IFJ sei Halo Kampaña Internasionál ba Prosesu Legál hasoru Jornalista Oki

Dili Abril 12 2016. Radio Liberdade Online - Federasaun Jornalista Internationál (IFJ) hato’o ninia preúkupasaun no tristeza relasióna ho prosesu legál hasoru Jornalista Diáriu Timor Post, Raimundo Oki no Eis Diretór Timor Post, Lourenco Martins. Organizasaun jornalista mundiál ne’e mós promote sei halo Kampaña internasionál hasoru prosesu legál ne’ebé Ministériu Públiku aplika ba jornalista Timor-Leste ne’e ho nia dirijente.

Jim Nolan nu’udar Konsultór Legál ba International Federation of Journalists (IFJ) hato’o lia hirak ne’e hafoin akompaña, Jornalista Oki no Eis Diretór Post Segunda (11/4) iha Edefisiu Ministériu Públiku, Colmera-Dili.

Ba jornalista Radio Liberdade Online, Sr. Nolan hateten IFJ sei halo esforsu oinsa atu legálmente justifika loloos Lei kriminál nian ne’ebé uza hasoru jornalista sira ne’ebé hala’ó atividade jornalizmu iha nasaun foun ne’e.

“Federasaun Jornalista Internasionál preúkupa tebes ho prospek prosesu legál hasoru Oki no díariu ida-ne’e iha kazu ne’e. Ami fiar katak, absolutamente ami sei justifika lei kriminál nian ne’ebé uza hodi akuza jornalista sira ne’ebé dadauk ne’e halaó hela sira nia serbisu,” Nolan Haktuir.

Konsultór Legál ne’e mós hateten IFJ sei halo Kampaña hasoru prosesu legal ne’e hodi fó liman ba-malu no enkoraja jornalista hothotu iha rejiaun ne’e atu luta hasoru prosesu legál ba jornalista sira iha Timor-Leste.

“Loos duni, IFJ sei halo Kampaña hasoru prosesu legal ne’e  no sei kontinua fó liman ba-malu no enkoraja jornalista sira atu halo kampaña riguroju hasoru akuzasaun legál ne’e,” dehan Reprezentante IFJ ne’e.

Nia haktuir-tan katak nasaun hothotu iha obrigasaun atu prezerva liberdade imprensa iha idaidak nia rain rasik tamba ida-ne’e bele fó garantia ba transparansia no boa governasaun.

“Ne’e importante purke iha nasaun ne’ebé deit ema sira esforsu oinsa atu preserva liberdade imprensa tamba garante transparansia no boa governasaun no ida-ne’e nu’udar fundasaun ba nasaun ne’ebé deit,” nia esplika.

IFJ triste no preúkupa tamba Ministériu Públiku kriminaliza kazu ne’e hodi uza Kódigu Penál, Artigu 285: Denúnsia Kaloníoza laos Kódigu Sivil kona-ba aktu defamasaun. Ne’e signifika katak Timor Post hato’o informasaun falsu liu-hosi ninia públikasaun.

Entertantu, Ministériu Públiku iha Segunda (11/4) ne’e aplika ona termu rezidensia ba Jornalista Oki no Eis-Diretór Timor Post, Lourenco Martins hodi hein prosesu legál tuir mai.

Primeiru Ministtru Rui Maria de Araujo lori Timor Post ba Ministériu Públiku relasióna ho notisia diáriu ne’e nian, edisaun 10 Novembru 2015, hateten Rui Maria Araujo ne’ebé nu’udar asesór ba Ministériu Finansia iha tempu ne’ebá diskonfia fó projetu ba kompaña internasionál husi Indonezia atu halo instalasaun ba data center iha Ministériu Refere.

Relasióna ho salan iha públikasaun notisia ne’e, Redasaun Timor Post fó ona direitu resposta no koresaun no Diretór Timor Post públikamente husu deskulpa ba PM Rui Araujo, maibé nia nafatin lori kazu ne’e prosesu legál.

Iha parte seluk, sosiadade sivil no pratikante sira mídia nian laaseita bainhira kazu Timor Post ho PM Araujo nia ne’e lori bá tribunál tamba tuir sira, ida-ne’e sei fó presendente aat ba prosesu harii demokrasia, liuliu garantia ba transparansia no boa governasaun iha railaran.

Sira sujere kazu refere di’ak-liu rezolve liu-hosi dalan mediasaun, nune’e lapresiza lori bá tribunál tamba mediasaun dalan ida-ne’ebé efetivu-liu, baratu no lahan tempu barak. 

Rádio Liberdade Dili