BULETIN LA UZA FOTOGRAFIA, DIFIKULTA ELEITORES ANALFABETU

Xefi Suku Vila Verde, Abdul Mancoli Arranhado informa katak, buletin votus la uza fotografias kandidaturas Xefi suku sira nian, sei difikulta eleitores analfabetu sira, hodi hili sala ninia kandidatura.

Tanba ne’e Abdul Mancoli Arranhado husu ba Governu sentral di’ak liu iha bulletin de votus ne’e tenki tau mós kandidatura sira nia fotografia para bele hafasil eleitores.

“Sé ita nia Estadu ou parte kompetente la autoriza fotografia kandidatura ba iha eleisaun suku ninian ou kontinua mantein nafatin pozisaun katak bulletin votus ne’e la uza nafatin fotografia, ne’e sei fó impaktu ba desizaun ou pilihan ba komunidade hirak ne’ebé maka la hatene lee no hakerek (buta huruf),” Xefi Suku Vila Verde, Abdul Mancoli Arranhado ba JN-Diário iha ninia knaar fatin, Matadouru-Díli, Kinta (15/09/2016).

Abdul Mancoli Arranhado fundamenta katak, prosesu eleisaun suku ba tinan ida ne’e, halo konfuzaun boot kandidatura ne’ebé maka kandidata-an no mós ba komunidade ne’ebé maka atu hili ninia kandidatura, tanba ferik no katuas iha suku Vila Verde barak maka analfabetu (buta huruf).

“Tanba ne’e maka ami husu sé bele tau fotografia ba sira ne’ebé aprezenta kandidatura ba xefi suku no aldeia, no matadalan eleisaun ninian suku 30 Setembru ne’ebé maka parte kompetente haruka mai ne’e, ladun esplika klaru mai ami no laiha sosializasaun, tanba ne’e maka agora hotu-hotu bingung atu halo saida,” dehan Xefi suku Vila Verde.

Nia realsa katak, eleisaun suku tinan ida ne’e komplikadu teb-tebes, tanba suku Vila Verde prepara ona dokumentus ou asinatura husi apoiantes ho data 30 de Setembru nian, maibé administrador telefone fali mai dehan eleisaun adia fali ba dia 29 Outubru.

“Tanba ami husu tiha apoiante sira asina tiha no tau tiha ona data eleisaun ninian no informa ona katak eleisaun akontese iha loron 30 Setembru, to’o ikus dehan tunda fali entaun agora ami tenki sosializa fila fali ba komunidade konabá data eleisaun ninian no tenki uza fali tipe-x para muda fali data no loron eleisaun ne’ebé maka parte kompetente fó mai, entaun ida ne’e halakon konfiansa entre kandidatu no apoiantes,” tenik Abdul Mancoli Arranhado.

Nia relata katak, kandidatura Xefi suku na’in 4 hanesan Maria Soares, Brígida do Rosario Soares, Joelson de Assis Belo, Cristovão Nunes no Abdul Mancoli Arranhado prontu atu kompete iha eleisaun, só kandidatura xefi aldeia maka seidauk mai entrega formulariu kandidatura.

“Eleisaun suku ba tinan ida ne’e ninia diak maka ita hotu-hotu bele asesu, tanba ita realija iha kada aldeia, maibé sé eleisaun suku halo iha aldeia problema maka ita bele asegura seguransa ka lae, tanba aldeia iha TL ezisti 2.225,” hatutan Xefi suku Vila Verde.

Entretantu tuir Diretor Jeral, Acilino Manuel Branco hateten, loos duni komunidade preokupa ho bulletin votus ba kandidatura suku la uja fotografia, maibé lei ne’e Parlamentu Nasional (PN) maka halo, nune’e Governu tenki esforsu para oinsa bele fasilita prosesu eleisaun ida ne’e.

“Tanba ida ne’e maka horibainhira iha Konsellu Ministru (KM) ikus, Ministeriu Administrasaun Estatal (MAE) hato’o ona proposta no regulamentus para oinsa ikus mai sai hanesan dekretu Governu atu regula prosesu  ne’e, no ita propoin mós para oinsa atu koloka mós fotografia iha bulletin de votus, maibé ida ne’e só ba de’it iha Xefi suku ninian, tanba Xefi suku ninian kandidatura ne’e lao tiha 15 dias antes loron eleisaun,” nia dehan.ves

Jornal Nacional