Jovens Ohin Loron Laiha Interese Sai Agrikultor

Sekretario Jeral Ministerio Agrikultura e Peskas, Cesar Jose da Cruz, hateten forsa trabalho iha setor agrikultura kada tinan tuun ba bei-beik, tanba jovens ohin loron lakohi servisu sai agrikultor.

Nia dehan, forsa trabalho iha area rural maioria feto no mane sira ne’ebe idade 55 ba leten ona, entaun sira nia forsa la to’o atu dezenvolve agrikultor ida liga ba merkadu.

    

“Hahu tinan 1999 to’o 2014, ita iha deit 68% ema servisu setor agrikultor, tanba ita barak dedika aan ba servisus ne’ebe la produs buat ida hanesan tuun mai Dili loke kios, fa’an pulsa servisu seguransa sira ne’e afeta tebes ba setor agrikultor,” nia hateten. 

Nia dehan, maioria joven sira husik hela sira nia rai ne’ebe iha potensial ba produsaun aihan hodi buka servisu iha Dili atu sustenta sira nia moris, tanba sira hanoin ida ne’e mak dalan diak. 

Nia informa, ministerio iha ona politika ida klaru atu enkoraja joven sira tama iha vida agrikultor liu husi apoiu ekipamentus no seluk tan. 

“Ita tenke modifika joven sira nia hanoin no ekonraja sira kria grupo reforsa trabalho iha area rural hodi hasa’e produsaun no produtividade aihan iha rai laran,” nia hateten. 

Entretantu Diretora Organizasaun Non Govermental (ONG) Hamutuk Ita Ajuda Malu (HIAM) Health, Rosaria Martins da Cruz, konkorda forsa servisu iha area rural fraku ba beibeik, tanba maioria ferik katuas mak servisu. 

Atu muda ida ne’e, nia dehan, sira fo ona kapasitasaun ba foinsa’e sira husi munisipio Ermera kona ba dezenvolvimentu to’os ho objetivu enkoraja jovens kontinua servisu ida ne’e.

“Ami fo ona kapasitasaun ba joven sira, tanba ferik katuas sira idade ona e sira mate, konserteza servisu ida ne’e hela ba jovens atu kontinua,” nia hateten. 

Nia hatutan, formasaun ba joven sira foka liu ba jestaun to’os tanba munisipio Ermera iha potensial ba hortikultura. 

Nia informa, sira fo ona kapasitasaun ba grupo hortikultura hamutuk 27 husi munisipio Ermera ne’ebe nia membrus maioria jovens. 

Iha parte seluk estensionista munisipio Viqueque, Feliciano Soares, hateten la’os jovens hotu, maibe iha jovens balun mak involve ona iha setor agrikultura.

 “Joven sira presiza osan tanba sira iha nesesidade barak, entaun sira buka dalan ne’ebe fasil atu hetan osan liu –liu servisu iha projetus,” nia dehan.

The Dili Weekly