Eis-konselleiru nebe lohi Timor-Leste hetan kondenasaun prizaun tinan neen

Eis-konselleiru ida hosi setór petrolíferu nebe lohi Governu timoroan, Bobby Boye, hetan kondenasaun ba prizaun tinan neen hosi tribunál federál ida norte-amerikanu nian no tenki fó fali dolár millaun 3,51 ba Timor-Leste.

Boye, ho tinan 52, moris iha Mahwah, New Jersey, hetan kondenasaun tanba "uza empreza ida ho kontabilidade fraudulenta hodi lohi nasaun estranjeiru ida ho dolár millaun 3,5 resin", esplika hosi prokuradór Paul J. Fishman, iha komunikadu.

Iha fulan-Abril, Boye asumi ona responsabilidade ba krimi sira nebe akuza nia.

Prezu iha New Jersey iha fulan-Juñu 2014, Boye hela iha prizaun domisiliáriu bainhira hahú negosiasaun sira entre defeza ho akuzasaun.

Iha fulan-Novembru tinan liubá, nia hasai tiha nia advogadu privadu, hodi husu, tanba falta osan, defensór públiku ida, nebe halo ona negósiu ba admisaun kulpa hosi Boye no promete ona hodi selu osan subtraídu ba Timor-Leste.

Ikusmai, iha fulan-Abril Boye aprezenta ona deklarasaun ida kulpa nian hosi krimi fraude nian.

Ho osan nebe naok hosi Timor-Leste, Boye sosa ona uma oioin, karreta ho sasán luxu sira seluk hanesan parte hosi akordu ho akuzasaun nebe nia hatán hodi entrega sasán sira ne'e no selu mós "dolár millaun 4,23, reprezenta folin nebe nia hetan hosi krimi ne'e".

Iha akuzasaun ho pájina 10, eis-konselleiru hatete kona-bá nia serbisu iha Timor-Leste no oinsá halo naok ne'e liuhosi kriasaun empreza multinasionál ida ba direitu no kontabildiade, Opus & Best, nebe nia hanesan sósiu úniku.

Refere katak Boye "konsiente no iha intensaun hodi halo konspira no akordu ho ema seluk, koñesidu no deskoñesidu, hodi elabora eskema ida hodi lohi (Timor-Leste) liuhosi razaun falsu sira".

Nia objetivu maka "hodi sai riku tanba fraude hosi lukru nebe hetan iha kontratu sira konsultoria nian" hosi Timor-Leste, no laiha kúmplise ida iha Timor-Leste nebe maka tama iha akuzasaun.

Nune'e, Boye lori nia feen (agora daudaun sira haketak malu no nia feen la hetan akuzasaun) hodi loke konta email hosi "Opus & Best", inklui alegadu ida sósiu Dominic Lucas - nebe seidauk hatene katak ema ne'e ezisti ka hanesan naran seluk Boye nian.

Kandidatura sira ba kontratu iha Timor-Leste hala'o hosi O&B iha "deklarasaun falsu oioin no reprezentasaun materiál sira nebe hakarak hatudu katak hanesan empreza lejítimu ida" nebe halo operasaun iha nasaun oioin iha tinan barak nia laran ho "advogadu sira, konsultór sira no ekonomista sira nebe importante".

"Iha realidade, Boye harii Opus & Best hodi aprezenta dokumentu sira nebe hodi lohi. Aleinde, Opus & Best la fó serbisu ba ema ida aleinde Boye rasik", dokumentu ne'e hatete.

Hafoin ne'e Boye uza ona nia partisipasaun iha komité revizaun rasik hosi proposta sira iha Timor-Leste hodi hetan konkursu no kontratu sira ba Opus & Best, halo Timor-Leste hatama ba Boye nia konta osan dolár millaun 3,51 entre fulan-Juñu no fulan-Dezembru 2012.

Iha fulan-Abrik 2013, Boye tenta atu Timor-Leste selu tan dolár rihun 250 ba Opus & Best Hong Kong, maibé Díli la hatán proposta no hafoin ne'e Boye sai hosi Timor-Leste.

Iha fulan-Maiu nia rohan, Dominic Lucas haruka ba Timor-Leste fatura ikus ho folin dolár rihun 630.

SAPO TL ho Lusa