Prezidente timoroan "sensível tebes" ba ensinu portugés

Diretór hosi Eskola Portugeza Ruy Cinatti iha Díli garanti ona katak xefe Estadu timoroan, ne'ebé simu nia iha audiénsia, hatudu "sensível tebes" ba projetu hosi sentru eskolar ne'e no hosi ensinu lian portugés iha Timor-Leste.

"Ha'u rona liafuan korajen sira kona-bá ensinu lian portugés no liuliu kona-bá ami nia eskola. Prezidente Taur Matan Ruak iha oan na'in tolu ne'ebé maka estuda ho ami no tanba ne'e maka iha koñesimentu maka'as kona-bá eskola", esplika hosi Acácio de Brito ba Lusa.

"Nia hatudu sensível tebes kona-bá kestaun ensinu portugés nian no iha defeza ba portugés no tétun hanesan lian ofisial sira", nia hatete.

Acácio de Brito esplika katak audiénsia oras ida nia laran permiti ona rona hosi xefe Estadu "abordajen ida interesante tebes" kona-bá temátiku ensinu nian no hosi projetu edukativu iha Timor-Leste.

"Iha preokupasaun loloos ba lian portugés no, iha jeral, ba edukasaun no funsionamentu hosi sistema edukativu, ho rekoñesimentu ida hosi eskola portugeza iha Díli nia knaar iha Timor", nia afirma.

Acácio de Brito esplika ona katak nia aproveita ona enkontru oras ida nia laran hodi husu apoiu hosi Prezidente hodi "aumenta kapasidade hodi simu alunu sira", hodi nune'e aumenta tamañu eskola nian.

Fó hanoin katak tinan letivu atuál ne'ebé la'o daudaun hanesan tinan ne'ebé iha alunu barak tebes, besik na'in 850 resin - 90% hosi alunu sira ne'e maka timoroan sira - iha mós lista ida ne'ebé hamutuk 800 resin hosi família sira ne'ebé hein atu tama iha eskola ne'e.

SAPO TL ho Lusa