Kazu Soe Bebe no Divorsio Buras, Ferreira: Timor Krize Moral

Primeira Dama Timor –Leste, Isabel da Costa Ferreira, hateten Timor –Leste agora dadaun hasoru hela problema bo’ot mak krize moral, tanba kazu divorsio, abandona no atividades prostituisaun buras loos iha rai laran.

Nia preokupa, tanba ema barak mak uza dalan fasil (pratika prostituisaun) hodi hetan moris diak, tanba sira hakarak estilus moris ne’ebe luxu liu sira nia posibilidade. 

“Agora dadaun ita iha krize valores moral iha ita nia rain,” primeira dama Ferreira hateten, bainhira koalia iha konferensia dezenvolvimentu feto iha ekonomia, iha Hotel Timor, Dili. 

Tuir nia, jovens ohin loron nia komportamentu ba negative maka’as hodi tau sira nia aan iha perigu no risku nia laran, realidade hanesan kazu moras HIV/SIDA, droga no prostituisaun nafatin buras. 

“Labele uza dalan fasil atu moris diak hodi estraga ita nia dignidade, tanba familia riku maibe laiha dignidade, ne’e sei la kontente,”nia hateten. 

Tanba ne’e, nia husu ba ema hotu atu kontribui ba dezenvolvementu nasaun nian ho matenek, responsabilidade no dignidade atu bele fo onra ba iha heroi sira ne’ebe luta ba ukun rasik aan ida ne’e. 

Entretantu ativista direitu feto, Isabella Galhos, hateten edukasaun sivika importante tebes ba foinsa’e sira, tanba foinsa’e sira ohin loron laiha ona respeitu malu. 

“Ita la’o rona ita nia oan sira tolok sira nia inan aman lor-loron iha dalan, ne’e realidade ne’ebe akontese,” Galhos fo ezemplu. 

Nia hateten, ema ida-idak iha nia presepsaun la hanesan ba problem sosial sira hanesan divorsio, maibe presiza haree ba situasaun ne’ebe iha, divorsio balun akontese tanba feto terus demais no lakon sira nia liberdade.

The Dili Weekly