KFP SEI IHA FALLANSU BARAK

Prezidenti Komisaun Funsaun Públika (KFP), Faustino Cardoso informa katak, funsaun públika moris besik tinan 14 ona iha Estadu Timor Leste (TL), maibé sei iha faillansu barak ne’ebé mak presiza atu hadia di’ak liu tan.

“Progresu ne’ebé ita harii no senti mós, sei iha frakezas, faillansu, lakunas no errus ne’ebé mak ita hetan, no balun seida’uk harii i hadia, no balun seluk tan ne’ebé iha ona, sei presiza atu hadia di’ak liu tan,” dehan Faustino Cardoso iha nia intervensaun ba semináriu KFP nian ne’ebé hala’o iha CCD Dili, Kuarta (16/03).

Konaba semináriu ne’e rasik, Faustino Cardoso dehan katak, ho semináriu ne’e atu sukat funsaun públika nia lala’ok oras ne’e to’o iha ne’ebé ona, saida de’it mak alkansa ona, saida de’it mak iha ona no tenke mantein.

Tanba ne’e, Faustino dehan, KFP ho apoiu husi Gabinete Primeiru Ministru, i apoiu téknika parseira sira seluk, hala’o semináriu ida ne’e, ho objetivu atu halo reflesaun ba funsaun públika nia lala’ok.

“Nu’udar ita hotu hatene katak, Funsaun Públika Timor Leste moris wainhira Estadu RDTL harii. Funsaun públika hala’o ona nia kna’ar, hodi servi povu no Estadu RDTL besik tinan 14 ona,” katak Faustino.

Faustino Cardoso dehan, maske funsaun públika ho otas sei nurak, maibé funsiona liu ona dekada ida, hafoin ONU halo transferensia funsaun públiku ba primeiru Governu konstitusionál.

“Ho laran luak ita tenke rekoñese katak, iha dezenvolvimentu no progresu iha funsionamentu funsaun públika hodi fó atendementu no servisu iha setór hot-hotu, no alkansa objetivu lubuk ida ona,” relata Faustino.

Tanba ne’e, Faustino dehan, tenke harii, hadia no hamosu oportunidade saida de’it mak haree, tenke hamosu dada’un.

“Tanba ne’e, ita teke aproveita ba nia funsionamentu, no ita bele identifika, saida de’it mak sei sai nu’udar ameasas ba funsionamentu funsaun públika nian prosesu ba nia objetivu agora no ba aban bainrua,” tenik nia.

Faustino esklarese, tenke hadia, hametin no harii funsaun públika iha nia fatin, atu nune’e bele iha dezempeñu ida ne’ebé di’ak, kualidade, ho profesionalismu ne’ebé aas, no bele presta bens servisu públikus, ho kualidade no responsabilidade.cos

Jornal Nacional