PR TAUR: BOLSA ESTUDU IHA PROBLEMA

Prezidenti Repúblika (PR) Taur Matan Ruak hateten katak, bolsa estudu ne’ebé mak Governu oferese ba estudantes Timoroan sira ba estuda iha rai liur ne’e, iha duni problema boot, tanba kuaze povu iha Timor laran tomak ne’e kestiona.

Xefi Estadu ne’e hatatan katak, tuir povu nia haree katak, bolsa estudu ne’e iha diskriminasaun ba povu nia oan sira.

“Povu iha fatin balun kestiona katak, sira nia oan Governu diskrimina sira hodi la hetan bolsa estudu ne’e, tanba bolsa estudu ne’e, fasilita malu de’it,” katak Taur Matan Ruak”, hateten Taur Matan Ruak iha diálogu komunitária iha Suku Samalari Postu Administrativu Laga, Munisípiu Baucau, Segunda (12/09).

Taur Matan Ruak informa mós katak, foin lalais ema deporta fila bolsa estudu balun husi Brazil, Portugal no nasaun seluk, tanba la iha kapasidade atu estuda.

Entretantu komunidade sira husi Suku Samalari konsidera, Governu gasta osan saugati deit.

Nune’e mós Governu investe ona osan barak hodi haruka Timor-oan sira ba eskola iha rai liur, maibé fila fali mai Estadu la uza sira nia matenek.

“Governu mak investe osan hodi haruka Timor-oan sira ba eskola, maibé bainhira sira fila fali mai, Governu la utiliza,” hateten Romaldo Francisco Almeida  wainhira partisipa iha diálogu komunitária ho PR Taur Matan Ruak.

Nia dehan, maski Governu mak investe osan hodi haruka sira ba buka matenek, maibé mai fali ONG sira mak utiliza sira.

Alende ne’e, João Gama da Costa mós informa katak, povu iha Aldeia Desagua, durante ukun-an ne’e, seida’uk asesu ba estrada.

Nia hatutan katak, estrada ne’e, iha tinan 2013 no 2014, tama ona iha programa PDD no PDID,  maibe to’o agora la implementa.

“Ami móss seida’uk asesu ba eletrisidade, tanba ne’e ami rekomenda ba Prezidenti Repúblika, atu hato’o ba Ministériu kompetente atu tau iha konsiderasaun mos,” nia dehan.

Hatan ba preokupasaun ne’e Xefi Estadu hateten katak, Suku barak iha Timor laran mak estrada seida’uk iha.

“Agora dada’uk ita nia Governu sei fó prioridade ba ita nia estrada nasionál, bainhira estrada nasionál hotu, mak foin loke estrada ba Suku no Aldeia,” Taur Matan Ruak esplika.cos

Jornal Nacional