JOSÉ RAMOS HORTA: PRIMEIRU FUNDADOR FALINTIL, NICOLAU LOBATO

Eis Prezidente Republika, nu’udar mos diplomata senior Timor-Leste, José Ramos Horta, informa katak, primeiru fundador FALINTIL mak saudozu Nicolau Lobato.

“Fundador númeru 1 FALINTIL mak saodozu Nicolau Lobato, ne’e la iha dúvidas.  Nia momentu  ne’e nu’udar  Vise Prezidente FRETILIN hamutuk ho Mari Alkatiri, maibe  iha fulan Agostu 1975,  funda FALINTIL, ha’u hakfodak fali oituan debate fali  ida ne’e, ne’e Nicolau Lobato mak ulun bo’ot  FRETILIN momentu ne’e,”esplika José Ramos Horta, ba jornalista iha Kuartel Jeral F-FDTL Fatuhada, Dili, Kinta (18/08).

Nune’e mos José Ramos Horta husu ba F-FDTL  ho  PNTL tenki servisu hamutuk, lideransa PNTL no F-FDTL Ministerio  Defesa  no Ministerio Interior tenki halo esforsu para hametin instituisaun rua ne’e.   Nia mos sujere, atu F-FDTL no PNTL ida-idak iha sira nia laran iha sira nia kna’ar   ne’ebé maka mai husi Konstituisaun mai husi lei,   no regulamentu sira.

“F-FDTL no PNTL tenki buka servisu diak liu tan disiplina. labele indisiplina halo naran foer ba forsa, naran foer ba Polisia, labele  kaer violensia trata  ema.  ita haree Polisia ema respeita tebes  iha mundu  ne’e,  Polisia Inglatera nian, Polisia Suisa, Norwegia ema povu respeita tebes, tanba sira nia komportamentu 100% diak tebes. Ita nian Polisia no forsa armadas tenki sukat  didiak  ida-idak nia hahalok ne’e para  ita hotu haree sira hadomi malu, ne’e ema krimi tauk sira,”dehan José Ramos Horta.

Iha oportunidade  ne’e,  José Ramos Horta hateten,  sukat buat hotu hahú  iha momentu  Falintil transforma ba F-FDTL iha Aileu, depois liu husi krizi 2016 liu tiha haree F-FDTL profisionalizasaun modernizasaun diak. Parabens ba Komando, parabens ba Governu,  ne’ebé maka tinan  hirak  nia laran tau matan ba reorganizasaun   F-FDTL.

“Pelomenus ita haree kondisaun humanu, kondisaun material   iha future diak  liu,  haree mos  formasaun kuadru superior   iha forsa armadas  nian  que urjenti para tinan 5- 10 tan masimu  ita iha ona ofisial jeneral foun   ne’ebé jerasaun foun   ne’ebé sai husi Akademia  bo-bot, Portugal, ou sai husi  ita nia akademia rasik,  tanba Institutu Defesa Nasional mos atu hahú halo ona formasaun ho ema kompetensia oi-oin mai husi liur  iha laran rasik,”dehan José Ramos Horta.avi

Jornal Nacional