VIRGILIO ELEITU BA PREZIDENTI KI – PRESIZA SALARIU ADEKUADU BA JORNALISTAS

Liu husi primeiru asembeleia jeral Konsellu Imprensa nian, Kinta (31/3), membru KI hili Vergilio da Silva Guterres ba prezidenti KI periodu tinan haat (2016-2020).

Vergilio Guterres eleitu liu husi votasaun sekretu ho votus haat (4) husi membru KI nain 5 no votus ida hela ba José Ximenes.

Iha ninia primeiru diskursu afirma, kompaña media tenki fo salariu adekuadu no dignu ba jornalistas.

“Iha hau nia mandatu tinan haat ne’e, sei esforsu garantia independensia media. Independensia ne’e garante bainhira kompaña media fo salariu  adekuadu  no dignu  ba  Jornalista, nune’e  ita  hotu  bele  fiar  sira  nia  independensia  tuir  ejizensia  ne’ebe  mak  iha,” dehan prezidenti eleitu Vergilio Guterres iha eis edfisiu CNE, Mascarinhas.

Iha nia mandatu, sei esforsu an atu estabelese estatuta KI, konsellu fiskal, sensibiliza KI ba orgaun soberanu, sosiadade sivil no media nain, fo kapasitasaun koñesementu no finanseiru, sertifika jornalista, proteze no rezolve problema ne’ebe jornalista infrenta.

Tantu  Sekretariu  Estadu  Komunikasaun  Sosial  Nélio  Isaac  Sarmento sekunda, Governo  fo  konfiansa  tomak  ba  prezidente  eleitu  KI ho  nia  membrus  atu  garante  liberdade  imprensa  iha  Timor  Leste.

 “Ita  iha  ona  orgaun  regulador  nune’e  ba  oin  iha  buat  ruma  ne’ebe  publiku  sira  la  satisfas  ho  produtu  jornalista  ou  orgaun  komunikasaun  sosial  nian  mak  Konsellu  Imprensa  mak  sai  dalan  ida  ne’ebe  mak  lolos  ona  atu rezolve,”dehan SE Nélio.

Ikus, Sekretariu Estadu Nélio Isaac fo parabens  ba  prezidente  eleitu  KI ho  ninia  membrus  José  Ximenes, Hugo  M.Fernandes, Francisco  B. Simões  da  Costa no  Paulo  da  C.  Araújo.

Nia husu ba  membru  KI atu esforsu an defende liberdade emprensa.Tos

Jornal Nacional