UE apela ba Indonézia hodi halakon kastigu mate nian no la avansa ba ezekusaun hamutuk 14

Iha loron-kuarta ne'e, Uniaun Europeia apela ona ba Indonézia hodi halakon kastigu mate nian no la aplika ezekusaun ba ema na'in 14 ne'ebé hetan kondenasaun ba kastigu ne'ebé nia asaun previstu ba loron hirak tuirmai ne'e.

"Uniaun Europeia husu ba nasaun hodi hapara ezekusaun sira no hodi hamutuk ho komunidade boot hosi estadu hamutuk 140 resin ne'ebé halakon tiha ona kastigu mate ne'e ka ne'ebé adopta moratóriu ida", hatete hosi porta-vós hosi reprezentante aas UE nian ba polítika esterior, Frederica Mogherini, iha komunikadu ida.

Porta-vós hosi xefe diplomasia europeiu nian fó hanoin katak "UE la konkorda ba kastigu mate lahó esepsaun no husu beibeik ona hodi halakon".

Komunikadu destaka katak "kastigu mate hanesan kastigu aat ida no dezumanu, la serve hodi muda opiniaun no reprezenta negasaun ida ne'ebé la aseitavel hosi dignidade no hosi integridade ema nian".

Iha loron-tersa ne'e ema oioin halo ona protestu iha kapital nasaun nian, Jakarta, hodi husu atu Governu halakon aplikasaun ba kastigu mate iha Indonézia.

Iha tinan 2015, ezekusaun sira ho kastigu mate hetan ona kuantidade aas liu iha tinan 25 nia laran, haktuir hosi Amnistia Internasional (AI) iha nia relatóriu anual iha fulan-Abril.

Durante tinan ikus, ema na'in 1.634 resin maka ezekutadu ona, ne'ebé reprezenta aumentu ida hosi ema mate na'in 573 kompara ho tinan 2014.

Tuir relatóriu hosi organizasaun internasional ne'e, iha mós aumentu ida iha númeru hosi nasaun sira ne'ebé pratika kastigu mate nian ne'ebé aumenta hosi Estadu hamutuk 22 iha tinan 2014 ba estadu hamutuk 25 iha tinan 2015.

SAPO TL ho Lusa