MSITL Extende Atendementu PF

Organizasaun internasional Marie Stope’s Timor-Leste (MSITL), habelar servisu atendementu ba programa saude reprodutiva no Planeamentu Familiar (PF) ba iha munisipio rua inklui Regiaun Autonomia Especial Oe-Cusse.

Country Director MSITL, Kwesi Formson, hateten durante ne’e sira fo ona atendementu iha munisipio walu (Bobonaro, Ermera, Ainaro, Manufahi, Dili, Baucau, Viqueqeu no Lautem) e tinan ida ne’e (2016) sei extende tan ba munisipio Liquisa, Aileu no Oe-Cusse. 

“Tinan ne’e ami extende tan ami nia atendementu ba munisipio Aileu, Liquisa no Oe-Cusse,” Formson koalia ida ne’e iha aniversariu MSITL ba dala 10 nian, iha Lecidere, Dili.

Kona ba munisipio rua seluk (Covalima no Manatuto), nia dehan, MSITL hakarak atu halo atendementu iha teritorio tomak maibe depende ba fundus inklui mos autorizasaun husi Ministerio Saude liu husi akordu. 

Nia hateten, atendementu ne’ebe MSITL fo ba komunidades durante ne’e, mak hanesan halo advokasia, edukasaun promosaun saude ba komunidade kona ba saude reprodutivu no atendementu planeamentu familiar, liu –liu esplika opsaun ba familia sira atu hili. 

Nia informa, komunidade barak mak iha ona konesementu kona ba planeamentu familiar kompara ho tinan 2009 ba kotuk. 

“Maibe ita tenke servisu maka’as liu tan no iha buat balun presiza hadia hanesan komunikasaun hodi hasa’e konesementu komunidades nian kona ba saude repodutivu no seksual,” nia hateten. 

Tuir dadus Demographic And Health Survey 2010, hatudu feto kaben nain 7% mak asesu ona ba PF, e tinan ida ne’e (2016) governu iha estimasaun sa’e ba 32% tanba komunidade barak mak iha ona konesementu ba programa ne’e. 

Iha parte seluk, Diretor Jeral (DJ) Prestasaun Servisu Saude Ministerio Saude (MS), dotora Odete Viegas, hateten hahu tinan 2006 ministerio halo akordu ida ho MSITL  hodi ajuda governu iha atendementu programa PF nian. 

Nia rekonese, katak akordu ida ne’e remata ona no agora dadaun ekipa ministerio nian halo hela avaliasaun no konsultasaun hodi dezenvolve fali akordu foun ho MSITL. 

“Agora iha ona faze konsultasaun no tempu badak diresaun nasional politika koperasaun ministerio sei koordena ho MSITL hodi asina, nune’e fo dalan ba MSITL extende sira nia servisu,” nia hateten. 

Nia hateten, MSITL iha papel importante tebes hodi informa no hasa’e konesementu komunidades nian liu –liu oinsa mak hili dalan ne’ebe diak ba sira nia moris. 

Entretantu Vise Embaixador Australia, Angela Robinso, hateten hanesan doador principal governu Australia iha komitmentu atu supporta nafatin MSITL hodi habelar sira nia servisu iha munisipio seluk hodi lori moris diak no saudavel ba komunidades. 

“Ami kontente atu supporta habelar tan servisu MSITL iha munisipio balun hanesan iha Liquisa, Aileu no regiaun Oe-Cusse,” nia kontente. 

Nia dehan, feto ida bainhira iha planu ba nia familia liu –liu oan, nia iha abilidade atu remata nia edukasaun, buka servisu no partisipa maximu iha sosiedade.

The Dili Weekly