Membru PN Komisaun E Osorio Florindo Sujere Governu Hadia Irigasaun A’at

Reportajen: Augosto da Costa

Díli - Parlamentu Nasional (PN) sujere ba governu oinsa atu hadia irigasaun Maliana-II ne’ebé a’at, tanba hetan estragus husi mota iha tinan 2014 liubá to’o agora seidauk hadia. Irigasaun Maliana-I no Maliana-II importante fornese bee ba povu agrikultura sira hodi halo natar, maibé se irigasaun Maliana-II ne’e a’at ida ne’e governu tenki tau orsamentu. Tanba ema barak mak prezisa bee hodi halo sira nia natar. Hateten Membru Parlamentu Nasional Komisaun E ne’ebé trata asuntu Infra-trutura, Transporte no Komunikasaun Osorio Florindo ba STL iha Parlamentu Nasional, Tersa (25/8/2015), tuir Osorio katak tinan kotuk governu la tau orsamentu hodi hadia irigasaun Maliana-II.

Osorio, informa liutan katak nia sujere ba governu liu-liu Ministériu Agrikultura se iha orsamentu ona tenki hadia irigasaun ne’e, maibé karik orsamentu seidauk Ministériu Agrikultura tenke tau interese bo’ot prepara orsamentu no halo levantamentus dadus oinsa atu hadia irigasaun Maliana-II ne’ebé mak mota sobu a’at nia intek. Membru Parlamentu Nasional Komisaun E ne’e, esplika liutan katak se ita hakarak garantia siguransa alimentar prezisa garantia infra-trutura irigasaun ne’ebé iha.

La’os irigasaun Maliana deit, maibé iha Timor laran tomak governu tenki hadia hanesan irigasaun iha Laivai-Lospalos, tinan lima ona avandona Parlamentu ho Governu la konsege tau osan nune’e to’o agora natar sira ne’e avandona. Nia sublina tan katak governu liu husi Ministériu Agrikultura prezisa hadia irigasaun sira ne’ebé a’at iha Timor laran tomak, nune’e labele dependente deit ba importasaun husi rai liur. Maibé pelominus bele garantia siguransa alimentar husi rai laran, hanesan irigasaun Maliana-II ne’e importante teb-tebes povu agrikultura sira bele hodi halo natar kuda batar modo no aihan sira seluk.

Informasaun hirak ne’e hodi hatan preokupasaun Administrador Munisípiu Bobonaro Domingos Martins, no Vice Prezidente Sentru Komunitariu Aprendizajen (SKA) Maliana Antonio Santa Cruz, ne’ebé sira hateten irigasaun Maliana-II mota sobu tiha nia intek irigasaun iha tinan 2014 to’o agora seidauk hadia. Nune’e susar povu agrikultura sira atu halo natar iha irigasaun Maliana-II.           

Suara Timor Lorosae, loron Kuarta, 26 Agostu 2015 – Foto: Deputadu Osorio Florindo