”, informa nota komunikadu imprensa ne’ebé mak redasaun Jornal ne’e simu husi Gabinete Média Primeiru Ministru (PM), Sesta (23/09).

Primeiru-Ministru no delegasaun asisti mós diskursu ba dahuluk husi Prezidenti Brazil, Michel Temer, nu’udar país membru CPLP, no diskursu ikus liu husi Prezidenti Estadus Unidus, Barack Obama, iha UNGA.

Iha okaziaun ne’e Primeiru-Ministru mós hato’o ninia intervensaun iha eventu “Pathfinders for Peaceful, Just and Inclusive Societies,” ne’ebé realiza husi Misaun Permanente Brazil no Suiça, iha asosiasaun ho Sentru Kooperasaun Internasional husi New York University.

Iha ninia intervensaun, Primeiru-Ministru fahe esperénsia Timor-Leste (TL) nian iha prosesu luta ba ukun rasik-an no prosesu harii nasaun. Primeiru-Ministru mós esplika oinsá Timor-Leste konsege ultrapassa konflitu oioin hodi kira estabilidade hanesan kondisaun xave atu hala’o dezenvolvimentu, hametin instituisaun no mellora povu nia moris.

Objetivu husi iha Ajenda 2030 ba Dezenvolvimentu Sustentável afirma momoos katak “dezenvolvimentu sustentavel sei laiha enkuantu laiha paz, no paz sei laiha enkuantu laiha dezenvolvimentu sustentavel.”

“Afirmasaun ne’e bolu ita hotu atu servisu hamutuk hodi harii paz, justisa, no sosiedades inkluzivu hodi kombate kauza sira ne’ebé hamosu violénsia, instabilidade, ho injustisa, no redobre ita-nia esforsu hodi rezolve no prevene konflitu”, haktuir Primeiru-Ministru.

Iha biban ida ne’e Sekretariu Jeral g7+, Dr. Helder da Costa partilla mós servisu g7+ nian no hato’o konvite ba grupu hodi bele mai partisipa iha konferensia internasional ne’ebé Timor-Leste sei realiza iha fulan Marsu 2017.

Eventu Pathfinders for Peaceful, Just and Inclusive Societies, hetan partisipasaun husi Ministru ba Familia, Labarik no Dezenvolvimentu Sosial Canada nian, Reprezentante husi Misaun Suisa, Reprezentante husi Misaun Brazil, Sekretariu Jeral g7+, Sekretariu Jeral World Federation of United Nations Associations (WFUNA), Diretor Sentru Kooperasaun Internasional NYU, Diretor Global Partnership to End Violence Against Children, nomos konvidadus sira seluk.*/ixo

Jornal Nacional

Komisaun ONU nian deklara kompetente ba konsiliasaun entre Timor-Leste ho Austrália

Komisaun ida konsiliasaun nian hosi ONU deklara ona kompetente hodi kontinua ho prosedimentu konsiliasaun entre Timor-Leste no Austrália kona-ba fronteira tasi sira nian, rejeita nune'e protestu hosi Canberra ba prosesu ne'e. 

"Desizaun kona-ba Kompeténsia Jurisdisional", hanesan lakon dahuluk hosi Austrália iha prosesu ne'e, fó koñese liuhosi komunikadu iha loron-segunda ne'e hosi Komisaun Konsiliasaun Públiku, ne'ebé konvoka hosi Timor-Leste iha loron 11 Abril, iha ámbitu hosi Lei Tasi nian, hodi tenta obriga Canberra hodi negosia markasaun hosi fronteira tasi sira nian entre nasaun rua ne'e.

"Komisaun entende ona katak hanesan kompetente hodi kontinua ho prosedimentu konsiliasaun nian", refere hosi komunikadu ne'ebé fó hanoin katak "bainhira hahú prosedimentu, Austrália indika nafatin nia hanoin hodi protesta kompeténsia jurisdisional hosi Komisaun".

Protestu hasoru kompeténsia hosi komisaun repete fali iha deklarasaun dahuluk sira hosi ekipa australianu iha loron 29 Agostu liubá bainhira hala'o sesaun abertura nian iha Haia.

Desizaun hosi kompeténsia foti ho unanimidade hosi membru na'in lima komisaun nian (na'in rua nomeadu hosi Timor-Leste, na'in rua nomeia hosi Austrália no membru na'in ida seluk hili hosi membru na'in haat).

Komisaun esplika katak agora sei halo "konsulta ba parte sira kona-ba futuru hosi prosedimentu konsiliasaun nian" no "hakarak konvoka reuniaun oioin ho parte sira iha tinan oinmai".

Parte barak hodi reuniaun sira ne'e "sei hala'o iha ambiente konfidensial ida, hodi proporsiona ambiente adekuadu hodi fasilita susesu ruma hosi konsiliasaun", hatete hosi komunikadu.

Timor-Leste hahú ona Prosedimentu Konsiliasaun Obrigatóriu (PCO) ne'e, ho baze iha termu sira hosi Anexu dalima hosi Konvensaun ONU nian kona-ba Direitu Tasi nian, tanba konsidera katak maski hosi akordu temporáriu sira hodi fahe rekursu sira Tasi Timor nian kontinua nafatin lahó fronteira permanente sira entre nasaun rua ne'e.

Díli protesta mós faktu katak Austrália sai hosi prosedimentu sira rezolusaun internasional sira, ne'ebé limita "dalan sira hosi Timor-Leste hodi kumpri nia direitu sira kona-ba direitu internasional".

Iha fundamentasaun hosi nia desizaun kompeténsia nian, komisaun rejeita pozisaun australianu katak troka karta sira nian entre Díli ho Canberra (iha 2003) kona-ba rezolusaun ba disputa marítimu liuhosi negosiasaun ida sei la hala'o liuhosi mediasaun ne'e.

Ba komisáriu sira, "troka hosi korespondénsia ne'e la konstitui akordu ida juridikamente vinkulativu", buat ne'ebé konsidera importante inklui iha prosesu ne'e.

Rejeita mós objesaun hosi Austrália ne'ebé hatete katak Timor-Leste viola tratadu ne'ebé agora daudaun iha, Tratadu kona-ba Determinadu Ajuste Marítimu sira iha Tasi Timor nian (CMATS) bainhira hahú prosedimentu ne'e.

Ba komisaun, bainhira iha violasaun ne'e tenki analiza iha prosedimentu ida ne'ebé oinseluk no la hanesan ho ida ne'e.

SAPO TL ho Lusa

Díli felisita desizaun "pozitivu tebes" hosi komisaun ba mediasaun ho Austrália

Iha loron-segunda ne'e Governu timoroan konsidera notísia "pozitivu tebes" kona-ba desizaun hosi komisaun ida konsiliasaun hosi ONU nian ne'ebé deklara kompetente hodi kontinua ho prosedimentu konsiliasaun entre Timor-Leste ho Austrália kona-ba fronteira tasi sira nian. 

Agio Pereira, ministru hosi Estadu no porta-vós Governu timoroan nian felisita desizaun hosi komisaun hodi afirma fali disponibilidade hosi Timor-Leste hodi tuur hamutuk ho Austrália.

"Timor-Leste preparadu, hanesan hatete beibeik ba Austrália, hodi kontinua ho prosesu ne'e no kopera ba susesu hosi komisaun", nia hatete ba Lusa hodi hatutan katak desizaun ne'ebé fó sai ohin foti iha loron 19 Agostu, loron ne'ebé komisaun hahú desidi.

Iha reasaun seluk ida, liuhosi komunikadu ne'ebé haruka ba Lusa, ezekutivu timoroan subliña importánsia hosi prosesu hodi husik loloos direitu timoroan sira nian.

Haktuir hosi komunikadu ne'e, negosiadór prinsipal hosi Timor-Leste iha prosesu ne'e, Xanana Gusmão, fó felisitasaun ba komisáriu tomak tanba nia serbisu no hatete fali kona-ba pozisaun timoroan nian ba nia direitu internasional sira.

"Ami luta no terus maka'as tanba ami nia independénsia nune'e mós ami sei la hakmatek to'o ami hetan ami nia direitu soberanu sira iha rai no iha tasi", nia afirma.

Agio Pereira mós, tuir haktuir hosi testu ne'e, konsidera ona katak desizaun reprezenta "oportunidade ida hodi harii ezemplu di'ak ida iha ami nia rejiaun".

Komisaun ida konsiliasaun nian hosi ONU deklara ona kompetente hodi kontinua ho prosedimentu konsiliasaun entre Timor-Leste no Austrália kona-bá fronteira tasi sira nian, rejeita nune'e protestu hosi Canberra ba prosesu ne'e.

"Desizaun kona-ba Kompeténsia Jurisdisional", hanesan lakon dahuluk hosi Austrália iha prosesu ne'e, fó koñese liuhosi komunikadu iha loron-segunda ne'e hosi Komisaun Konsiliasaun Públiku, ne'ebé konvoka hosi Timor-Leste iha loron 11 Abril, iha ámbitu hosi Lei Tasi nian, hodi tenta obriga Canberra hodi negosia markasaun hosi fronteira tasi sira nian entre nasaun rua ne'e.

"Komisaun entende ona katak hanesan kompetente hodi kontinua ho prosedimentu konsiliasaun nian", refere hosi komunikadu ne'ebé fó hanoin katak "bainhira hahú prosedimentu, Austrália indika nafatin nia hanoin hodi protesta kompeténsia jurisdisional hosi Komisaun".

Protestu hasoru kompeténsia hosi komisaun repete fali iha deklarasaun dahuluk sira hosi ekipa australianu iha loron 29 Agostu liubá bainhira hala'o sesaun abertura nian iha Haia, no mosu dalabarak durante loron rua ho balun hosi audénsia inisial ne'e.

Timor-Leste hahú ona Prosedimentu Konsiliasaun Obrigatóriu (PCO) ne'e, ho baze iha termu sira hosi Anexu dalima hosi Konvensaun ONU nian kona-ba Direitu Tasi nian, tanba konsidera katak maski hosi akordu temporáriu sira hodi fahe rekursu sira Tasi Timor nian kontinua nafatin lahó fronteira permanente sira entre nasaun rua ne'e.

Díli protesta mós faktu katak Austrália sai hosi prosedimentu sira rezolusaun internasional sira, ne'ebé limita "dalan sira hosi Timor-Leste hodi kumpri nia direitu sira kona-ba direitu internasional".

SAPO TL ho Lusa

MOVIMENTU UNIVERSITARIO TIMOR-LESTE (MUTL) - Komunikadu

Komunikadu imprensa

“La konkorda ho statementu husi Julia Bishop, Ministra Estranjeiru Australia nian ne’ebé deklara katak “Komisaun Konsiliasaun Obrigatoriu laiha juridisaun hodi aplika audensia kona-ba delimitasaun Fronteira Maritima”  

Iha 11 de Abril 2016, Timor-Leste hatama keixa kona-ba disputa Fronteira Maritima iha tribunal arbitrazem, liu husi mekanismu Konsiliasaun Obrigatoriu. Depois hatama keixa ne’e, Iha 25 de Junho, ONU simu Timor-Leste nian proposta no konsege estabelese komisaun independente ida kompostu husi konsiliador hamutuk nain lima mak independente, atu hodi rona argumentu husi parte Timor-Leste ho Australia nian. Iha loron 29 de Agostu 2016, komisaun independente ne’e hahu sira nian servisu hodi rona argumentu ba dahuluk mak hato’o husi ekipa negosiador Timor-Leste nian no mós husi Australia nian, primeiru seksaun audensia ne’e halao iha Haque, Olanda.

Razaun Timor-Leste nian ne’ebé mak hatama keixa  liu husi Konsiliasaun Obrigatoriu ne’e, tamba ita laiha dalan seluk atu bolu Australia hodi tur hamutuk no deskuti asuntu delimitasaun Fronteira Maritima, evidensia hatudu katak Australia iha 22 de Marsu 2002 dada a’an sai tiha ona husi prosesu obrigatoriu hodi resolve disputa relasiona ho fronteiras maritimas tuir juridisaun internasional UNCLOS nian.

Akordu CMATS asina entre governu Australia no Governu Timor-Leste, Iha 12 Janeiru 2006, ne’ebé hetan konkordansia atu fahe rendementu husi kampo Greater Sunrise nian ba porsentazem 50:50, no la ko’alia kona-ba kestaun delimitasaun Fronteira Maritima ba tinan 50 nian laran. Akordu ne’e rasik mate tiha ona Iha 24 de Febreiru 2013, tamba liu tiha ona tinan 6 nian laran.

Razaun ne’ebé mak  halo tratadu CMATS ne’e mate tanba bazeia ba artigu 12.2, a) ne’ebé hateten katak “se wainhira laiha aprovasaun kona ba planu dezenvolvementu Greater Sunrise durante tinan 6 nian laran entaun Akordu CMATS ne’e sei anula rasik nian a’an”.

Timor-Leste nian razaun seluk mak, wainhira iha tempu negosiasaun kona-ba Akordu CMATS ne’e, governu Australia halo espionazem no monta aparelhu iha palacio do governu hodi kapta stratejia no konversasaun segredu estadu Timor nian iha tempu ne’ebá iha tinan 2004 wainhira prosesu negosiasaun kona-ba delimitasaun fronteira maritima lao hela.

Argumentu seluk husi parte Timor-Leste nian mak la konkorda ho Akordu Kontinental-Self ne’ebé asina iha loron 9 de Outubro 1972, iha tempu ne’ebá Governu Australia ho Indonezia konkorda hodi defini fronteira maritima bazeia de’it ba Plataforma Kontenente ne’ebé besik no rabat mai Illa Timor, akordu ne’e la justu, tan ne’e Timor-Leste proposta liña mediana sai hanesan baliza entre Timor-Leste ho Australia.

Timor-Leste mós la konkorda ho proposta Australia nian ne’ebé hateten katak Timor-Leste bele ba kaer ikan to’o iha liña mediana ou median line, maibe Timor-Leste mós hakarak liña mediana ne’ebé mós inklui rai iha tasi okos.

Timor-Leste mós la konkorda ho fronteira lateral, tanba distancia liña perpendicular parte kosta Leste nian rabat liu mai kedas illa Jaco, no mós distancia perpendicular kosta weste nian la bazeia ba liña klaran mota-masing nian.

Depois de Timor-Leste hato’o tiha nian argumentu hirak ne’e iha Komisaun Konsiliasaun Obrigatoriu nian oin, iha loron ne’ebé mak hanesan Ministra Estranjeiru Australia nian, Julia Bishop halo deklarasaun ida iha media Australia nian hodi hateten katak;  “Komisaun laiha juridisaun hodi aplika audensia kona-ba delimitasaun Fronteira Maritima”.

Deklarasaun Julia Bishop nian iha leten, ami Movimentu Universitario Timor-Leste (MUTL) La konkorda, tamba prosesu Konsiliasaun Obrigatoriu ne’e mós hola parte iha Lei UNCLOS 1982, ne’ebé klaru hakerek iha artigu 286 to’o ba artigu 296.

Ohin loron 26 de Septembro 2016, ami rona katak Komisaun Konsiliasaun Obrigatoriu iha Olanda ne’ebá, sei hato’o sira nian pozisaun atu responde Julia Bishop nian deklarasaun.

Tamba ne’e mak ami Movimento Universitariu Timor-Leste hakarak husu ba Komisaun refere atu kontinua prosesu Konsiliasaun Obrigatoriu ne’e ba oin, hodi nune’e publiku no Komunidade internasional bele hatene  governu Australia nian maneiras ladiak hirak ne’ebé durante ne’e, han matak-matak ita nian riku soin iha Tasi Timor no lakohi deside baliza fronteira maritima bazeia ba liña mediana.

Mak ne’e de’it ami nian deklarasaun no ami Movimento Universitario Timor-Leste fiar katak, orsida lokraik oras Timor nian, hanesan mós dadersan iha Olanda ne’ebá, Komisaun Konsiliasaun Obrigatoriu sei deklara katak sira sei kontinua ho prosesu audensia ne’e.

Dili, 26 de Septembro 2016.

Porta Voz

(Horacio Da Costa Guterres Cabral)

Ami ne’ebé mak asina deklarasaun:

Faustino Soares husi UNTL, +67077322480, soaresfausth@gmail.com