Dosente UNTL 98% Maestradu

Reitor Universidade Nasional Timor Lorosa’e (UNTL), Francisco Martins, hateten 98% dosente ne’ebe hanorin iha UNTL ho nivel edukasaun maestradu.

Nia dehan, UNTL sei esforsu hadia sistema kualidade edukativu liu husi investe ba profesores, tanba kualidade ensino iha profesores sira.

“UNTL hahu iha tinan 2000, dosente maestradu iha ema nian rua deit, agora kuaze 98% dosente ho nivel edukasaun maestradu,” Reitor UNTL Martins hateten, iha salaun Auditorial UNTL, Dili. 

Nia hatutan, dosente sira ne’e hasai maestradu iha nasaun Australia, Brazil, Indonezia, Nova Zelandia, Portugal, Japaun, Malaysia, Filipina, Estadus Unidus Amerika no seluk tan.

Alende ne’e, nia dehan, UNTL mos fo bolsu estudu ba dosentes balun hodi hasai dotouramentu iha universidade sira iha mundu, tanba UNTL iha kooperasaun ho sira. 

“Tinan akademika ne’e ita haruka profesores nain 20 ba hasai dotoramentu iha Portugal ba area engeenaria mekanika, sivil, elektro, biologia, relasaun internasional, matematika no seluk tan,” nia hateten. 

Nia hatutan, universidade elabora ona esbosu ida kona ba politika nasional elevasaun formasaun ba profesores, hanesan matadalan ida hodi eleva kualidade profesores iha Timor –Leste. 

Iha parte seluk, Embaixador Japaun iha Timor –Leste, Eiji Yamamoto, hateten governu Japaun kontente supporta governu Timor –Leste hodi dezenvolve rekursus humanus iha nasaun foun ida ne’e. 

“Governu Japaun kontinua supporta governu Timor –Leste liu husi JICA nia programa no bolstu estudu governu Japaun nian atu dezenvolve rekursu humanu no edukasaun iha Timor –Leste,” nia hateten.

The Dili Weekly