Bainhira Fretilin Kaer Governu, Alkatiri: “Sei Hadia, Hametin, Haburas, & Hamos”

SUAI-Partidu Fretilin halo kampaina ba dala hitu iha Suai, Munisipiu Covalima. Kampaina nee hetan partisipasaun makaas husi militante no zimpatizante. Suai Vila nakonu ho militante no simpatizante husi area postu administrativa 7.

Sira maioria hatais kaus mean ho marka Fretilin. Sira nadodo tama ba Kampu Ladi hodi tuir kampaina. Kampu Ladi haree hanesan laloran iha tasi.

Iha ninia diskursu, Sekertariu Jeral (Sekjer) Partidu Fretilin, Mari Alkatiri ho espiritu boot hateten, bainhira kaer governu, Fretilin sei hadia, harii, hametin, haburas, no hamos. Hadia signifika, hadia buat barak neebe lao sala ona durante tinan 10 nia laran.

I Xanana rasik dehan, tinan 10 sasan barak lao lalos iha railaran. Neduni, Fretilin manan, hamutuk ho Xanana hodi hadia buat sira neebe lao naksala ona,” hateten Alkatiri.

Harii signifika katak, harii lolos politika nasional hodi dezenvolvimentu setor edukasaun, saude, agrikultura no sel-seluk tan. Ho politika neebe lolos maka bele loke dalan hodi harii sistema ida neebe diak liu.

Hametin signifika katak, durante nee signifika hametin ona paz no estabilidade. Maibe laos nee deit. Fretilin tenke hametin tan ekonomia liu husi harii infra-estruktura ekonomia no hametin nafatin sistema politika neebe Fretilin atu harii.

Haburas signifika katak, bainhira hametin ona ekonomia ho teknolijia mundu ohin loron nian, inklui haburas nafatin demokrasia iha railaran.

Habelar signifika katak, habelar dezenvolvimentu ba munisipiu hot-hotu. Labele dezenvolve deit fatin ida maibe husik hela fatin seluk. I povu hot-hotu iha direitu hanesan. Ikus liu maka Hamos. Signifika katak, bainhira harii foun sistema politika tenki garante katak, KKN (korupsaun, koluksaun no nepotismu)  sei la tama fali ona. Tenke hamos husi nasaun ida nee.

Tamba nee, bainhira Fretilin manan, Ramos Horta mos manan, Xanana mos manan. Realidade lolos mak nunee duni. Fretilin mak tenke manan, atu nunee lideransa hotu bele manan.

Laos ami ida-idak manan para Fretilin mos manan, lae. Fretilin tenke manan para ami hotu bele manan,” hateten Alkatiri.

Tinan 10 Fretilin la ukun. Fretilin sai opisizaun, depois halo postura foun, fo kontribuisaun maibe sasan lalao nafatin. Tamba nee, ba periodu 2017-2022 nee, Fretilin tenke manan para kaer ukun. Fretilin kaer ukun ho ninia valoris no prinsipiu, laos ukun ho Konfu nain sira nia prinsipiu. Nee lae. Maibe, katak Alkatiri, Fretilin laos atu ukun mesak. Fretilin ukun ho ema hot-hotu neebe iha duni hakarak atu kore povu husi mukit no kiak. Tuir Alkatiri nia haree, Timor oan hotu iha kapasidade, iha komprimisiu. Ho ida nee mak, Fretilin sei hakuak ema hotu.

Iha biban nee, Alkatiri koalia mos konaba issue SARA. Nia husu ba lideransa parpol hot-hotu ihaTimor Leste, labele lori issue SARA ou relijiaun hodi bosok povu para labele vota ba Mari Alkatiri tamba laos ema katoliku.

“Maske hau laos ema katoliku, maibe hau komprende biblia Antigu Testamentu no Novu Testamentu. Tamba nee lalika bosok povu ho lia falsu sira nee”.

Entretantu, militante Fretilin Manuel da Costa hateten, ho Fretilin Timor Leste hetan ukun aan. Tamba nee, sira sei hili partidu nee iha loron votasaun. Mari Alkatiri ho nia komitiva kampaina to iha fatin seremonia tuku 15:00 no simu direitamente husi Koordenador Partidu Fretilin Munisipiu Covalima. Depois tara tais no dansa tradisional hodi akompania Mari Alkatiri ho nia komitiva ba fatin kampaina.

Antes hahu kampaina, kanta uluk hino nasional patria patria, kontinua kedan ho hananu hino partidu Foho Ramelau, hafoin un minute de selensia neebe Alkatiri hatoo direita. Carme Ximenes/EST-2

Suara Timor Lorosae