Sidadaun La Brani Aprezenta Krime Korupsaun

DILI - Sidadaun Timor Leste la brani aprezenta krime Korupsaun ba seitor Justisa, maske sira komprende lalaok krime korupsaun iha rai laran no brani koalia korupsaun buras, maibe nunka aprezenta faktus ba publiku.

Tuir Deputadu Bankada PD Joao Adriano katak sidadaun hotu-hotu koalia korupsaun iha Timor Leste buras teb-tebes, maibe sira la brani aprezenta evidensia hodi aprezenta ba instutusaun justisa hodi lori ba tribunal.

Sidadaun hotu koalia korupsaun buras iha ita nia rai maibe sira la aprezenta evedensia hodi bele prosesu too iha tribunal tan nee korupsaun buras nee hanesan lia anin deit,” dehan Adriano ba STL Kuarta (13/04/2016) iha PN.

Nia hatete sidadaun sira neebe mak hatene ema balun halo korupsaun hodi dezvia osan estadu labele tauk halo keixa ba tribunal, atu nune bele prosesu Tuir dalan justisa no lei neebe vigor iha nasaun Timor Leste.

Nunee mos deputadu Bankada CNRT Agustinho Lay hatete kazu korupsaun neebe mak lao presiza hare didiak husi ajenda institusaun estadu neebe mak deskonfia komete krime korupsaun, tamba kazu krime nee akontese iha nasaun hotu-hotu.

Liu husi relatoriu annual Komisaun Komisaun Anti Korupsaun Aderito Tilman hatete iha tinan 2015 KAK simu delegasaun kompetensia husi gabineti sentral kombate korupsaun no krime organizadu hamutuk prosesu 22, prosesu 1 husi prokuradoria distrital baucau nune total hamutuk 23. Informasaun kompletu iha STL Jornal no STL Web, edisaun Kinta (14/4/2015). Timotio Gusmao

Suara Timor Lorosae