TL SELEBRA LORON MATEBIAN, IGREJA PROIBI AIFUNAN MASA

Tinan-tinan, ita sarani tomak selebra loron bo’ot iha igreja universal, hahú ho loron bo’ot, loron santo nian, loron ba dauluk iha fulan Novembru nian, (dia dos santos). Hafoin tuir kedas mai, loron ne’ebé ita hanaran, loron finadu, loron daruak iha fulan Novembru, loron ida kmanek tebes atu ita hotu hanoin ita nia maluk matebian sira nia loron.

Wainhira ema hirak ne’e sei moris, ita hotu koko moris ksolok no terus hamutuk ho sira, no wainhira sira mate ona, sira husik hela mai ita lembransa furak atu ita hanoin nafatin sira nia mensajen, hahalok moris nian ne’ebé halo ita banati tuir sira nia ain-fatin.

Nune’e Igreja dedika loron espesial ida ne’e, nu’udar loron finadu, loron feriadu, loron matebian nian. Iha rai ida-idak, iha ninia kultura hodi selebra loron boot matebian sira nian ne’e.

Iha Timor Leste (TL) ita selebra loron boot ida ho hanaran han hasoru malu ho ita nia matebian sira, han hamutuk ho ita nia matebian sira. Tuir ita ida-idak nia fiar katak, iha loron Maromak loke odamatan matebian sira nian para bele vizita ka hasoru malu ho nia familia sira ne’ebé mak hela iha mundu ne’e.

Nune’e Igreja hotu-hotu iha Timor laran tomak, selebra misa hahú loron santo santa sira nian, kontinua ho loron finadu iha 2 Novembru para sarani sira halo devosaun, husu misa ba matebian sira.

Iha igreja nakonu ho familia sira ne’ebé husu misa, kanta solene, hafoin kontinua ba vizita rate, sunu lilin, tau aifunan ne’ebé ema kuu husi sira nia uma oin ka iha sira nian tos laran.

No iha loron finadu ne’e mak sarani sira hatama lista naruk familia ida-idak nian, para padre ne’ebé prezide misa lee sai matebian sira nia naran iha misa ne’ebé selebra iha semiteriu laran ga iha kapela iha Igreja laran.

Sarani sira prepara aifunan, hafutar rate no balun lori bukae hodi komparte ba malu iha rate, no hanesan iha parte rai klaran no parte Oeste ninia ne’e, sira hader aifunan desde dia 1 kalan to’o dia 2 dader ka meiudia ne’e sira kontinua ba misa no vizita rate. Maibé iha parte Leste ninia, iha loron 2 Novembru ne’e sarani prepara aifunan, tein katupa ka hahan ruma, depois tunu animal sira hodi oferese ba matebian sira, sinal han hamutuk ho matebian sira.

Iha parte loron meiudia ka loraik tuir horariu igreja nian, sarani sira lori aifunan no lilin ba misa, depois de misa kontinua ba vizita rate tau no sunu lilin no halo devosaun no orasaun ba matebian sira. Fila husi rate kontinua fali ho han hemu hamutuk ho matebian sira, tuir fiar ida-idak nian. Ne’e atu hatudu katak, ida ne’e sinal domin ba matebian boot tebes.

Nune’e sarani sira balun kuandu lahetan ona aifunan natural, obrigadu sira tenki ba sosa aifunan feitu ka plastiku ne’ebé mak fa’an iha loja sira hodi ba rate. No balun mós hakarak duni uza aifunan plástiku ne’e, tanba haree katak, aifunan plastiku ne’e iha koris oi-oin no furak ema atu haree.

Maibé relasiona ho instrumentu sira ne’e, Padre Pároco Balide Adriano Ximenes, bandu sarani sira lori aifunan feitu ka aifunan plástiku ba rate.

“Ha’u nia paroquia ha’u bandu ha’u nia komunidade lori aifunan masa mai misa. Sé mak tau aifunan masa iha altar leten ha’u foti tuda tan nia, no sunu iha nia oin kedas. Ida ne’e Igreja hanorin ema atu hadomi Maromak no matebian sira. No haree ninia finalidade los mak ida ne’ebé”, dehan Padre Adriano Ximenes ba Jornal Nacional Diário iha nia rezidénsia balide Díli, Kinta feira (27/10).

Tuir Padre Adriano Ximenes katak, sarani sira tenki sakrifika sira nia-an buka aifunan freska hodi ba tau iha rate, basa aifunan freska ne’e símbolu fiar no domin sarani sira nian ba matebian sira.

Padre Adriano Ximenes mós husu ba sarani Katólika Timor Leste (TL)  atu selebra loron matebian ho fiar no reza ba matebian sira, la’os atu buka rame-rame deit.

 “Ha’u nia apelu ba sarani hotu iha Timor laran tomak, dia 2 de Novembru labele halo hanesan buat ida ne’ebé ema dehan rekreasaun, maibé dia 2 de Novembru ne’e ita buak atu selebra ho fiar, reza ba maluk hotu ne’ebé la’o uluk ona, sira mate no la’o uluk ona ba hein iha fatin ne’ebé Maromak hakarak”, hateten Padre Adriano Ximenes.

Husi sorin seluk, Padre Paróco da Paróquia Santo António de Motael, Amo David Alves da Conceição hatete, la’os ai-funan plástiku ne’ebé fa’an iha loja mak ema bele sosa no lori ba tau iha matebian sira nia semitériu. Maibé ai-funan natural ne’ebé ema kuda iha uma oin, tamba ho ida ne’e bele fó sentidu domin no honra ba ema sira ne’ebé mate ona.

“Ai-funan be plástiku ne’e atu infeita de’it, maibé ida ne’ebé mak fó morin, honra no hatudu ita nia domin ba matebian sira mak ai-funan natural ne’ebé ita kuda iha uma oin, ai-funan ne’ebé mak ai ne’ebé fó funan no la’os ida ne’ebé plástiku nian sira fa’an iha loja. Ne’ebé dala ida tan, la’os ai-funan plástiku mak ita lori ba matebian maibé ai-funan natural,” esplika Pe. David Alves ba JN-Diário, Kinta (27/10), iha nia eskritóriu Igreja Motael.

Amu David hatutan, ohin loron ne’e buat hotu artifisial no feitu tiha ona, maibé keta haluha katak, ema ne’e natural, tamba bainhira moris mai laiha ema ida mak halo ho masa, pika no reboka tun sae ho buat ne’ebé artifisial katak, ema ne’e natural duni, tamba ne’e tenki uza buat ne’ebé natural hodi fó honra ba sira ne’ebé laiha ona.

Amu Paróco Motael ne’e fundamenta katak, ai-funan nu’udar manifestasaun domin ne’ebé lori ba tau iha rate atu matebian sira nia klamar morin no furak iha Maromak nia futar oin, tamba ne’e mak presiza lori ai-funan ne’ebé natural no la’os ida ne’ebé artifisial para ba infeita de’it iha matebian sira nia rate katak, tenki iha intensaun ispirituál.

Padre David afirma, ai-funan plástiku laiha sentidu no hanesan hela ai pedasuk ida ne’ebé ema lori ba rai hela iha rate matebian sira nian, ai-funan plastiku tau ka la tau laiha sentidu, no ida ne’e ne’ebé preferivel mak ai-funan matak, ai-funan fresku ne’ebé mai husi natureza.

Amo Pároco Paroquia Motael ne’e rekoñese katak, iha Díli laran ema barak demais labele hetan ai-funan hotu, maibé hanoin no buka tok ba, ne’ebé la presiza ai-funan de’it mak bele lori ba Matebian sira, maibé importante liu mak ema nia intensaun ka objetivu ba tau ai-funan iha rate ne’e oinsa ema tenki entende no la’os naran ba tau de’it maibé la kompriende nia sentidu.

“Entaun loron iha dia 1 no 2 de Novembru fó hanoin mai ita atu prepara ita nia-an halo didi’ak, ba sarani sira, liu-liu ha’u nia sarani sira iha Paróquia Motael no ba sarani sira hotu, atu fó hanoin de’it katak, ita ne’ebé moris iha mundu ida ne’e, ita ne’e Maromak nian, ita atu matenek fali ka riku fali ka boot fali ka polítiku fali ka sé de’it, rai ne’e ita la halo ida, ita hotu moris mai rai ne’e iha tiha ona, tempu ne’ebé ita uza hodi goza tun sa’e ba buat barak hodi la preokupa ho Maromak ne’e, tempu ne’e ema ida mós la halo ida, katak tempu ne’e iha tiha ona no Maromak mak halo”, hateten Padre David da Conceição.

“Moris ne’ebé ita simu mós hanesan, primeiru ita simu moris ne’e hanesan bebeoan ida no ita boot mai mak foin riku, matenek no sai bo’ot, maibé Maromak mak ita nia kriador, tamba ne’e ita keta haluha ita nia hun. Ne’ebé maluk sira haka’as-an to’ok ba, ita nia matenek, rikusoin pozisaun sosial labele boot liu fali Maromak, ne’ebé mai ita haka’as-an to’ok ba,” Pe. David Alves hato’o mensajen ba sarani hotu ne’ebé sei selebra loron finadu ka matebian nian ne’ebé monu iha dia 1 no 2 de Novembru 2016.tos/eni/ías

Jornal Nacional