UE hasai observadora eleitoral iha Timor-Leste hafoin hato'o pergunta ba xefe Estadu

"Prezidente iha planu ida ba futuru: ha'u nia partidu maka PLP. Bainhira ha'u manán ha'u sei sai nu'udar xefe Governu. Ha'u hatene katak ha'u labele husik kombate ho CNRT no Fretilin"

Misaun observasaun hosi Uniaun Europeia (UE) ba eleisaun timoroan nian hasai ona observador ida hosi nasaun ne'e tanba observador husu ba atual xefe Estadu, iha enkontru públiku, kona-ba saida maka nia sei halo bainhira husik kargu. 

Kazu hetan ona dimensaun mediátiku tanba ba dala uluk, bainhira hatán ba observadora lituana, Prezidente Repúblika, Taur Matan Ruak, deklara ba públiku katak sei sai hanesan kandidatu ba primeiru-ministru iha fulan-Jullu.

"Prezidente iha planu ida ba futuru: ha'u nia partidu maka PLP. Bainhira ha'u manán ha'u sei sai nu'udar xefe Governu. Ha'u hatene katak ha'u labele husik kombate ho CNRT no Fretilin", Taur Matak Ruak hatete bainhira ko'alia iha enkontru ida ho populasaun iha Baucau, sidade boot daruak iha nasaun ne'e.

Xefe Estadu hatán nune'e ba pergunta hosi observadora, lituana Ruta Avulyte Jelage, ne'ebé husu ba nia katak saida maka nia sei halo hafoin eleisaun sira, kestaun ida ne'ebé hamosu liu debate polítiku iha Timor-Leste.

Vídeo ho transkrisaun sira hosi pergunta no resposta espalla lalais iha rede sosial sira no iha imprensa balun, fó vizibilidade boot ba momentu ne'e.

Maski iha tinan hirak ikus ne'e aponta beibeik posibilidade katak Taur Matan Ruak sei sai hanesan kandidatu ba primeiru-ministru, ho apoiu hosi Partidu Libertasaun Povu nian (PLP), ne'ebé xefe Estadu nunka konfirma tuir dalan formal.

Xabier Meilan, númeru rua hosi misaun observasaun eleitoral UE nian iha Timor-Leste, explika ona ba Lusa katak desidi tiha ona katak kolokasaun hosi pergunta sira iha kontextu ne'e la halo parte hosi observadora nia knaar, nune'e sira hili ona hosi substitui observadora.

"Desizaun ne'e foti ona tanba iha asaun públiku ida no iha prezensa hosi meiu komunikasaun sira, observadora ne'e halo ona pergunta sira ho karakter polítiku ba Prezidente Repúblika ne'ebé la admiti hanesan asaun ida ne'ebé halo hosi observador ida", Meilan hatete.

"Ha'u hatete katak hanesan interferénsia polítika maibé halo pergunta ho karakter polítiku iha públiku ba ator polítiku relevánsia ida hanesan prezidente ida hosi nasaun ida, ha'u hanoin katak la'ós hanesan serbisu hosi observador ida nian. Nune'e hanesan konsekuénsia maka ami hanoin katak di'ak liu substitui observadora", nia refere.

Observadora sai iha loron-tersa ne'e hosi Timor-Leste no sei troka iha loron hirak tuirmai ne'e, konfirma ona hosi Meilan.

Ekipa observasaun hosi UE iha ona Timor-Leste tanba hetan konviti hosi Governu timoroan hodi akompaña eleisaun prezidensial sira iha loron 20 Marsu no lejislativu ne'ebé previstu iha fulan-Jullu.

SAPO TL ho Lusa