"Krónika instabilidade polítika" iha Giné-Bisau difikulta kresimentu - FMI

Giné-Bisau tenke sa’e kuaze 5% tinan ne’e, maibé "krónika instabilidade polítika" difikulta kresimentu ekonómiku no progresu sosiál, konsidera analista sira hosi Fundu Monetáriu Internasionál (FMI). 

Iha análize ikus ba nasaun ne’e, FMI lembra katak "série golpe Estadu horkedas independénsia hamosu krónika instabilidade polítika no kresimentu ekonómiku no progresu sosiál la’o neineik", maibé konsidera katak hetan hikas progresu horikedas Governu simu pose, iha tinan 2014".

Relatóriu ne’e hakerek molok última krize polítika ne’ebé Giné-Bisau hasoru dadaun ne’e, nota mós inflasaun mantein estável no programa ajuda ekonómika no finanseira hetan interrompe iha golpe Estadu 2012.

"Programa dezenvolvimentu autoridade sira-nian, tama iha Planu Estratéjiku 2014-2018, buka atu konsolida pozisaun orsamentál liuhosi jestaun ho kuidadu iha finansa públika no hadi’a mobilizasaun reseita, aleinde reforma institusionál", lee iha análize ikus ne’ebé FMI halo ba nasaun ne’e.

Risku hirak ne’ebé bele prejudika implementasaun programa ajuda inklui "situasaun polítika ladii’ak, difikuldade iha dezenvolvimentu komérsiu, menus konfiansa hosi doadór sira", no seluk tan.

Giné-Bisau iha dívida públika ki’ik liu 50%, halo trajetória rekuperasaun hosi valóra dívida relasiona ho PIB horikedas 2010, bainhira konta dívida relasiona ho PIB hetan 67,5%.

SAPO TL ho Lusa