Governu Mak Administra Propriedades Estadu

DILI, (ANTIL) – Governu liu-hosi Sekretaria Estadu Terras no Propriedades (SETP) sei utiliza dekretu lei númeru 1/2003 hodi administra provizória propriedades estadu ne’ebé governu Portugués no Indonézia husik hela, hodi hein lei ba rai diskute no aprova.

”Ko’alia kona-ba ukun rasik-án, baze ida ne’ebé forte mak lei hodi ukun no sai mata-dalan atu hala’o kna’ar”, Sekretariu Estadu Terras no Propriedades, Jaime Xavier Lopes ba ANTIL, Kinta, (17/8) iha ninia serbisu fatin.

Kuandu lei ba rai mak aprova, bele hetan definisaun ruma ba estatutu rai hodi garante ema nian direitu ba rai nomos garante investór sira atu investe. ”Rai nu’udar baze ba buat hotu”, hatutan.

Kestaun notifikasaun, nia esplika, ema ne’ebé halo kontratu ho governu mak la-selu arendamentu, sei hetan notifikasaun.

Maibé tuir regras, governu fó tempu durante loron 10 para halo rekursu ba ministru justisa. Bainhira laiha resposta hosi ministru mak ekipa SETP bolu hodi halo reuniaun, prosesu bolu malu ne’e mak laiha solusaun, governu liu-hosi SETP halo despezu administrativu.

Kompeténsia asina proposta despezu administrativu mak ministru, molok ezekuta sei fó tan notifikasaun durante loron 10 atu oinsá ho vontade hamamuk fatin molok ezekuta despezu administrativu.

Eviksaun ne’e desizaun tribunál. Membru governu ne’e realsa, ko’alia kona-ba lei, ema hotu iha lei nia okos.

Despezu administrativu sira ne’ebé implementa bazeia ba konstituisaun RDTL artigu 54 (direitu ba propriedade privadu) alinea 1) ema hotu-hotu iha direitu ba propriedade privada, no bele fó ba ema seluk bainhira sei moris no mós bainhira mate, tuir lei nia lalao’k.

Alinea 2) labele uza propriedade privada hodi estraga fali nia funsaun sosiál. Alinea 3) atu hetan eh hasai ema ida nia propriedade privada hodi halo ba uzu públiku, tenke selu indeminizasaun loloos ba sidadaun, tuir lei haruka. Alinea 4) ema sidadaun nasionál de’it maka bele iha direitu ba propriedade privada sidadaun nian.

Artigu 141 kona-ba rai esplika, lei mak regula propriedade, nia uzu no utilidade rai nian, hanesan fatór produsaun ekonómiku ida. (jornalista: Rita Almeida)

Foto: Sekretariu Estadu Terras no Propriedades, Jaime Xavier Lopes. Foto ANTIL/Rita Almeida