Dezafiu Ba Serbisu Defensoria Publika

DILI – Serbisu Defensoria Publika mos hetan dezafiu husi klientes tamba dalaruma ladun kolabora didiak husi parte defesa, ho nunee husi parte defesa labele halo defesa neebe mak diak no kualidade ba kliente.

Tuir Defensor Publika neebe mak lakohi temi naran katak dezafiu neebe hetan iha serbisu fatin mak nuudar defensor publika mak kuandu kliente simu tiha akuzasaun tau tiha fali iha gaveta no tau iha uma no kuandu simu notifikasaun husi tribunal mak ba hasoru defensa iha Tribunal deit. Tamba nee, kuandu hasoru malu iha Tribunal nee tempu ouituan deit atu koalia provas no faktus hodi halo kontestamentu ho akuzasaun husi Ministeriu Publiku.

Ho nunee, husi parte defesa no kliente labele koalia malu didiak hodi bele hatoo provas hodi bele halo defesa neebe mak diak ba ami nia kliente sira,”dehan nia.

Tamba nee, serbisu nuudar defensoria publika husu ba governu atu halo mos sosializasaun ba povu sira hodi bele hatene ninia dever hodi bele koopera didiak ho Defensor Publiku.

Iha fatin hanesan, tuir arguidu Sebastiana da Silva katak mos rekuinhese katak kuandu simu tiha notifikasaun husi Ministeriu Publiku, diak ida la ba hasoru defesa atu bele halo defesa maibe kuandu simu tiha notifikasaun mak ba hasoru malu deit iha Tribunal.

Nia hatutan, trazaun labele hasoru defesa tamba kestaun distansia husi Liquisa mai iha Dili no diak ida preokupa fali ba atividade seluk. Ikus mai, labele hasoru defesa tamba nee diak ida defesa sira la halo defesa didiak tamba la estuda no hatene didiak arguidu ninia kaju hodi halo kontestasaun ho Ministeriu Publiku. Domingos Piedade Freitas

Suara Timor Lorosae