ME PLANU 2016, RE-ATIVA BOLSEIRU BA ESTUDANTE

DILI - Ministériu Edukasaun (ME) iha ona planu ba tinan 2016  hodi haruka bolseiru atus rua  ba kontinua estudu iha rai liur.

Ministru  Estadu   Kordenador  Asuntu  Sosiais no Ministru Edukasaun António da Conceição hatete,  hafoin  halo servisu  semana 2 iha ME  ba loron dahuluk, Ministru ho Vice nain 2 inklui ho Diretores Jerais iha Ministériu Edukasaun  halo enkontru hodi diskute kona  ba orsamentu tinan 2016.

“Ami ohin halo ona diskusaun  ida, hodi tenta haree to’ok  orsamentu  ne’ebé  maka ba tinan  2016 mai ne’e  hodi tau ba iha Ministériu Edukasaun liu-liu atu haree liu konaba programa bolsu  estudu  ba estudante sira,” Ministru Estadu Koordenador Asuntu Sosiais no Ministru Edukasaun António da Conceição ba jornalista sira iha ME Vila–Verde Díli, Segunda (24/8).

Tanba iha tinan ne’e governu la preve orsamentu ba bolsu estudu nian, maibé ba tinan oin tenke iha bolsu estudu, hodi haruka estudante sira ba rai liur aumenta sira matenek no kapasidade ne’ebé diak hodi serve nasaun Timor Leste.

Hosi programa bolsu estudu, atu ba rai liur CPLP mak hanesan Portugal, Brazil ho Mozambique, enkuantu iha Azian nian maka hanesan Filipina, Tailandia  no nasaun seluk tan.

“Ha’u atu klarifika  los deit katak, orsamentu  ba tinan 2015  envelope fiskal ne’ebé maka  fó ba Ministériu ki’ik tanba ne’e maka  Ministériu rasik  la preve iha  bolsu estudu nian, maski orsamentu ba tinan ida ne’e laiha maibé ME  tau hanesan proposta  hodi bele prepara to’ok iha posibilidade  atu bele preve bolsu estudu  atus 2  ba estudante sira hodi ba eskola iha rai liur,”Antonio  koalia.

Iha diskusaun ne’e, ulun bo’ot edukasaun Timor Leste nian ho nia aliadu sira ko’alia mós konaba problema ne’ebé mak bolseiru sira infrenta iha rai liur hanesan Portugal, Indonésia, Filipina, oinsa maka  atu buka rezolve.

“estudante hirak ne’e agora hasoru hela moris ne’e oinsa, no oinsa maka atu haree konaba mekanismu  ba oin konaba transferensia bolsa estudu  ida ne’ebé maka efektivu  liu, oinsa maka  tenki reforsa nafatin  sira tanba estudante barak  ba eskola iha rai liur  maibé ho sira nia osan rasik” Ministru edukasaun dehan.

Tuir  Antonio katak, sa dadauk ne’e  buat ne’ebé maka  tenta atu kordena hela  maka  hanesan ,Vice  Ministra  Dulce Soares maka sei responsabiliza ba asunto edukasaun  ensino baziku  pre-eskolar no Vice Ministro Abele Ximenes  nia maka sei responsabiliza ba asuntu  ensinu sekundariu Jeral  ho ensinu sekundario Vokasional  aumezmu tempu  Univesidade.

“Hau hanesan Ministru  maka responsabiliza  politika jeral tomak iha ME, ne’ebé inklui ho responsabilidade  politika ba iha  area edukasaun ninian tomak ba iha  Ensino Baziku, ensino sekundariu jeral  ba mós ensinu suprior ninian  ne’e responsabilidade tomak ne’ebé  mak hau sei  hola,” Antonio, afirma.

Aliende ne’e kna’ar seluk mak, ministru sei nafatin kontinua servisu ne’ebé mak planeia tiha ona hosi V governu konstitusional.(fer)

Timor Post