domingo, 22 de abril de 2018

MNEK-IOM Diskute Kestaun Imigrasaun


DILI, (TATOLI) – Ministériu Negósiu Estranjeiru no Kooperasaun (NNEK) ho apóiu husi organizasaun internasional ba migrasaun (IOM-International Organization for Migration) halo enkontru interministeriál hodi halo diskusaun kona-ba migrasaun iha nível rejionál no globál.

Ministru Negósiu Estranjeiru no Kooperasaun, Aurélio Guterres, hateten enkontru ne’e koa’lia mobilidade populasaun (imigrasaun), tanba Timor-Leste konsidera imigrasaun importante hodi lori ekonomia mai rai-laran, liu-liu hafoin independénsia.

“Kestaun ne’e importante tanba imigrante sira ne’ebé ba rai liur, haruka fali osan mai”, tenik governante ne’e ba jornalista sira iha MNEK, ohin.

Hodi dehan iha tinan ida nia laran, tokon $40 resin mak tama mai ita nia rai laran husi migrasaun.

Tanba ne’e, organizasaun imigrante fó apóiu ba Timor-Leste hodi bele integra iha diskusaun nível globál.

“Servisu IOM iha ne’e fó apóiu hodi inisiativa globál ne’ebé Nasoen Unida diskute hela, Timor-Leste bele engaja iha laran tanba wainhira ita nia imigrante sira sai ba rai liur presiza hetan apóiu kona-ba sira nia direitu no dever hanesan imigrante”, katak.

Nune’e nia dehan tan mobilidade hanesan konsekuénsia husi globalizasaun.

“Diskusaun ne’e hanesan kontinuasaun apóiu IOM mai ita atu ita bele partisipa iha diskusaun sira iha nível rejionál no globál”, akresenta.

Jornalista: Julia Chatarina | Editora: Rita Almeida

Imajen: Ministru Aurélio Guterres. Foto espesiál

Sem comentários: