PM: Sivizmu hosi populasaun no komportamentu hosi líder sira fó hakmatek

Primeiru-ministru timoroan afirma iha loron-segunda ne'e katak komportamentu hosi líder polítiku sira no sentidu síviku maka'as hosi populasaun permiti daudaun atu kampaña ba lejislativu sira iha loron 22 Jullu sei la'o ho hakmatek no lahó insidente.

"Buat ne'ebé maka impresiona ha'u maka sentidu síviku hosi populasaun. Ami ba zona rural sira no ami haree fila ida hosi uma sira ne'ebé tau bandeira interkaladu hosi partidu oioin no ema sira aseita diversidade sira hosi opsaun polítika", Rui Maria de Araújo hatete ba Lusa.

Kampaña sira hosi partidu oioin halo daudaun "ho dignidade" no forsa sira ne'ebé halo parte iha kandidatura hetan daudaun "oportunidade hodi aprezenta sira nia programa" no, maski balun "uza lianguajen ne'ebé forte liu, ladún forte, ho tonalidade jeral hosi partidu sira maka tenta fó máxima explikasaun ba populasaun kona-ba sira nia programa no saida maka sira hakarak halo bainhira manán eleisaun sira".

Rui Araújo, ne'ebé ko'alia ba Lusa bainhira hakotu vizita ida ne'ebé niq halo hamutuk ho Prezidente timoroan ba kuarte-jeneral Forsa Defeza nian (F-FDTL) iha Díli, hatete katak ba Governu "hanesan motivu orgullu nian" tanba "polítiku sira no mós sidadaun sira, hanesan mós forsa defeza no seguransa sira iha komportamentu ne'ebé di'ak tebes".

Iha parte jeral no maski hosi situasaun ki'ik balun ne'ebé akontese, órgaun sira administrasaun eleitoral nian, Komisaun Nasional Eleisaun nian (CNE) no Sekretariadu Tékniku hosi Asisténsia Eleitoral (STAE) ajuda hela hodi garanti atu buat hotu la'o ho di'ak tuir regulamentu.

Iha de'it "violasaun ki'ik sira hosi regra sira", hanesan partidu sira halo asaun liu hosi oras ne'ebé regula iha horáriu kampaña nian, maibé "laiha buat boot ida", hatete hosi xefe Governu.

"Kapasidade observasaun no monitorizasaun ne'e hanesan desentralizadu iha munisípiu sira ajuda tebes atu buat hotu la'o ho di'ak tebes", nia explika.

Kampaña ba lejislativu sira loron 22 Jullu nian, ne'ebé aprezenta ona forsa polítika hamutuk 21, hahú ona iha loron 20 Juñu no halo to'o loron 19 iha fulan ne'e.

Eleitor timoroan hamutuk na'in 764.858 ne'ebé resenseadu ona ba votu sei iha oportunidade hodi hili membru na'in 65 foun ba Parlamentu Nasional.

Autoridade eleitoral timoroan sira sei instala asembleia votu hamutuk 1.121 iha sentru votasaun hamutuk 859, ne'ebé pelumenus hitu sei funsiona iha estranjeiru, iha Austrália, Koreia-Súl, Portugal ho Reinu Unidu.

SAPO TL ho Lusa