Ministru luzófonu sira repeta fali empeñu iha ajenda ida koperasaun sientífiku ida

Ministru sira Siénsia, Teknolojia no Ensinu Superior repete fali empeñu hodi avansa iha ajenda koperasaun multilateral matéria ne'e, hodi hametin kapasidade sira no apoia dezenvolvimentu iha CPLP nia laran.

Iha deklarasaun ikus hosi Reuniaun ba dala VII hosi Ministériu Siénsia, Teknolojia no Ensinu Superior CPLP nian, iha Díli, reprezentante sira hosi nasaun "sia" "insentiva promosaun hosi mobilidade akadémiku no sientífiku" iha CPLP, rekomenda tan medida sira hodi implementa ba Planu Estratéjiku hosi Koperasaun Multilateral iha Domíniu Siénsia, Teknolojia no Ensinu Superior nian.

Ministru sira felisita lansamentu ba Portal hosi Ensinu Superior, Siénsia ho Teknolojia CPLP nian ne'ebé maka aprezenta tiha ona iha loron-kuarta ne'e iha Díli.

Sira analiza mós progresu sira iha kriasaun ba Repozitóriu Sientífiku no Portal ba Asesu Abertu CPLP nian, "ne'ebé sei fasilita asesu livre ba repozitóriu sientífiku sira, software livre sira no konjuntu bibliográfiku sira asesu ba produsaun sientífiku hosi Estadu Membru sira", projetu ne'ebé hetan ona apoiu finanseiru hosi Brazil, Mosambike, Portugal ho Timor-Leste.

Sekretariadu Ezekutivu hetan mandatu hodi hatene informasaun kona-bá "kriasaun hosi fundu komun ida hosi selu atividade sientífiku sira CPLP nian", no konkorda ona hodi apoia inisiativu hosi São Tomé & Prínsipe kona-bá "asaun sira hosi reforsu ba kapasidade institusional no tékniku sira hosi instituisaun ensinu superior sira".

Ministru sira konkorda mós hodi apoia proposta hosi Portugal ba diálogu maka'as entre ajénsia sira finansiamentu no avaliasaun ba atividade siénsia no teknolojia nian, nune'e mós ba enkontru foun ida hosi ajénsia sira hotu ne'ebé sei hala'o iha Lisboa iha inísiu tinan 2017.

Portugal hakarak mós atu aprova "programa finansiamentu kompetitivu foun ida ba rede sira investigasaun ne'ebé orientadu hodi estimula kapasidade sientífiku iha nasaun sira lian portugés nian", hamutuk ho investigadór sira Rede Aga Khan ba Dezenvolvimentu.

Investigasaun sira ne'e tenki orientadu ba kestaun sira relasionadu ho kualidade moris nian, inklui seguransa hahán nian, biodiversidade, dezenvolvimentu labarik nian, sistema sustentável sira enerjia nian no dezenvolvimentu urbanu no hamenus kiak", hatutan hosi deklarasaun ikus.

Iha enkontru ne'e Angola reprezenta hosi ministru angolanu Edukasaun nian, Pinda Simão, Mosambike hosi ministru Siénsia no Teknolojia, Ensinu Superior no Tékniku-Profisional, Jorge Olívia Penicela Nhambiu no hosi São Tomé & Prínsipe reprezenta hosi ministru Edukasaun, Kultura no Siénsia, Olinto da Silva e Sousa Daio.

Portugal, Brazil ho Guiné Ekuatorial reprezenta hosi sira nia embaixadór sira, Cabo Verde reprezenta hosi delegasaun tékniku ida no Guiné-Bissau la marka prezensa iha enkontru.

SAPO TL ho Lusa – Foto: CPLP Multimedia