VETERANUS LA EZISTE ONA IHA F-FDTL

Xefi Estadu Maior das Forsas Armadas FALINTIL Forsa Defeza Timor Leste (F-FDTL), Maijor Jeneral Lere Anan Timur hatete katak, veteranus agora la eziste ona iha F-FDTL nia laran.

“Agora hot-hotu membru Forsa Defeza Timor Leste, tanba veteranu sira atu reforma hotu ona,” dehan Lere Anan Timur ba jornalista sira iha Palácio Prezidénsia Repúblika Aitarak Laran Díli, hodi hatán ba pergunta Jornalista sira nian ne’ebé husu konaba presiza harii órgaun FALINTIL ida atu bele sai sumbriña ba veteranu sira ne’ebé veteranus FALITIN sira wainhira reforma husi F-FDTL.

Lere Anan Timur hatutan katak, veteranus sira agora ba hotu ona reforma, hela joven de’it, joven tenki sai militar loloos, tanba tama iha militar ne’e, laiha ema ida atu obriga.

“Sé lakohi dehan katak, ha’u hakarak veteranus nafatin, ba Sosial trata surat ba forsa rezerva,” katak Lere Anan Timur.

Nia hatutan, reforma ne’e, la’os problema, maibé problema mak jerasaun foun sira tenki kaer metin instituisaun.

Nia esklarese, buat ne’e sai preokupasaun ema hotu nian, jerasaun foun tenki prepara-an hodi hatutan no kuidadu instituisaun F-FDTL.

“Uma ida karik, fondasi ami tau ona, agora jerasaun foun mai atu hatutan ne’e, tenki nasionalismu maka’as,”katak Lere Anan Timur.

Nia afirma, jerasaun foun liliu forsa armada nasionalismu tenke maka’as, hadomi rai doben TL ne’e, hadomi povu, no hadomi instituisaun.

Tuir informasaun ne’ebé mak Jornal ne’e rekoella katak, forsa veteranus sira prontu atu reforma, maibé Estadu presiza kria órgaun FALINTIL ida atu bele enkaixa veteranus sira iha órgaun iha órgaun ne’e, wainhira reforma husi F-FDTL.

Maibé to’o ohin loron Estadu seidauk bele kria órgaun FALINTIL, tanba Lei konaba kriasaun Konsellu Veteranus seidauk iha. No tanba kuandu iha Lei Konsellu Veteranus mak bele estabelese mós órgaun FALINTIL.cos

Jornal Nacional