ESTADU NAKLOKE DEMAIS, MORAS HIV/SIDA BURAS IHA TL

Povu konsidera moras HIV/SIDA ne’ebé mak agora dada’uk buras iha Timor Leste ne’e, tanba Estadu nakloke demais ba buat hotu, no lei Timor Leste nian mós la forte.

“númeru moras ida ne’e komesa sa’e ba bebeik, ida ne’e tanba saida, tanba ita nia nasaun nakloke demais. Ita nia nasaun nakloke ne’e, lei mak mak fraku ka, oinsa,” katak Alito Monis bainhira dialogu ho Prezidente Repúblika Taur Matan Ruak iha Suku Watubou, Postu Administrativu Maubara, Munisipiu Liquiça, Segunda (28/03).

Tanba ne’e, nia husu ba Estadu atu buka solusaun ba moras ida ne’e, tanba moras ida ne’e ameasa futuru joven sira nian, tanba joven mak futuru nasaun nian.

Alende ne’e, komunidade Manuel Gardoso mós hatete katak, Governu tenke buka meus ba moras ida ne’e.

“Ami hadomi tebes ami nia oan sira, ami iha moral atu eduka no lori ami nia oan sira ba dalan diak.Ukun nain sira bele fó fórsa ida ba inan aman hanesan baze legal ida atu eduka ami nia oan sira,” katak nia.

Maibé nia dehan, Governu fó fali buat seluk katak, bainhira oan sira tama ona iha idade joven, Goveru hasai fali lei ida katak, sira oan sira iha liverdade ka libre, ida ne’e mak preokupasaun bo’ot ba povu.

Hatan ba preokupasaun ne’e, Prezidente Repúblika, Taur Matan Ruak esplika katak, Buat ne’ebé mak di’ak, entaun bele halo tanba sei hetan buat ida, maibe buat ne’ebé ladi’ak, la persija lei ida, tanba buat ne’e ladi’ak duni ba nasaun no futuru oan sira nian.

“Ita nia nasaun ne’e nakole demais ne’e, nakloke ba buat diak, la’os nakloke ba buat ne’ebé mak atu estraga ita no ita nia nasaun. Ita hili buat ne’ebé di’ak, buat ne’ebé ladi’ak, labele hili, li-liu ba ita nia oan sira, ida ne’e edukasaun ida ne’ebé mai husi ita nia uma laran,” katak Taur Matan Ruak.

Taur Matan Ruak fó ezemplu katak, bibi mala’e ne’e lahanesan ho bibi Timor, taba bibi Timor ema duni nia halai ona, maibé bibi mala’e duni la halai ida.

Alende ne’e, reprezentante Komisariu Komisaun Nasionál Kombate HIV/SIDA, hatete katak, númeru moras HIV/SIDA iha Timor Leste agora sa’e maka’as ona.

“Iha ita nia nasaun Timor Leste agora ne’e, ema sira ne’ebé mak kona ona virus HIV/SIDA hamutuk 552, no ema nain 62 mak mate ona,” dehan nia.cos

Jornal Nacional