AMAN, FILA MAI BÁ!

Hei Ramelau husu took ba Kablaki

Hei Ramelau husu took ba Matebian

Tansa timoroan halerik ba nafatin

Tansa timoroan terus ba beibeik

Hei Ramelau hanorin ami hadomi malu

Hei foho Kablaki hanorin ami servi malu

Keta husik ami buka hanoin án de’it

Foho Matebian haraik unidade (3X)

Hei Ramelau hanorin ami ho lia loos

Hei foho Kablaki hanorin ami ho justisa

Husik moris ne’e suli ho hakmatek

Nu’udar we matan moris rohan laek (3X)

Forma (barisan) liafuan kmanek hosi múzika “Ramelau” ne’ebé múziku Timor-Leste, Mário Miguel, ne’e reprezenta halerik wa’in hosi timoroan ne’ebé laran-susar (prihatin) ba situasun real iha Timor-Leste, liu-liu ba Eis Komandante Brigada Vermella, Paulino Mauk Moruk Gama nia mate iha Venilale/Baucau, Sábadu (08 Agostu 2015). Liafuan kmook ne’e lori ita hanoin ba espresaun laran susar hosi Mauk Moruk nia oan feto, Betty Gama, ba nia aman Mauk Moruk be mate husik hela sira ho kruelidade.

Hanesan oan, halerik ne’e mai hosi fuan domin be kle’an tebes. Halerik no espresaun laran susar nian ne’e só oan de’it maka bele senti oinsá lakon aman ida iha sira nia moris. Aman, iha ema nia matan sai traidór, maibé iha nia matan aman ida ne’ebé sai modelu atu moris banati no sai eroi boot ba nia oan sira. Loloos, Betty Gama tatoli laran susar ne’e ba nia aman Mauk Moruk hosi matan ba matan maibé mate hadau lais ona nia aman hosi nia sorin. Dalan di’ak ba nia maka hato’o espresaun laran susar ne’e liu-hosi ninia rede sosiais facebook ho dalen Olanda no tradus ba dalen Tetun;

“Ida ne’e halo laran moras. Loron ba loron ha’u hanoin beibeik ha’u aman. Ha’u hanoin sei hasoru malu ho ha’u aman hafoin tinan rua fila hikas mai uma. Ida ne’e maka nia promete hela ba ami. Ohin, ha’u lakon ha’u aman nia oin, ninia hamnasa-midar, ninia lian no ninia responsabilidade ne’ebé nia hatudu ba ami nu’udar aman. Buat hotu ne’ebé ó halo ona ba ami, ami hato’o obrigadu no agradese wa’in. Laran-susar tebes. Halo ha’u labele toba.

Tanba saida maka ó mate ho meius nune’e (tiru-mate). Mate ho meius ida ne’e, la serve ba ita boot. Ema hirak ne’ebé halo nune’e ba ita boot la serve atu moris. Sira haree ó hanesan ema seluk, maibé ha’u hare ó hanesan ha’u nia aman. Ha’u hakarak haree tan ha’u aman. Ha’u haree ha’u aman nu’udar ha’u nia modelu. Ó ha’u aman ne’ebé di’ak, no aman ne’ebé di’ak liu buat hotu-hotu. Ó hadomi ami hotu no ami mós hadomi ó. Dalaruma ó husu beibeik saida maka ó atinji la-ho ó nia apoiu. Ohin, ha’u foin senti Bethunte, Paulito, Mama no ha’u tenki moris la-ho aman iha ami leet iha minutu balun de’it, atu nune’e bele haree no bele hakuak ha’u meti-metin. Ha’u lakon ha’u aman. Ha’u hadomi ó ho ha’u fuan no laran tomak. Aman, fila mai bá..!”

Karik, Betty Gama senti katak nia aman Mauk Moruk labele rona no labale lee ninia espresaun laran susar nian iha minutu ida ne’e. Maibé, nia iha esperansa katak iha fatin rohan laek nian ne’ebá, nia aman Mauk Moruk sei bele lee ho hamnasa-midar no orgullu ba nia nu’udar oan (Betty Gama). Adeus aman doben Mauk Moruk. (*/Cassimata)

Matadalan