PN APOIA OPERASAUN F-FDTL HO PNTL

Parlamentu Nasional (PN) fo apoiu tomak ba operasaun konjunta ne’ebe forma husi Falintil-Forsa Defeza Timor-Leste (F-FDTL) no Polisia Nasional Timor-Leste (PNTL) atu kontrola grupu bandalismu sira ne’ebe maka perturba ordem publiku iha sidade Dili.

“Ami PN apoiu tomak ba desizaun komando forsa rua ne’e nian hodi nune’e asegura seguransa iha ita nia rain, li-liu kapital Dili rasik ne’ebe mak kalan-kalan jovens sira sempre kria konflitu,” hateten Xefi Bankada Partidu Demokratiku (PD), deputada Lourde Maria Bessa ba Jornalista sira iha uma fukun PN, Kuarta (16/03/2016).

Konflito mosu iha tempu kalan, tanba iha tendensia maka’as husi politik ne’ebe mak iha, deputada bankada PD ne’e dehan, la bele tau sasan ketak-ketak, tanba moris iha Estado ida ne’ebe Estado iha komponente lubuk ida, kuandu ida funsiona ladiak buat hotu iha inpaktu konsikuensia ba ida ne’e.

Iha fatin hanesan, deputado bankada CNRT, Arão Noe de Josesu realsa tan katak, ikus-ikus ne’e iha tinan 2016, komesa mosu konflitus entre grupu balun.

“Los duni tama iha tinan 2016 akontese konflitos entre grupu joventude sira, maske iha tinan kotuk hasai ona rezulusaun ida taka grupu ne’e, mais aktividade la’o subar-subar hela, tanba ne’e maka Governu tenke foti desizaun ona para fo orientasaun ba forsa rua ne’e, halo operasaun konjunta ida hodi kontrola, tanba sira komesa fali ona estraga ema nia sasan no perturba komunidade sira nia liberdade,” dehan Arão.

Membru PN ne’e konkorda tebes fo pozisaun forsa nain rua ne’e nian, ne’ebe hein katak Governu tenek foti rezulusaun ida para fo autorizasaun ba forsa sira la’o patrolha kalan no bele mos halo operasaun kalan para bele kontrola aktividades grupu sira ne’e no halo kapturasaun ba autor sira para lori ba Tribunal.

“Hare ba interese no estabilidade nasional, PN prontu atu bele hasai tan rezolusaun ida hodi fo kompetensia tomak ba F-FDTL no PNTL hodi halo operasaun ba aktividade grupus sira ne’ebe mak tenta estraga estabilidade nasaun nian iha tempu kalan,” dehan Arão Noe.

Tuir Arão la’os ho tendendensia politika ne’ebe mak agora dadauk akontese mak koko atu kria instabilidade.

“Tendensia politika hau hanoin normal, seidauk iha tendensia politika ida hodi hamosu distruibus, ita sei la’o hela koridor konstituisaun no iha lei sira nia laran, tan ne’e mak ba hau konflito politiku ne’e laiha buat ida, mais dala ruma ema iha kotuk interpretasaun buat ne’e oin seluk, uja buat ne’e hodi prejudika ba estabildade iha ita nia rain,” dehan reprezentante ne’e.

Entretantu, oras ne’e dadauk F-FDTL no PNTL forma ona ekipa konjunta ida hodi kontrola konflito ne’ebe mak akontese dadauk iha kapital Dili. mia

Jornal Nacional