Membru VIII Governu, KHUNTO 10, PLP 13 no CNRT 19

DILI: Hafoin partidu koligasaun Aliansa Mudansa ba Progresu (AMP) manan eleisaun. Partidu tolu ne’ebé hamutuk iha aliansa laran hahú define ona kuota ba membru governu tuir partidu idaidak nian.

Tuir lista ne’ebé diáriu ne’e asesu husi membru AMP partidu tolu ne’e hetan ona konkordánsia ba totál númeru membru VIII Governu Konstitusionál hamutuk 42.

Husi ne’e partidu Klibur Haburas Unidade Nasionál Timor-Oan (KHUNTO) hetan direitu ba postu 10, Partidu Libertasaun Populár (PLP) kadeira 13 no partidu Congresso Nacional Reconstrução Timor-Leste (CNRT) ho postu 19.

Maski nune’e, membru sira ne’ebé atu inkilina iha estrutura governu nia laran sei iha faze diskusaun laran entre lider másimu husi partidu koligasaun AMP.

Estrutura Boot Afeta OJE

Entretantu, Observadór Polítika, Camilo Ximenes hateten, governu partidu koligasaun AMP hakarak haboot estrutura sei afeta ba Orsamentu Jerál Estadu (OJE).

Maibé, tuir nia, difisil mós atu hakloot estrutura ne’e tanba governu ne’e forma husi partidu tolu liu husi koligasaun.

“Estrutura ezekutivu nian posibilidade sa’e ba 42, entaun ita bele halo ki'ik fali estrutura iha kraik, nune’e labele gasta osan barak ba saláriu”, dehan dosente UNTL ne’e, iha servisu fatin, Kaikoli-Dili, Sesta (1/6).

Camilo hatutan, atu hamenus estrutura iha karik governu presiza rekruta ministru, vise-ministru no sekretáriu estadu tuir ida-idak nia méritu no koñesimentu ba área ne’ebé nia lidera hodi evita asesór barabarak.

Tuir nia, estrutura governu boot iha vantajen tanba bele fasilita lalais atendimentu públiku, maibé mós depende ba kolokasaun ema ba iha nia fatin.

Tanba ne’e, primeiru ministru ne’ebé atu lidera governu ne’e tenke iha kapasidade atu bele halo kontrolu ne’ebé másimu ba ema sira, lae estrutura ne’e halo boot maibé servisu la la’o hodi afeta ba orsamentu Estadu.

Nune’e, Diretór Ezekutivu Asosiasaun HAK, Manuel Monteiro hatete, atu monta estrutura ruma ne’e ho intensaun atu halo servisu. Hakarak halo estrutura governu ki’ik, maibé labele kobre servisu hodi hatama retornu mai Estadu ne’e mós problema.

“Tenke halo fali avaliasaun ba ukun governu anteriór nian fallansu ne’e iha ne’ebé estrutura mak ki'ik ka boot liu”, dehan nia.

Manuel hatutan, VIII Governu presiza hametin motorizasaun ba servisu hotu-hotu atu nune’e labele repete filafali erru ne’ebé komete ona husi governu anteriór.

Kontratu Polítiku Ba Membru Governu

Prosesu formasaun VIII Governu oras ne’e daudaun la’o hela, tanba ne’e presiza estabelese kontratu polítika ruma ho membru ezekutivu sira ne’ebé sei sai ministru, vise-ministru no sekretáriu estadu.

Observadór Polítika, Camilo Ximenes dehan, governu anteriór sira balun ukun to’o períodu rua, maibé la hatudu prestasaun servisu tanba ne’e rezultadu servisu mós mínimu tebes.

Ida ne’e akontese tanba kolokasaun membru governu sira la tuir méritu no ladún kontrolu másimu husi orégaun independente sira ne’ebé nia servisu inter ligadu.

Iha VIII governu ne’e se hakarak atu halo mudansa ba prosesu dezenvolvimentu nasionál di'ak liu tenke estabelese kontratu polítika ruma, nune’e membru governu ida ba hala’o nia funsaun mak la hatudu prestasaun servisu iha tinan ida ka rua tenke remodela.

“Halo remodelasaun hodi substitui sira ne’ebé la hatudu nia produtividade servisu durante tinan ida ka rua nia laran”, dehan nia.

Alende ne’e nia mós sujere ba AMP atu evita ema ne’ebé uluk asume ona kargu ministru iha ministériu di'ak liu iha governu ne’e koloka ba fali ministériu seluk, nune’e ema ne’e labele halo knuuk iha ministériu ida nia laran.

Entretantu, Diretór Ezekutivu Asosiasaun HAK, Manuel Monteiro hatete, iha VII governu komesa aplika ona ba ema sira ne’ebé atu sai ministru tenke halo Curriculum Vitae (CV) hodi avalia no indika ema tuir ninia méritu servisu.

Liu husi avaliasaun ida mak bele ta'es hodi identifika ema ida ne’ebé atu ba kaer ministru ne’e nia abilidade profisionalizmu no espíritu patriotizmu no nasionalizmu iha momentu ne’ebé nia ba hala’o knaar estadu nian.

Jacinto Xavier | Independente