Governu Apoiu Osan Rihun 800 Ba NGO 43

DILI – Sestu Governu Konstitusional neebe mak lidera husi Primeiru Ministru (PM), Rui Maria de Araujo, fo apoiu osan ho montante hamutuk rihun 800 ba Sosiadade Sivil, hamutuk 43 neebe mak priense kriteria.

Liu husi deskursu neebe mak halao iha Palacio do Governu wainhira remata asina akordu apoiu ho Sosiadade Sivil, PM Rui husu ba sosiadade sivil sira atu hatudu rejultadu servisu, liu husi apoiu neebe mak governu fo nomos kontinua kritika nafatin governu wainhira governu lao laos maske hetan apoiu husi governu.

Apoiu neebe mak governu fo uja ho responsabilidade no importante mak hatudu ninia rejultadu servisu liu husi apoiu neebe mak governu foo ona, no liu husi apoiu neebe mak governu fo nee la signifika katak atu ita boot sira tuir deit governu nia hakarak nee lae tanba nee husu ita bot sira atu kritika nafatin governu kuandu iha buat balu mak governu halo lalos importante mak kritika tuir nia dalan,” dehan PM Rui.

Nia hatutan governu sei la tau marka mean ba Sosiadade Sivil neebe mak halo kritika hasoru governu, maibe importante mak kritika malu atu hadia nasaun nomos povu nia moris tanba nee liu husi apoiu nee atu hametin koperasaun entre governu nomos sosiadade sivil.

Iha fatin hanesan Diretor Timor Aid, Florentino Sarmento, hatete apoiu neebe maka fo husi governu nee sosiadade sivil uza, atu apoiu servisu governu nian hodi hadia povu nia moris nomos dezenvolve rai ida nee. Informasaun kompletu iha STL jornal no STL Web, edisaun Sabado (19/3/2016). Thomas Sanches

Suara Timor Lorosae