BISPU HILTON KONTRA GOVERNU AUSTRALIA

DILI - Bispu Hilton Deakin hosi Melbourne-Austrália kontra nia governu rasik kona-ba liña fronteira marítima hodi ezije atu governu Austrália respeita Timor nia soberania.

“Ha’u la ko’alia en-nome Igreja Austrália, tanba ha’u labele maibé ha’u ko’alia lori naran povu Austrália ne’ebé fiar ita boot sira. Ha’u fiar no povu Austrália fiar ita boot sira buka justisa ne’ebé maka loos ba fronteira marítima nian,” dehan Bispu Hilton bainhira hato’o nia lia menon ba demonstrante sira iha Embaixada Austrália nia oin, Fatuhada, Tersa (22/3).

Nia hatutan, ko’alia lori naran povu Austrália ne’ebé maka fiar ba Justisa sosiál povu Timor sei determina fronteira marítima ne’e, maibé ema balun de’it iha Austrália maka la fó fiar ba ita boot sira (TL) nia direitu.

“Ha’u fiar katak ita boot sira nasaun ne’ebé maka independénsia ho soberania maibé ita boot sira seidauk hatene fronteira marítima ne’e to’o iha ne’ebé. Nasaun ne’ebe maka viola maka Austrália. Ami mós kompriende ita boot sira nia luta ba independénsia, ita boot sira nia luta hodi desidi ita boot sira nia istória no istória ne’e komplikadu tebes. Maibé, Austrália ha’u nia nasaun hatudu buat ne’ebé bosok ba imi,” dehan Bispu ne’e.

Nia esplika liu-tan, Austrália nia hahalok maka kontinua manipula nasaun Timor-Leste nia rikusoin.

“Ema Austrália sira ne’e iha interese maka’as ba imi nia mina ho gas. Ne’e maka ita hotu hamutuk hapara buat ne’e. Atu dehan ba ita boot sira katak povu Austrália barak maka hakarak apoia ita boot sira iha Austrália. Povu Timor ho Austrália la’o hamutuk no luta hamutuk hodi desidi futuru Timor-Leste,” dehan Bispu ne’e.

Nia hatutan, iha Austrália mós halo hela demonstrasaun kontra sira nia governu ba povu Timor nia mina ho gas maibé ladún barak. Demonstrasaun iha Timor barak liu sira iha Austrália.

Timor Post