Responsável eleitoral timoroan
ida garanti ona, iha loron-sesta ne'e, katak buat hotu hala'o ona, hosi kapital
ba sentru sira votasaun nian iha nasaun laran no iha estranjeiru, hodi garanti
katak lejislativu sira iha loron-sábadu sei hanesan livre, justu ho
transparente.
"Esforsu tomak ne'ebé halo
to'o agora no ami sei halo nafatin hodi bele garanti duni. Iha kestaun ki'ik
sira maibé la'ós hanesan obstákulu mai ami", hatete hosi diretór-jeral
hosi Sekretariadu Tékniku Administrasaun Eleitoral (STAE), Acilino Manuel
Branco.
"Ami bele garanti katak
eleisaun ne'e sei di'ak liu duké anterior, maski ho preparasaun iha tempu
badak. Preparativu sira hanesan máximu no instrusaun sira maka atu garanti
imparsialidade no atendimentu justu hodi garanti eleisaun livre ida, justu ho
transparente. Ami bele garanti ne'e", nia afirma.
Tuir responsável hosi sTAE,
distribuisaun hosi material tomak ne'ebé presiza ba votasaun halo ona kuaze
hotu "90% resin" iha nasaun laran.
Hatán kona-ba denunsia sira
ne'ebé halo hosi koligasaun opozisaun nian, Aliansa Mudansa ba Progresu (AMP),
kona-ba hipóteze mudansa iha brigada eleitoral sira, Acilino Branco nega ona
saida maka nia hatete hanesan "boatu sira".
Acilino Manuel Branco konfirma
ona katak, to'o agora, STAE la simu kesar ruma hosi forsa polítika ruma, maibé
iha de'it "pedidu esklaresimentu ida" kona-ba denunsia ne'e.
"Konfirma ona katak
informasaun ne'e la'ós sériu, hanesan de'it denúnsia ida kona-ba suspeita sira.
Maibé ba STAE la liu boatu sira lahó justifikasaun sira", nia afirma.
Responsável eleitoral rekorda
katak prosesu rekrutamentu demora no hahú bainhira eleisaun sira marka ho
eventual substituisaun sira sei komplikadu, tanba impaktu administrativu no ba
nesesidade atu ofisial tomak iha treinamentu adekuadu.
"Iha inísiu hosi prosesu
rekrutamentu tomak, hafoin markasaun ba loron eleisaun nian, iha preparativu
sira hosi brigada sira no ofisial eleitoral sira, halo ona avaliasaun ida hodi
haree sé maka serbisu ona iha prosesu pasadu, hodi determina katak bele
kontinua. Klaru, ami fó prioridade ba sira ne'ebé maka serbisu ona ho ami no
iha ona esperiénsia", nia afirma.
"Sira sujere ona katak tuir
loloos ami halo agora mudansa iha períudu reflesaun nian. Maibé, ne'e hanesan
susar tanba ami tenki halo treinu ba ema sira. Troka hanesan komplikadu iha
momentu ruma, liuliu bainhira iha tempu oituan", nia afirma.
Fatin votu sira loke tuku 07:00
iha loron-sábadu ba eleisaun hosi deputadu na'in 65 ba Parlamentu Nasional.
SAPO TL ho Lusa
Sem comentários:
Enviar um comentário